उत्कृष्ट मेसी

काठमाडौं। लिओनल मेसीले मेजर लिग सकर (एमएलएस) करिअरमा पहिलोपल्ट चार गोल र एक असिस्ट गरेका छन्।

योसँगै इन्टर मियामीले आइतबार बिहान सम्पन्न खेलमा सीएफ मोन्ट्रियललाई ७–१ को फराकिलो अन्तरले पराजित गरेको छ।

मेसीले खेलको दोस्रो हाफमा लगातार तीन गोल गर्दै आफ्नो चार गोल पूरा गरे। उनले खेलको ४०औं मिनेटमा फ्रिकिकमार्फत गोल गर्दै इन्टर मियामीलाई २–१ को अग्रता दिलाएका थिए। यो सिजन उनको १५औं गोल थियो।

त्यसपछि ५२औं मिनेटमा मेसीले व्यक्तिगत दोस्रो गोल गर्दै टोलीको अग्रता ३–१ बनाए। उनले ८३औं मिनेटमा तेस्रो तथा इन्जुरी टाइमको छैटौं मिनेटमा चौथो गोल गरे। अन्तिम गोल पनि फ्रिकिकमार्फत आएको थियो।

मेसी खेलअघि गोलको दौडमा एफसी डलासका पेटार मुसाभन्दा दुई गोल पछाडि थिए। चार गोलसँगै उनले गोल्डेन बुटको दौडमा आफ्नो स्थान थप बलियो बनाएका छन्।

इन्टर मियामीका लागि कार्लोस कासेमिरोले २०औं मिनेटमा टेलास्को सेगोभियाको कर्नरमा हेडरमार्फत गोल गर्दै टोलीलाई सुरुआती अग्रता दिलाएका थिए। यो ३४ वर्षीय मिडफिल्डरको सिजनको पहिलो लिग गोल थियो। सेगोभियाले भने आफ्नो दोस्रो एमएलएस सिजनमा करिअरकै उत्कृष्ट नवौं असिस्ट पूरा गरे।

मोन्ट्रियलले ३७औं मिनेटमा फाबियन हर्बर्सको गोलमार्फत खेल १–१ मा ल्याएको थियो। यो हर्बर्सको सिजनको पहिलो गोल थियो। तर‚ दोस्रो हाफमा इन्टर मियामीले मोन्ट्रियलमाथि पूर्ण नियन्त्रण जमायो।

लुइस सुआरेजले ८०औं मिनेटमा मेसीको असिस्टमा गोल गर्दै स्कोर ४–१ बनाए। यो सुआरेजको सिजनको ११औं गोल थियो भने मेसीको यो खेलको १०औं असिस्ट थियो।

१८ वर्षीय नवोदित खेलाडी अलेक्जान्डर शाले ८९औं मिनेटमा गोल गर्दै इन्टर मियामीको अग्रता ६–१ बनाए। यो एमएलएसमा तीन खेल र ३७ मिनेटको खेलपछि उनको पहिलो गोल थियो।

इन्टर मियामीका गोलरक्षक डेयन सेन्ट क्लेयरले तीन बचाउ गरे। जितसँगै इन्टर मियामीले मोन्ट्रियलविरुद्ध लगातार पाँचौं जित हात पारेको छ। अगस्ट महिनामा भने टोलीले एक जित, दुई हार र दुई बराबरीको नतिजा निकाल्यो।

जुलाईको अन्त्यमा मोन्ट्रियललाई उसकै मैदानमा १–० ले हराएपछि इन्टर मियामीले पहिलोपटक जित हात पारेको हो।