काठमाडौं । काठमाडौंको धुम्बाराहीस्थित कान्तिपुर इंग्लिस हाइ स्कुल (केईएचएस)ले ४० औं वार्षीकोत्सवको अवसरमा इन्टरहाउस फुटसल प्रतियोगिताको आयोजना सम्पन्न गरेको छ ।
जुनियर फुटबल एकेडेमी (जेएफए) सँगको सहकार्यमा स्कुलले प्रतियोगिता आइतबार सम्पन्न गरेको हो।
राउण्ड रोबिन संरचनामा सुरु भएको खेल अघिल्लो साताबाट सुरु भएको थियो। उपाधिको लागि भने अंक तालिकाको शीर्ष स्थानमा रहेका दुई टिमले प्रतिस्पर्धा गरेका थिए। खेलमा जुनियर तथा सिनियर टिमले उपाधिको लागि छुट्टा–छुट्टै प्रतिस्पर्धा गरेका थिए।
जुनियरतर्फको उपाधि अन्नपूर्ण हाउसले जितेको छ। फाइनल खेलमा धौलागिरी हाउसविरुद्ध ६–० गोलको जित निकाल्दै अन्नपूर्णले उपाधि जितेको हो। त्यस्तै, सिनियरतर्फ भने सगरमाथा हाउसले उपाधि जितेको छ। मकालु हाउसलाई ३–१ गोलले पराजित गर्दै सगरमाथाले उपाधि जितेको हो।
कार्यक्रममा मुख्य अतिथिको आसन ग्रहण नेपाली यू–१८ राष्ट्रिय टिमका पूर्व प्रशिक्षक चेतनारायण श्रेष्ठले गरेका थिए। थुप्रै व्यवसायीक फुटबल टिमको प्रशिक्षक बनिसकेका श्रेष्ठले यस्ता खालका गतिविधिको आयोजना गर्नु सराहनिय काम भएको भन्दै खेलाडी उत्पादनमा सघाउ पुर्याउने बताए। श्रेष्ठले विजयी टिमहरुलाई ट्रफी, मेडल तथा सर्टिफिकेट प्रदान गरे।
त्यस्तै प्रतियोगिताको सर्वोत्कृष्ट खेलाडी जुनियरबाट सुबोध नेपाली तथा सिनियरबाट निखिल गुरुङ घोषित भएका छन्।
