पलेशालाई कांस्य

काठमाडौं। नेपालकी पलेशा गोवर्धनले ११औं एसियन पारा तेक्वान्दो च्याम्पियनसिपमा कांस्य पदक जितेकी छन्।

मंगोलियाको उलानबटारमा सोमबार सम्पन्न प्रतियोगितामा पलेशाले के–४४ क्याटगोरीको महिला ५७ केजीमुनि कांस्य जितेकी हुन्। पहिलो चरणमा बाइ पाउदै पलेशा सोझै सेमिफाइनलमा प्रवेश गरेकी थिइन्। सेमिफाइनलमा इरानकी जाह्रा रहिमीविरुद्ध प्रतिस्पर्धा गरेकी थिइन्। तर, पलेशा ०–११ ले पराजित भएको प्रशिक्षक कविराज नेगी लामाले जनाएका छन्।

त्यसैगरी के–४४ क्याटगोरीअन्तर्गत पुरुष ६३ केजीमुनि अमिर ब्लोनले इरानका सइद सादेघियानपुरविरुद्ध प्रतिस्पर्धा गरेका थिए। पहिलो राउन्ड ३–३ को बराबरीमा सकिए पनि दोस्रो राउन्डमा उनी २–१४ ले पराजित भए।

महिला ४७ केजीमुनि रेनु तामाङले इरानकी आइलार जामीसँग पराजित भइन्। पहिलो राउन्डमा उनी ०–८ ले पछि परिन्। दोस्रो राउन्ड अंकविहीन हुँदै बराबरीमा समाप्त भएको थियो। अब अमिर र रेनु उलानबटारमै मंगलबारदेखि हुने आईची–नागोया एसियाली पारा तेक्वान्दोको छनोट प्रतियोगितामा सहभागी हुनेछन्। विजेता र उपविजेता एसियाली पारा तेक्वान्दोका लागि छनोट हुने छन्।

पलेशा भने विश्व र्‍याङकिङका आधारमा एसियाली पारा तेक्वान्दोका लागि छनोट भइसकेकी छन्।