अभागी लिभरपुल

काठमाडौं। प्रिमियर लिगमा लिभरपुलले शनिबार नटिङ्घम फरेस्टसँग २–२ गोलको बराबरी खेलेको छ।

दुईपटक पछि परेको अवस्थामा पुनरागमन गरेको थियो। तर, लिभरपुलका नवनियुक्त प्रशिक्षक आन्दोनी इराओला अभागी साबित भए। टोली सम्हालेपछि उनी पहिलो जितका लागि अझै प्रतीक्षामा छन्।

इराओलाको नेतृत्वमा लिभरपुलले गत साता न्युक्यासलविरुद्ध खेलेको पहिलो लिग खेल पनि २–२ को बराबरीमा सकिएको थियो।

नटिङ्घम फरेस्टविरुद्ध लिभरपुलका लागि समर ट्रान्सफरमा अनुबन्धित भिक्टर मुन्योसले ८२औं मिनेटमा गोल गर्दै टोलीलाई एक अंक दिलाए। फ्लोरियन विर्ट्जको उत्कृष्ट थ्रु–बल पाएपछि मुन्योसले प्रहार गरेको बल क्रसबारमा ठोक्किँदै गोलमा परिणत भएको थियो।

लिभरपुलका लागि अलेक्जान्डर इसाकले पहिलो बराबरी गोल गरेका थिए। फरेस्टका डान एनडोए र पेनाल्टीमार्फत मर्गन गिब्स–ह्वाइटले गोल गरेका थिए।

शनिबार प्रिमियर लिगमा भएका चारमध्ये यो पहिलो खेल थियो। अन्य खेलमा बर्नमाउथले एभर्टनको सामना गर्दा हल सिटीले अर्को नवप्रवेशी टोली कोभेन्ट्रीसँग तथा टोटनह्याम घरेलु मैदानमा न्युक्यासलसँग खेल्ने तालिका छ।