काठमाडौं । सातौं एनभीए राष्ट्रिय महिला तथा पुरुष क्लब भलिबल च्याम्पियनसिप पुसको अन्तिम साताबाट सुरु हुने भएको छ ।
नेपाल भलिबल संघले मंगलबार पत्रकार सम्मेलनको आयोजना गर्दै च्याम्पियनसिप पुस २४ गतेबाट माघ १ गतेसम्म आयोजना हुने जानकारी गराएको छ ।
च्याम्पियनसिपमा पुरूषतर्फ १४ र महिलातर्फ ८ टिमले प्रतिस्पर्धा गर्ने संघले जनाएको छ ।
त्रिपुरेश्वरस्थित राखेपको कभर्डहलमा आयोजना हुने च्याम्पियनसिपमा पुरुषतर्फ विभागीय टोली त्रिभुवन आर्मी, नेपाल पुलिस, नेपाल एपीएफसहित हेल्प नेपाल स्पोर्टस क्लब, नयाँबजार सामाजिक युवा क्लब, दाँवाली मिलन क्लब, गल्कोट स्पोर्टस क्लब बाग्लुङ, मणिमुकुन्द भलिबल क्लब बुटवल, जावलाखेल भलिबल ट्रेनिङ सेन्टर, बागमती प्रदेश, बुढानिलकण्ठ भलिबल क्लब, गण्डकी प्रदेश, मधेश प्रदेशको सहभागिता रहेको छ ।
यस्तै महिलातर्फ त्रिभुवन आर्मी, नेपाल पुलिस, एपीएफ, न्यू डायमण्ड स्पोर्टस क्लब, जावलाखेल भलिबल ट्रेनिङ सेन्टर, गण्डकी प्रदेश, ढोरपाटन स्पोर्टस क्लब र एभरेष्ट भलिबल क्लब बुटवलको सहभागिता रहनेछ ।
लिगकम नकआउटका आधारमा आयोजना हुने च्याम्पियनसिपको महिला र पुरुष विजेताले नगद ४ लाख पाउनेछन् । यस्तै उपविजेताले २ लाख र तेस्रो हुनेले १ लाख पाउनेछन् ।
च्याम्पियनसिपको सर्वोत्कृष्ट महिला र पुरुष खेलाडीले जनही २५ हजार पाउने छन् । विधागततर्फ उत्कृष्ट हुने लिबेरो, स्पाइकर, ब्लकर, सर्भर, सेटर र प्रशिक्षकले जनही १० हजार रुपैयाँ पाउनेछन् ।
त्यस्तै च्याम्पियनसिपबाट पुरुषतर्फ शीर्ष ८ टोली र महिलातर्फ शीर्ष ६ टोलीले सातौं आरबीबी-एनभीए क्लब लिग खेल्न पाउने छन् ।
च्याम्पियनसिपमा सहभागी टोलीले तीन जना विदेशी खेलाडी राख्न पाउने छन् ।
-1732631466.jpeg)
