साविक विजेता आर्मी क्वाटरफाइनलमा

काठमाडौं । साविक विजेता त्रिभुवन आर्मी क्लबले सातौं संस्करणको एनभीए राष्ट्रिय महिला तथा पुरुष क्लब भलिबल च्याम्पियनसिपको पुरुषतर्फ लगातार दोस्रो जित निकालेको छ ।

त्रिपुरेश्वरस्थित राखेपको कभर्डहलमा सोमबार मणिमुकुन्द भलिबल क्लबलाई ३-० को सेटमा हराउँदै आर्मीले लगातार दोस्रो जित निकालेको हो ।

आर्मीले मणिमुकुन्दमाथि २५-११,२५-२० र २५-१४ ले हराएको हो ।

जितसँगै समूह 'ए' को आर्मीले २ खेलमा ६ अंक जोडेको छ । समूहको शीर्ष स्थानमा रहदै आर्मीले क्वाटरफाइनलमा स्थान बनाएको छ ।

आर्मीले पहिलो खेलमा दावाली मिलन क्लबलाई हराएको थियो ।

च्याम्पियनसिप अन्तर्गत नै आज पुरुषतर्फ अन्तिम खेल हुँदैछ ।

दिनको अन्तिम खेलमा एपीएफ क्लब र जावलाखेल भलिबल क्लबबीच प्रतिस्पर्धा हुनेछ ।  

यस अघि  केशवलाल मेमोरियल भलिबल ट्रेनिङ सेन्टरले  मधेश प्रदेशलाई २५-२१,२५-२३,२७-२९ र २५-१७ ले  पराजित गर्दै सुखद सुरुआत  गरेको छ ।

त्यस्तै हेल्प नेपालले पनि बुढानिलकण्ठ स्पोर्ट्स क्लबलाई २५-१६,२५-१९ र २५-१६ ले  हराउँदै सुखद सुरुआत गरेको छ ।

च्याम्पियनसिपमा पुरुषतर्फ १४ र महिलातर्फ ८ टोलीको सहभागिता रहेको छ ।

च्याम्पियनसिपको महिला र पुरुष विजेताले नगद ४ लाख पाउनेछन् । यस्तै उपविजेताले २ लाख र तेस्रो हुनेले १ लाख पाउनेछन् । च्याम्पियनसिपको सर्वोत्कृष्ट महिला र पुरुष खेलाडीले जनही २५ हजार पाउने छन् ।

विधागततर्फ उत्कृष्ट हुने लिबेरो, स्पाइकर, ब्लकर, सर्भर, सेटर र प्रशिक्षकले जनही १० हजार रुपैयाँ पाउनेछन् ।

त्यस्तै च्याम्पियनसिपबाट पुरुषतर्फ शीर्ष ८ टोली र महिलातर्फ शीर्ष ६ टोलीले सातौं आरबीबी-एनभीए क्लब लिगका लागि छनोट हुनेछन् ।