काठमाडौं । भलिबल खेलको प्रवर्द्धन गर्ने उद्धेश्यले नुवाकोटको झिल्टुङमा पहिलो पटक भलिबलको प्रर्दशनी खेलको आयोजना गरिएको छ । बेलकोटगढी नगरपालिका वडा नम्बर ५ को आयोजनामा कोल्पुटारस्थित झिल्टिुङमा भलिबलको प्रर्दशनी खेलको गरिएको हो ।
वडाको आयोजना र पूर्व राष्ट्रिय तथा अन्तराष्ट्रिय महिला भलिबल खेलाडी फाउन्डेसनको व्यवस्थापनमा झिल्टुङमा महिला भलिबलको प्रर्दशनी खेल सम्भव बन्यो । स्थानीय अगुवा तथा एथलेटिक्सका पूर्व राष्ट्रिय खेलाडी मोहन नेपालको सक्रियतामा स्थानीय स्तरमा भलिबलको प्रबर्दन गर्ने उद्धेश्यले महिला खेलाडीलाई मैदानमा उतारिएको थियो ।
सशस्त्र प्रहरी बल एपीएफको महिला टिम दुई समूहमा विभाजन भएर खेलको प्रर्दशन गरेका थिए । अन्तराष्ट्रिय खेलाडी सरस्वती चौधरी, रेश्मा भण्डारी, निरुता ठगुन्ना सहितका महिला खेलाडीको खेल हेर्न पाउँदा स्थानीय समेत दंग थिए ।
राजधानी नजिक भएर पनि स्थानीय बासिन्दाले भलिबल खेल हेर्न र खेल्न सिक्ने इच्छा गरेपछि स्थानीय वडा र अगुवा मोहन नेपालले भलिबलका पूर्व मुख्य प्रशिक्षक कपिल किशोर श्रेष्ठसँग समन्वय गरेर कार्यक्रमको खाका तयार गरेका थिए । पूर्व राष्ट्रिय तथा अन्तराष्ट्रिय महिला भलिबल खेलाडी फाउन्डेसनले एपीएफको महिला टिमलाई प्रर्दशनी खेलमा प्रस्तुत गर्ने व्यवस्थापनको जिम्मेवारी लिएको थियो ।
राखेप पूर्व बोर्ड सदस्य इन्दिरा निरौला सहित फाउन्डेसनकी अध्यक्ष अन्जु श्रेष्ठ, उपाध्यक्ष रेश्मा घिमिरे, महासचिव सिजन सेन, कोषाध्यक्ष निलम बज्राचार्य सहितको टिमले महिला टिमको व्यवस्थापनको जिम्मेवारी सम्हालेको थियो । स्थानीयको इच्छा अनुसार झिल्टुङमा पहिलो पटक भलिबल खेलको प्रर्दशनी गरिएको हो ।
आईतबारको कार्यक्रमले यस क्षेत्रमा भलिबल खेलप्रति स्थानीयको चासो बढ्नुका साथै खेलको प्रवर्द्धनमा सहयोग पुग्ने विश्वास पूर्व राष्ट्रिय प्रशिक्षक कपिल किशोर श्रेष्ठले ब्यक्त गरेका छन् ।
नुवाकोट जिल्लाको झिल्टुङ खेलकुदको कार्यक्रममा निकै सक्रिय क्षेत्र मानिन्छ ।
झिल्टिुङमा राष्ट्रिय स्तरको ठुलो एथलेटिक्सको प्रतियोगिता झिल्टुङ दौड हरेक वर्ष आयोजना हुने गरेको छ । वडाले आयोजना गर्ने झिल्टिुङ दौडलाई स्थानीय सरकारको अग्रसरता नेपालमा हुने उदाहरणीय खेल कार्यक्रमको रुपमा लिने गरिन्छ ।
-1732631466.jpeg)
