काठमाडौं । विभागीय टोली नेपाल पुलिस क्लबले सातौं संस्करणको एनभीए राष्ट्रिय महिला तथा पुरुष क्लब भलिबल च्याम्पियनसिप अन्तर्गत महिलातर्फ लगातार तेस्रो जित निकालेको छ ।
त्रिपुरेश्वरस्थित राखेपको कभर्डहलमा बिहीबार भएको खेलमा न्यु डायमण्ड स्पोर्ट्स क्लबलाई ३-२ को सेटमा हराउँदै पुलिसले लगातार तेस्रो जित निकालेको हो ।
पुलिसले न्यु डायमण्डमाथि २५-२२,२२-२५,२५-१४,२३-२५ र १५-१० को सेटमा हराएको हो ।
जितसँगै पुलिस समूह 'ए' को समूह विजेता बन्दै सेमिफाइनलमा प्रवेश गरेको छ ।
पुलिसले ३ खेलमा ८ अंक जोडेको छ ।
न्यु डायमण्ड समूह उपविजेता बन्दै सेमिफाइनलमा पुगेको छ । न्यु डायमण्डले ३ खेलमा ६ अंक जोडेको छ ।
च्याम्पियनसिप अन्तर्गत बिहीबार नै पुरुषतर्फ चार खेल हुँदैछ ।
पुरुषतर्फको पहिलो खेलमा बुढानिलकण्ठ भलिबल क्लब र केशवलाल भलिबल ट्रेनिङ सेन्टरबीच खेल हुनेछ । खेल मध्यान्ह १२ बजेबाट सुरु हुनेछ ।
पुरुषतर्फको दोस्रो खेलमा टिपटप हेल्प नेपाल र मधेश प्रदेशबीच खेल हुनेछ । दुई टोलीबीचको खेल दिउँसो २ बजेबाट सुरु हुनेछ ।
पुरुषतर्फको तेस्रो खेलमा ढोरपाटन स्पोर्टस क्लब र गण्डकी प्रदेशबीच प्रतिस्पर्धा हुनेछ । खेल दिउँसो ४ बजेबाट सुरु हुनेछ ।
त्यस्तै पुरुषतर्फको चौंथो तथा दिनको अन्तिम खेलमा नेपाल एपीएफ क्लब र शैलुङ्ग भलिबल क्लबबीच प्रतिस्पर्धा हुनेछ । खेल साँझ ६ बजेबाट सुरु हुनेछ ।
च्याम्पियनसिपमा पुरुषतर्फ १४ र महिलातर्फ ८ टोलीको सहभागिता रहेको छ । च्याम्पियनसिपको महिला र पुरुष विजेताले नगद ४ लाख पाउनेछन् । यस्तै उपविजेताले २ लाख र तेस्रो हुनेले १ लाख पाउनेछन् ।
च्याम्पियनसिपको सर्वोत्कृष्ट महिला र पुरुष खेलाडीले जनही २५ हजार पाउने छन् । विधागततर्फ उत्कृष्ट हुने लिबेरो, स्पाइकर, ब्लकर, सर्भर, सेटर र प्रशिक्षकले जनही १० हजार रुपैयाँ पाउनेछन् ।
त्यस्तै च्याम्पियनसिपबाट पुरुषतर्फ शीर्ष ८ टोली र महिलातर्फ शीर्ष ६ टोलीले सातौं आरबीबी-एनभीए क्लब लिगका लागि छनोट हुनेछन् ।
-1732631466.jpeg)
