सानदार सिटी

काठमाडौं। म्यानचेस्टर सिटीले प्रिमियर लिगमा आफ्नो उत्कृष्ट सुरुआतलाई निरन्तरता दिँदै क्रिस्टल प्यालेसमाथि ४–१ को सानदार जित हात पारेको छ। शुक्रबार भएको खेलमा रियान चेरकी र एर्लिङ हालान्डले दुई–दुई गोल गरेपछि सिटीले लगातार दोस्रो जित दर्ता गरेको हो।

दुई खेलबाट ६ अंक जोडेको सिटी प्रिमियर लिगको शीर्ष स्थानमा पुगेको छ। उता, क्रिस्टल प्यालेस भने लगातार दोस्रो खेलमा पराजित हुँदै अंकविहीन छ। प्यालेसका मिडफिल्डर एडम ह्वार्टनले नयाँ प्रशिक्षक पियरे साजको रणनीतिमा टोली अभ्यस्त हुन अझै केही समय लाग्ने बताए।

‘हामीसँग खेलका केही राम्रा मौका थिए, तर हामीले उनीहरूको गोलकिपरलाई पर्याप्त परीक्षण गर्न सकेनौं। यो निराशाजनक नतिजा हो,’ उनले बताए।

खेलको १७औं मिनेटमा हालान्डले उत्कृष्ट हेडरमार्फत गोल गर्दै सिटीलाई अग्रता दिलाए। प्रिमियर लिगका गत सिजनका सर्वाधिक गोलकर्ता हालान्डका लागि यो यस सिजनको पहिलो गोल थियो।

दोस्रो हाफ सुरु भएको केही समयमै चेरकीले सिटीको अग्रता दोब्बर बनाए। उनले विपक्षी खेलाडीहरूको भीडबीचबाट उत्कृष्ट रूपमा अघि बढ्दै नजिकैबाट बललाई जाली चुमाए।

तर, त्यसको केही समयमै क्रिस्टल प्यालेस खेलमा फर्कने संकेत देखायो। येरेमी पिनोको उत्कृष्ट फ्रिकिक गोलपोस्टमा लागेर फर्किएपनि सिटीका गोलकिपर जियानलुइगी डोनारुम्माको शरीरमा ठोक्किँदै गोलमा परिणत भयो।

प्यालेसको गोलपछि सिटीलाई दबाबमा पार्ने सम्भावना देखिए पनि चेरकीले त्यसको दुई मिनेटमै अर्को गोल गर्दै टोलीको अग्रता पुनः दुई गोलमा पुर्‍याए। बक्सबाहिरबाट उनले प्रहार गरेको बल विपक्षी खेलाडीलाई लागेर दिशा परिवर्तन भएपछि गोलकिपर डिन हेन्डरसनलाई रोक्न कठिन भयो।

यो चेरकीको प्रिमियर लिग करिअरकै पहिलो दुई गोल गर्ने खेल थियो। यद्यपि, उनले आफ्नो प्रदर्शनलाई भने ठीकठाक मात्र भएको बताए। चेरकीका अनुसार उनलाई प्रशिक्षकले मैदानबाट बाहिर निकाल्न लागेको महसुस भएपछि आफूलाई प्रमाणित गर्न अझ आक्रामक रूपमा खेल्ने निर्णय गरेका थिए।

‘जब मैले एन्जो मारेस्काले मलाई परिवर्तन गर्न खोजेको देखें, मलाई त्यो मन परेन। त्यसैले मैले खेल्न र गोल गर्न चाहन्छु भनेर देखाउनुपर्ने भयो,’ चेरकीले भने।

उनले पूर्वप्रशिक्षक पेप ग्वार्डिओलासँग सिटीको लामो इतिहास रहेको उल्लेख गर्दै नयाँ प्रशिक्षकसँग नयाँ अध्याय सुरु भएको बताए। ‘पेप ग्वार्डिओलासँग हाम्रो ठूलो इतिहास थियो। अब हामीले अर्को कथा सुरु गरेका छौं। हामीले हरेक हप्ता आफूलाई प्रमाणित गर्नुपर्छ र हामी त्यसैका लागि यहाँ छौं,’ उनले भने।

खेल सकिन ६ मिनेट बाँकी रहँदा हालान्डले बायाँ खुट्टाले उत्कृष्ट प्रहार गर्दै व्यक्तिगत दोस्रो गोल गरे। यससँगै सिटीले ४–१ को जित सुनिश्चित गर्‍यो।