पुलिस र एपीएफको जित

काठमाडौं । विभागीय टोली नेपाल पुलिस क्लब र नेपाल एपीएफ क्लबले तेस्रो टाईगर कप अन्तराष्ट्रिय महिला तथा पुरुष भलिबल प्रतियोगिताको पुरुषतर्फ जित निकालेका छन् ।

पोखरा रंगशालाको कभर्ड हलमा मंगलबार श्रीलंकाको एसटी जोशेफ वाज स्पोर्टस क्लबलाई ३-२ को सेटमा हराउँदै पुलिसले पहिलो जित निकालेको हो ।

तेस्रो खेलमा पहिलो जित निकाल्ने क्रममा पुलिसले जोशेफ वाजसँग पहिलो र दोस्रो सेट १९–२५, २३–२५ गुमाएको थियो । जोशेफ वाजलाई तेस्रो,चौथो र पाँचौ सेट २५–२३, २५–१९ र १५-१३ को सेटमा हराउन सफल भयो । जोशेफ वाज स्पोर्टस क्लबको भने यो लगातार दोस्रो हार हो ।

यसअघि पहिलो खेलमा जोशेफ वाजलाई विभागिय टोली त्रिभुवन आर्मी क्लबले ३–० को सेटमा हराउन सफल भएको थियो ।

मंगलबार नै भएको खेलमा गण्डकी प्रदेशलाई ३-१ को सेटमा हराउँदै विभागीय टोली नेपाल एपीएफ क्लबले लगातार तेस्रो जित हात पारेको छ । लगातार तेस्रो जित निकाल्ने क्रममा एपीएफले गण्डकीलाई पहिलो र दोस्रो सेट २५-१९,२५-२३ ले हराएको थियो । तेस्रो सेट २५-२० ले गुमाएको एपीएफले चौथो सेट २५-१९ ले जितेको थियो ।

गण्डकीको भने दोस्रो खेलमा यो पहिलो हार हो । पहिलो खेलमा गण्डकीले विभागीय टोली नेपाल पुलिस क्लबलाई हराएको थियो ।

महिला र पुरुष दुवैतर्फ उपाधि विजेता टिमलाई ५/५ लाख रुपैया नगद, उपविजेता टिमलाई समान नगद २ लाख ५० हजार, तेश्रो हुने टिमलाई नगद १ लाख २५ हजार र सान्त्वना हुने टिमलाई नगद ६५ हजार सहित ट्रफी र प्रमाण पत्र प्राप्त गर्ने छन् ।

त्यस्तै महिला तथा पुरुषतर्फ उत्कृष्ट एक–एक खेलाडीले जनही २५ हजार नगद प्राप्त गर्नेछन् भने हरेक विद्याका उत्कृष्ट खेलाडीहरु प्रशिक्षकलाई पनि जनही १० हजार नगद र ट्रफी सहित सम्मान गर्ने आयोजकले जनाएको छ ।