काठमाडौं । प्रथम मिडिया कप फुटसल प्रतियोगिताको सेमिफाइनल समिकरण पूरा भएको छ ।
पत्रकार महासंघको ६७ औं स्थापना दिवसका अवसरमा आयोजित प्रतियोगिताको अन्तिम ४ मा पुग्ने टोलीको टुंगो लागेको हो ।
सेमिफाइनल पुग्ने टोलीमा न्युज २४ टेलिभिजन, टिम शिलापत्र, पत्रकार महासंघ कास्की शाखा र पत्रकार महासंघ ललितपुर शाखा रहेका छन् ।
पहिलो क्वार्टरफाइनलमा न्युज २४ ले नेपाल खेलकुद पत्रकार मञ्चलाई ५–३ गोल अन्तरले हरायो । त्यस्तै शिलापत्रले दोस्रो क्वार्टरफाइनलमा फोटो जर्नलिष्ट क्लवलाई ४–३ ले पराजित गर्यो ।
पत्रकार महासंघ कास्की शाखाले नेपाल चलचित्र पत्रकार संघलाई १०-२ गोलले हरायो ।
प्रतियोगिताको अन्तिम क्वार्टरफाइनलमा महासंघको ललितपुर शाखाले नयाँ पत्रिका दैनिकलाई ४–१ ले पाखा लगायो ।
अब पहिलो सेमिफाइनलमा भोलि न्युज २४ र कास्की तथा दोस्रोमा टिम शिलापत्र र ललितपुरबीच प्रतिस्पर्धा हुनेछ ।
प्रतियोगिताको उद्घाटन पत्रकार महासंघका केन्द्रीय अध्यक्ष विपुल पोखरेलले रेफ्रीलाई बल हस्तान्तरण गरेर गरेका थिए ।
उद्घाटन खेलमा नेपाल खेलदकुद पत्रकार मञ्चले हाम्रो सञ्चार डट कमलाई ५–३ ले हराएको थियो ।
प्रतियोगितामा १६ टोलीको सहभागिता रहेको छ । नकआउटका आधारमा खेलाइएको प्रतियोगिताको विजेताले २५ हजार र उपविजेताले १५ हजार नगद प्राप्त गर्नेछन् ।
