यु-१४ बोइज तथा गर्ल्स फुटसल जेठ अन्तिमबाट

काठमाडौं। फुटबलर्स मिसन टुगेदरको आयोजनामा विद्यालयस्तरीय यु-१४ बोइज तथा गर्ल्स फुटसल प्रतियोगिता आयोजना हुने भएको छ। उक्त प्रतियोगिता अखिल नेपाल फुटबल संघ (एन्फा)बाट मान्यता प्राप्त रहेको आयोजकले जनाएको छ।

आयोजकका अनुसार नेपाली फुटबलको विकास, बालबालिकामा खेलप्रतिको रुचि बढाउने तथा ग्रामीण र सहरी क्षेत्रका प्रतिभाशाली खेलाडीहरूको पहिचान गर्ने उद्देश्यले प्रतियोगिता आयोजना गर्न लागिएको हो। ग्रासरुट तहको फुटबललाई सुदृढ बनाउँदै विद्यालय स्तरबाटै नयाँ खेलाडी उत्पादन गर्ने लक्ष्य राखिएको छ।

प्रतियोगिता जेठ २९ गतेदेखि सञ्चालन हुनेछ। प्रतियोगितामा यु-१४ बोइज र यु-१४ गर्ल्स दुवै विधामा फुटसल खेलहरू सञ्चालन गरिनेछन्। प्रतियोगिताको तयारी अन्तिम चरणमा पुगेको आयोजकले जनाएको छ।

खेलहरू ग्यालेक्सी पब्लिक विद्यालयको फुटसल मैदान (ज्ञानेश्वर) र द एक्सेल्सियर स्कुल (स्वयम्भू) मा सञ्चालन गरिनेछन्।