काठमाडौं । फ्रेन्चाइज फुटबल नेपाल सुपर लिग (एनएसएल)को नयाँ सम्झौता अन्तिम चरणमा पुगेको छ । अखिल नेपाल फुटबल संघ (एन्फा)ले आफुसँग गरिएको पहिलो सम्झौता रद्ध गर्दै एनएसएलसँग नयाँ ढङ्गले सम्झौता गर्ने निर्णय गरेको थियो । सोही अनुसार एन्फा र एनएसएलबीचको नयाँ सम्झौताको तयारी अन्तिम चरणमा पुगेको हो ।
एनएसएलका एक अधिकारीले खेलपाटीलाई बताए अनुसार केही बुदाँमा टुङ्गो लाग्ने बित्तिकै नयाँ सम्झौताको काम सकिनेछ । सम्झौताको आधारभुत विषयमा एन्फा र एनएसएलबीच लगभग सहमती जुटिसकेको ती अधिकारीको दाबी छ ।
‘एक, दुई विषय टुङ्गिने चरणमा छ । केही दिनमा सकिने बित्तिकै नयाँ सम्झौता तयार हुन्छ । प्रतियोगिताको तयारी तिव्र गतिमा अघि बढ्छ ।’ ती अधिकारीले खेलपाटीसँग भने ।
नेपाली फुटबलको निकै महत्वकांक्षी परियोजना मानिएको एनएसएल एन्फामा नेतृत्व परिवर्तनसँगै अनिश्चित बनेको थियो । एन्फाले ए डिभिजनका चार क्लबसँग छलफल गरेर एनएसएलसँगको सम्झौता रद्ध गर्ने निर्णय गरेको थियो । तर चौतर्फी दबाबपछि एन्फा पुरानो सम्झौता रद्ध गरेर नयाँ सम्झौताका साथ प्रतियोगिता आयोजना गर्न दिन सकारात्मक देखिएको छ । सोही अनुसार एन्फा बैठकबाट निर्णय समेत गरिसकेको छ ।
पुरानो सम्झौताका कतिपय बुँदामा क्लबहरुको गम्भिर असहमती र केही बुँदामा प्रस्टता नदेखिएको कारण देखाउँदै एन्फाले एनएसएलसँग नयाँ सम्झौता गर्न चाहेको बताउने गरेको छ ।
पछिल्लो समय नयाँ सम्झौताको समय अवधि र रोयल्टीको विषयमा एन्फा र एनएसएलबीच नोक झोक चल्ने गरेको छ । सोही कारण नयाँ सम्झौतामा सहमती जुट्न सकेको थिएन । एन्फाले एनएसएल आयोजनाका लागि चार वर्षको समय दिने र प्रति वर्ष दुई करोडका दरले रोयल्टी माग गरेको छ ।
हरेक वर्षको रोयल्टीको रकम प्रत्येक वर्ष २० प्रतिशतले बढ्नुपर्ने एन्फाको शर्त छ । तर आयोजक टिमले एन्फाको माग पुरा गर्न नसकिने बताउँदै आएको छ । सोही कारण नयाँ सम्झौता टुङ्गिन पाएको छैन ।
घरेलु प्रतियोगिता नहुदाँ धेरै फुटबल खेलाडी विदेश पलायन हुने र छिमेकी भारतमा ‘खेप’ खेल्न जाने गरेका छन् । घरेलु फुटबललाई चलायमान बनाउन खेलाडीलाई कार्यक्रम र प्रतियोगिता दिनुपर्ने दबाबमा एन्फा छ । सम्झौतामा ढिलाई हुदाँ एनएसएल हुने÷नहुने अन्यौलता खेलाडी र फुटबल क्षेत्रमा अझपनि ब्याप्त छ ।
एनएसएलका एक अधिकारी यस वर्ष दोस्रो संस्करणको प्रतियोगिता हुने संकेत देखिएको बताउँछन् । ‘छलफल सकारात्मक ढङ्गलेनै अघि बढेको छ । केही दिनमा टुङ्गो लाग्छ । एनएसएलको आयोजनामा अब शंका गर्नुपर्ने ठाउँ देख्दिन ।’ उनी भन्छन् ।
एन्फाले फ्रेन्चाइज फुटबल एनएसएल आयोजनाका लागि असोज २३ देखि मंसिर २ गतेसम्मको समय दिएको छ । नयाँ सम्झौतामा अहिलेसम्म सहमती जुट्न नसक्दा प्रतियोगिता निर्धारित मितिमै आयोजना हुने सम्भावना कम छ ।
-1734842793.webp)
