काठमाडौं । एएफसी कप छनोटको पहिलो खेलका लागि नेपालको मछिन्द्र फुटबल क्लब आज (मंगलबार) मैदान उत्रदैछ । श्रीलंकाको क्लब ब्लु स्टारसँग खेल्दै मछिन्द्रले एएफसीको सबैभन्दा ठुलो क्लब प्रतियोगिताको सुरुवात गर्दैछ ।
विजेता टिमले दोस्रो खेलमा भारतको मोहन बगानसँग खेल्नेछ । छनोटलाई भारतसम्म पुर्याउन मंगलबारको खेल महत्वपूर्ण छ । लगातार दोस्रो पटक शानदार तरिकाले लिग उपाधि जितेको मछिन्द्रको मनोबल उच्च छ । पछिल्लो समय घरेलु फुटबलमा नयाँ शक्ति बनेर उदाएको मछिन्द्रले राम्रै समर्थक समेत कमाएको छ । राष्ट्रिय फुटबल टिमका स्टार खेलाडीले भरिने गरेको मछिन्द्रले घरेलु मैदानमा राम्रै दर्शकको साथ पाउने आश गरेको छ ।
खेल हेर्न चाहने दर्शकले रंगशाला परिसरमै गएर टिकट काट्न सक्नेछन् । मछिन्द्रको लोकप्रियता देखेर गोक्यो इभेन्ट्सले राम्रै मुल्य तिरेर टिकट व्यवस्थापनको जिम्मेवारी लिएको छ । टिकटको मुल्य ५ सय र हजार राखिएको छ ।
कार्यक्रमलाई दर्शक सहित भब्य बनाउन गोक्यो इभेन्टले खेल अघि सांगेतिक प्रस्तुतीको कार्यक्रम समेत राखेको छ । खेल अघि लोकप्रिय पप स्टार सबिन राईले प्रस्तुती दिनेछन् । युवामाझ लोकप्रिय गायको छबी बनाएका सबिनको सांगेतिक प्रस्तुतीले दर्शकलाई मैदानसम्म तान्ने अपेक्षा गरिएको छ । गोक्यो इभेन्टले यसअघि महङ्गो मुल्यमा ए डिभिजन लिगको समेत टिकट व्यवस्थापनको जिम्मेवारी लिएको थियो ।
सबिन सहितको सांगेतिक प्रस्तुती दिउँसो २ बजे सुरु हुनेछ । त्रिपुरेश्वरको दशरथ रंगशालामा मछिन्द्रको टिम साँझ ५ बजेपछि मात्र मैदान उत्रनेछ । दर्शकका लागि मध्यान्न १२ बजेदेखिनै रंगशालाको गेट खुल्ला रहने अखिल नेपाल फुटबल संघ एन्फाले जनाएको छ ।
-1736873565.JPG)
