काठमाडौं । नेपाली राष्ट्रिय क्रिकेट टोलीका तीव्र गतिका पूर्व बलर अमृत भट्टराई हाल अष्ट्रेलियामा बस्दै आएका छन् । भट्टराईले नेपालका लागि एक टी-ट्वान्टी अन्तराष्ट्रिय खेलेका छन् ।
नेपाली क्रिकेटमा लामो समय बिताएका भट्टराई नेपाली क्रिकेटमा भविष्य नदेखेर विदेशिएका एक पात्र हुन् । तर, भट्टराईले खेल्दा र हालको नेपाली क्रिकेटको अवस्थामा धेरै नै फरक रहेको छ ।
नेपाल क्रिकेट संघ (क्यान) ले हालै फ्रेन्चाइज क्रिकेट नेपाल टी-ट्वान्टी लिगको घोषणा गरेको छ । पहिलो संस्करणको प्रतियोगिता असोज ८ देखि कात्तिक ५ सम्म हुनेछ ।
नेपाल टी-ट्वान्टी लिगमा केन्द्रित रहदै नेपाली क्रिकेटबारे खेलपाटीका संवाददाता सागर अधिकारीले भट्टराईसँग कुराकानी गरेका छन् ।
क्यानले पहिलो पटक आयोजना गर्न लागेको नेपाल टी-ट्वान्टी लिगलाई कसरी हेर्नुहुन्छ ?
नेपाली क्रिकेटरका लागि यो राम्रो अवसर हो । यसले गर्दा खेलाडीको आर्थिक स्थितिमा समेत राम्रो मद्दत दिनेछ । यसले गर्दाले क्रिकेटमा लाग्न नयाँ पुस्तालाई धेरै नै प्रेरणा मिल्नेछ । जीवन चलाउनकै लागि म जस्तो विदेश आउनु नपर्ला कि भन्ने अपेक्षा छ ।
नेपाल टी-ट्वान्टी लिगको भविष्य कस्तो देख्नु हुन्छ ?
नेपालमा जुन किसिमको क्रिकेटलाई माया गर्ने समर्थकहरु हुनुहुन्छ , यसका कारण यस लिगको भविष्य राम्रो छ । तर, सँगै जुन किसिमको घरेलु संरचना स्थापित हुनु पर्ने हो तर त्यो नहुदा घरेलु खेलाडीबाट राम्रो खेल निरन्तर नआएर यो लिग नै कतै धरापमा पर्ला कि भन्ने डर चै रहेको छ । मल्टि डे क्रिकेटमा हाम्रा खेलाडी अभ्यस्त हुन जरुरी रहेको छ । त्यसपछि मात्र यस्ता लिग खेल्न तयार हुन्छन् । क्यानको लगानी पनि यस्ता प्रतियोगितामा भन्दा मल्टि डे क्रिकेटतर्फ नै रहनु पर्छ ।
तपाईले घुमाउरो रुपमा यस लिगको विरोध गर्नु भएको हो ?
विरोध होईन, म त भनिरहेको छु यस्ता लिग त राष्ट्रिय रुपमा मात्र नभएर हरेक प्रदेशमा हुनु पर्छ । मेरो भनाई टी-ट्वान्टीमा मात्र हामी बढी केन्दित भयौ कि भन्ने हो । हामी जबसम्म मल्टि डे क्रिकेटमा अभ्यस्त हुदैनौ तब सम्म यस्ता लिगले मात्र नेपाली क्रिकेटमा योगदान दिन कठिन छ ।
हामीले छिमेकी मुलुक भारतमा आईपीएलको जुन सफलता देखेका छौँ के त्यो नेपालमा सम्भव छैन त ?
सम्भव छ तर म फेरी पनि भन्छु पहिले हामी मल्टि डे क्रिकेटमा अभ्यस्त हुनै पर्छ । आईपीएलमा सहभागी हुने हरेक भारतीय खेलाडी त्यहाँको घरेलु मल्टि डे क्रिकेटमा भिजिसकेको हुन्छ । उसमा हरेक विदेशी खेलाडीलाई चुनौती दिन सक्ने क्षमता रहेको हुन्छ । उ राम्रो प्रदर्शनको योग्य रहन्छ तब भारतीय खेलाडी सफल हुन्छ आईपीएल त आफै सफल हुन्छनै । तर, हाम्रोमा भने अवस्था ठिक उल्टो छ ।
नेपाली क्रिकेट विकासका के गर्ने त ?
यस लिग त सुरु हुने पक्का नै भईसक्यो । यसलाई सफलताको शुभकामना रहेको छ । यस लिगलाई आईपीएलको लेभलमा ल्याउने क्यानको चाहना हो भने मल्टि डे क्रिकेट आयोजनामा ध्यानआकृष्ट हुन जरुरी छ । जब सम्म खेलाडीलाई मल्टि डे क्रिकेटमा राम्रो बनाउन सकिदैन तब सम्म यस्ता लिगको भविष्य यसै भन्न सकिन्न ।
-1732152881.jpg)
