पूरा हुँदैछ रोड्रीको वर्षौंदेखिको चाहना

काठमाडौं। स्पेनिस मिडफिल्डर रोड्रीको बार्सिलोनाबाट खेल्ने सपना अन्ततः पूरा हुने भएको छ। म्यानचेस्टर सिटीमा आफ्नो सफल यात्रा टुंग्याउँदै ३० वर्षीय रोड्री बार्सिलोनासँग नयाँ अध्याय सुरु गर्न तयार भएका छन्।

बार्सिलोना पुगेर रोड्रीले क्लबमा आबद्ध हुन पाउँदा आफू निकै उत्साहित रहेको बताएका छन्।

उनका लागि बार्सिलोनाबाट खेल्नु लामो समयदेखिको सपना थियो। अब त्यही सपनालाई वास्तविकतामा बदल्दै उनी क्याटलान क्लबको जर्सीमा मैदान उत्रिने तयारीमा छन्।

‘यहाँ आउन पाउँदा म निकै खुसी छु। बार्सिलोनाबाट खेल्नु मेरो सपना थियो,’ रोड्रीले क्लबमा पुगेपछि भने। बार्सिलोना र सिटीबीच करिब ६५ मिलियन पाउन्डको स्थानान्तरण शुल्कमा सहमति भएको बताइएको छ। रोड्रीले ला लिगा च्याम्पियनसँग चार वर्षको सम्झौतामा हस्ताक्षर गर्नेछन्।

रोड्रीलाई भित्र्याउन बार्सिलोनाले यसअघि ३८.५ मिलियन पाउन्डको प्रस्ताव गरेको थियो। तर‚ सिटीले उक्त प्रस्ताव अस्वीकार गरेको थियो। त्यसपछि बार्सिलोनाले आफ्नो प्रस्ताव सुधार गर्दै स्पेनिस स्टारलाई क्लबमा ल्याउन सफल भएको हो। यस दौडमा बार्सिलोनाले रियल मड्रिडलाई समेत पछि पारेको छ।

‘राष्ट्रिय टोलीका धेरै सहकर्मी बार्सिलोनामा छन्। उनीहरूसँग पुनः सहकार्य गर्दै क्लबका लागि च्याम्पियन्स लिगसहित सबै मुख्य उपाधि जित्नु नै मेरो लक्ष्य हो,’ उनले भने।

सन् २०१९ मा एट्लेटिको मड्रिडबाट सिटी पुगेका रोड्रीले क्लबका लागि २९८ खेल खेले। सिटीसँगको यात्रामा उनले चार प्रिमियर लिग, एक च्याम्पियन्स लिग, दुई एफए कप र तीन ईएफएल कपसहित १२ मुख्य उपाधि जिते।

२०२४ को बालोन डी’ओर विजेता रोड्री चोटबाट फर्किएपछि पुनः उत्कृष्ट लयमा देखिएका थिए। स्पेनको विश्वकप यात्रामा महत्त्वपूर्ण भूमिका निर्वाह गरेका उनले प्रतियोगिताको सर्वोत्कृष्ट खेलाडीको पुरस्कारसमेत जितेका थिए।