हेल्प नेपाल क्वाटरफाइनलमा
काठमाडौं । हेल्प नेपालले सातौं संस्करणको एनभीए राष्ट्रिय महिला तथा पुरुष क्लब भलिबल च्याम्पियनसिप अन्तर्गत पुरुषतर्फ क्वाटरफाइनलमा स्थान बनाएको छ ।
त्रिपुरेश्वरस्थित राखेपको कभर्डहलमा बुधबार केशवलाल भलिबल प्रशिक्षण केन्द्रलाई ३-० को सोझो सेटमा हराउँदै हेल्प नेपालले क्वाटरफाइनलमा स्थान पक्का गरेको हो ।
लगातार दोस्रो जित निकाल्ने क्रममा हेल्प नेपालले केशवलाललाई २५-१८,२५-१८ र २५-१३ ले हराएको हो ।
जितसँगै समूह 'डी' को हेल्प नेपालले ६ अंक जोडेको छ ।
च्याम्पियनसिपमा पुरुषतर्फ १४ र महिलातर्फ ८ टोलीको सहभागिता रहेको छ ।
च्याम्पियनसिपको महिला र पुरुष विजेताले नगद ४ लाख पाउनेछन् । यस्तै उपविजेताले २ लाख र तेस्रो हुनेले १ लाख पाउनेछन् । च्याम्पियनसिपको सर्वोत्कृष्ट महिला र पुरुष खेलाडीले जनही २५ हजार पाउने छन् ।
विधागततर्फ उत्कृष्ट हुने लिबेरो, स्पाइकर, ब्लकर, सर्भर, सेटर र प्रशिक्षकले जनही १० हजार रुपैयाँ पाउनेछन् ।
त्यस्तै च्याम्पियनसिपबाट पुरुषतर्फ शीर्ष ८ टोली र महिलातर्फ शीर्ष ६ टोलीले सातौं आरबीबी-एनभीए क्लब लिगका लागि छनोट हुनेछन् ।
