काठमाडौं । विभागीय टोली नेपाल एपीएफ क्लब तेस्रो टाईगर कप अन्तराष्ट्रिय महिला तथा पुरुष भलिबल प्रतियोगिताको महिलातर्फ अपराजित रहँदै सेमिफाइनलमा प्रवेश गरेको छ ।
पोखरा रंगशालाको कभर्ड हलमा बुधबार अर्को विभागीय टोली त्रिभुवन आर्मीलाई ३-१ को सेटमा हराउँदै एपीएफले अपराजित रहँदै अन्तिम चारको यात्रा तय गरेको हो ।
राउण्ड रोबिनको अन्तिम खेलमा एपीएफले आर्मीविरुद्ध पहिलो सेट २५–१७ ले जितेको थियो भने दोस्रो सेट २२–२५ ले गुमाउन पुगेको थियो । त्यसपछिको तेस्रो र चौथो सेटमा एपीएफले २५–१६ र २५–१५ ले जित्न सफल भयो ।
आर्मीको भने यो पहिलो हार हो । हारका बाबजुत दोस्रो स्थानमा रहेको आर्मीले पनि सेमिफाइनलमा स्थान बनाएको छ।
बुधबार नै भएको महिलातर्फको दोस्रो खेलमा न्यु डायमण्ड स्पोर्टस क्लबले गण्डकी प्रदेशलाई ३-१ को सेटमा हराएर पहिलो जित हात पारेको छ ।
गण्डकीविरुद्ध डायमण्डले पहिलो सेट १९–२५ ले गुमायो । तर, त्यसपछिको तीनै सेट आफ्नो पक्षमा पार्दै डायमण्डले जित निकाल्न सफल भयो । डायमण्डले दोस्रो सेट २५–१५, तेस्रो सेट २५–१४ र चौथो सेट २५–११ ले जितेको हो ।
प्रतियोगिता अन्तर्गत नै बुधबार पुरुषतर्फ दुई खेल हुनेछन् ।
-1732631466.jpeg)
