सिंगल हैन, डबल लिग – अन्जन 

काठमाडौं । राष्ट्रिय फुटबल टिमका फरवार्ड अन्जन विष्टले चाँडो भन्दा चाँडो लिग सञ्चालन गर्न सरोकारवाला निकायसँग आग्रह गरेका छन् । आसन्न ए डिभिजन लिगलाई लिएर अन्यौलता बढिरहेको समय राष्ट्रिय फुटबल टिमका प्रभावशाली फरवार्ड विष्टले आपसी सहमती कायम गरेर यथास्रिघ लिग सञ्चालन गर्न अपिल गरेका हुन् ।

अखिल नेपाल फुटबल संघ (एन्फा)ले पुस २६ गतेबाट यस सिजनको ए डिभिजन लिग सञ्चालन गर्ने घोषणा गरेको छ । तर समयमै एन्फाले तयारी खर्च उपलब्ध नगराउँदा अधिकांश क्लबले लिग खेल्न नसक्ने भन्दै फुटबल संघमा ध्यानाकर्षण पत्र बुझाएका छन् ।

एन्फा र क्लबबीच बढ्दो तनावका कारण आसन्न ए डिभिजन लिग सञ्चालनमा विभिन्न आशंका उत्पन्न भैरहेका छन् । फरवार्ड विष्टले फुटबलको मेरुदण्डको रुपमा रहेका क्लब र एन्फाले आपसी सहमती बनाएर लिग आयोजनामा जुट्न अनुरोध गरेका हुन् । 

तयारी खर्च नपाएपछि लिग खेल्न नसकिने ए डिभिजन क्लबको धारणासँगै पुसको अन्तिम साताबाट सूरु हुने घरेलु लिग अन्यौलमा छ । एन्फाले लिगको तयारी खर्च बापत क्लबलाई साढे ३२ लाख रुपैयाँ दिने निर्णय गरेको थियो । तयारी वापतको ५० प्रतिशत रकम मंसिर १५ गतेभित्र उपलब्ध गराउने एन्फा र क्लबको सहमती थियो । तर तोकिएको समयमा तयारी खर्च उपलब्ध गराउन एन्फाले कुनै गृहकार्य नगरेपछि क्लबहरुले बिज्ञप्ति निकालेर एन्फाको ध्यानाकर्षण गराएका थिए ।

राष्ट्रिय टिमबाट पछिल्लो समय निरन्तर गोल गरिरहेका विष्टले सिंगल नभएर डबल लिग आयोजनामा पनि जोड दिएका छन् । उनले कुनैपनि बाहानामा सिंगल नभएर डबल लिग सञ्चालन गर्न अनुरोध गरेका छन् । 

उनले भनेका छन्, ‘कुनैपनि बाहानामा डबल लिगलाई सिंगल नगर्नुहोला । जो देश फुटबलमा अघि छ, त्यसको एकमात्र कारण बलियो घरेलु संरचना हो र हामीलाई कम्तीमा वर्षमा ८–१० महिला फुटबल हुने वातावरण मिलाईदिनुहोस ।’ 

‘म ग्यारेन्टी दिन्छु, बाहिरिएका खेलाडी नेपाल आउनेछन् । नेपाली फुटबलको स्तर बढ्नेछ । राम्रो विदेशी खेलाडीलाई नेपाली लिगमा आकर्षित गर्न सकिन्छ ।’ उनले थपेका छन् । 

एन्फाले यस पटकको लिग डबल राउण्ड रोबिनमा सञ्चालन गर्ने ऐतिहासिक निर्णय गरेको थियो । सोही कारणमा क्लबको तयारी खर्च समेत बढाएर साढे ३२ लाख पुर्याईएको थियो । तर एन्फाले आफुले निर्णय गरे अनुसारको तयारी खर्च क्लबलाई उपलब्ध गराउन सकेको छैन । 

क्लबको खर्च घटाउन सिंगल राउण्ड रोबिननै भएपनि लिग गर्ने गरि एन्फाले पछिल्लो समय आन्तरिक छलफललाई अघि बढाएको छ । सिंगल राउण्ड रोबिनमा लिग गर्दा क्लबको खर्च घट्ने र क्लबलाई लिग खेल्न मनाउन सजिलो हुने रणनीतिमा एन्फा देखिन्छ । सिंगल राउण्ड रोबिन भएको खण्डमा त्यसको प्रत्यक्ष असर खेलाडीमा पर्नेछ, खेलाडीले क्लबसँग थोरै समयको सम्झौता मात्र प्राप्त गर्नेछन् ।  

क्लबलाई मनाउन सिंगल राउण्ड रोबिनमा लिग खेलाउने विकल्पमा एन्फाले छलफल अघि बढाएको सन्दर्भमा फरवार्ड अन्जनले सामाजिक सञ्जालमार्फत कुनै पनि बाहानामा डबल लिगलाई सिंगल नगर्न सरोकारवाला निकायको ध्यानाकर्षण गराएका छन् । 

घरेलु फुटबलको देखिएको अन्यौलताका कारण अधिकांश राष्ट्रिय टिमका खेलाडी विदेश पलायन भएका छन् । देशमै रहेका फुटबल खेलाडी समेत पछिल्लो घटनाक्रमले निराश बनेका छन् । 
यसअघि फुटबल खेलाडी संघले एन्फा नेतृत्वसँग भेट गरि यथासिघ्र लिग फुटबल सुरु गर्न ध्यानाकर्षण गराएको थियो ।