मेसी मैदानमा फर्किएको खेलमा मियामी पराजित

काठमाडौं। डानियल आर्सिलाले दुई गोल गरेपछि क्लब लियोनले इन्टर मियामीलाई ३–२ ले पराजित गर्दै लिग्स कपको नकआउट चरणमा स्थान बनाएको छ।

खेलमा अर्जेन्टिनाका स्टार लिओनल मेसी आफ्ना पिता होर्खे मेसीको निधनपछि पहिलो पटक मैदानमा फर्किएका थिए। मियामीको न्यु स्टेडियममा भएको खेलमा मेसीले दोस्रो हाफबाट मैदान प्रवेश गरेका थिए।

उनी मैदानमा प्रवेश गर्दा समर्थकहरूले ठूलो ताली बजाउँदै स्वागत गरेका थिए। गत शनिबार ६८ वर्षको उमेरमा पिता होर्खे मेसीको निधन भएपछि यो मेसीको पहिलो खेल थियो।

खेलअघि मेसीले सामाजिक सञ्जालमार्फत आफ्ना बुबालाई भावुक श्रद्धाञ्जली दिएका थिए। उनले बुबाको निधनपछि आफू अब कसरी अगाडि बढ्ने भन्नेमा अन्योलमा रहेको उल्लेख गरेका थिए।

होर्खे मेसीले आफ्नो छोराको फुटबल करियरमा महत्त्वपूर्ण भूमिका निर्वाह गरेका थिए। उनी लामो समयसम्म मेसीका एजेन्टका रूपमा काम गर्नुका साथै उनका व्यावसायिक मामिला पनि व्यवस्थापन गर्दै आएका थिए।

पिताको निधनपछि अर्जेन्टिना पुगेका मेसीले शनिबार मोन्टेरेविरुद्ध इन्टर मियामीको खेल गुमाएका थिए। तर‚ लियोनविरुद्धको खेलमा उनी बेन्चमा रहेका थिए र दोस्रो हाफ सुरु हुँदा डानियल पिन्टरको स्थानमा मैदान प्रवेश गरे।

खेलमा इन्टर मियामीले पहिलो हाफको ४२औं मिनेटमा डानियल पिन्टरको गोलमार्फत अग्रता लिएको थियो। इयान फ्रेले दिएको पासमा पिन्टरले गोल गरेका थिए।

तर‚ दोस्रो हाफमा लियोनले उत्कृष्ट पुनरागमन गर्‍यो। ५०औं मिनेटमा डानियल आर्सिलाले पेनाल्टी क्षेत्रको मध्यभागबाट दायाँ खुट्टाले प्रहार गर्दै गोल गरे। त्यसपछि आर्सिलाले ८३औं मिनेटमा निर्णायक गोल गर्दै लियोनलाई ३–२ को अग्रता दिलाए। यो प्रतियोगितामा उनको चौथो गोल हो।

लियोनका लागि जुआन पाब्लो डोमिङ्गेजले पनि एक गोल गरे। इन्टर मियामीका लागि यानिक ब्राइटले एक गोल गरे पनि टोलीलाई हारबाट जोगाउन सकेनन्।

यो इन्टर मियामीको लगातार दोस्रो खेल हो, जहाँ टोलीले दोस्रो हाफमा लिएको अग्रता जोगाउन सकेन। सन् २०२३ मा लिग्स कपको उपाधि जितेको मियामी गत वर्ष फाइनलसम्म पुगेको थियो। यसपटक भने टोली प्रतियोगिताबाट बाहिरिएको छ।

मोन्टेरेसँगको हारपछि एमएलएस तालिकामा १२औं स्थानमा रहेको मियामी नकआउट चरणमा पुग्ने सम्भावना यसअघि नै कमजोर बनेको थियो। प्रतियोगिताको क्वार्टरफाइनलमा एमएलएसका शीर्ष चार र मेक्सिकोको लिगा एमएक्सका शीर्ष चार टोलीले स्थान बनाउनेछन्।

लगातार दुई खेल जित्दै लियोन भने लिगा एमएक्सको तालिकामा शीर्ष स्थानमा पुगेको छ।