होरा ईस्पोर्ट्स फाइनलमा

काठमाडौं। नेपालको होरा ईस्पोर्ट्सले फ्रान्सको पेरिसमा जारी ईस्पोर्ट्स विश्वकपअन्तर्गत पब्जी मोबाइल विश्वकपमा ठूलो सफलता हात पारेको छ। समूह ‘बी’ को शीर्ष पाँचमा रहँदै होरा सोझै ग्रान्ड फिनालेमा पुग्न सफल भएको हो।

समूहमा चौथो भएको होराले ५७ हजार ५०० डलर पुरस्कार पनि पक्का गरेको छ। आइतबार सकिएको समूह चरणमा होराले ९८ अंकसहित चौथो स्थान हासिल गरेको हो। टोलीले दुई दिनमा एक चिकेन डिनरसहित ६१ किल र ३७ प्लेसमेन्ट पोइन्ट जोडेको थियो।

होराले पहिलो दिन नै प्रभावशाली सुरुआत गरेको थियो। सुरुआती दुई खेलमध्ये दोस्रो खेलमा चिकेन डिनर जित्दै टोलीले ५९ अंक जोडेर तेस्रो स्थानमा दिनको खेल टुंग्याएको थियो। दोस्रो दिन भने ६ खेलबाट थप ३९ अंक बटुल्दै चौथो स्थानमा रहन सफल भयो।

अन्तिम खेलअघि शीर्ष पाँचमा रहेको होरा अन्तिम खेलपछि छैटौं स्थानमा झरे पनि समग्र अंकका आधारमा शीर्ष पाँचमै रह्यो। यससँगै उसले सर्भाइभल स्टेज खेल्नुपर्ने झन्झटबाट समेत जोगिँदै सिधै ग्रान्ड फिनालेको टिकट काटेको हो।

समूह ‘बी’ बाट भाइटालिटी १४८ अंकसहित शीर्ष स्थानमा रहँदा आईडीए, एसटुजी र गडलाइक पनि होरासँगै फाइनलमा पुगेका छन्।

समूह ‘ए’ बाट भने फोर थ्राइभ, ओरानगुटान, अउरोरा, टिम फ्ल्यास र निग्मा ग्यालेक्सीले शीर्ष पाँचमा रहँदै फाइनलमा स्थान बनाइसकेका छन्। यससँगै ग्रान्ड फिनालेका १६ मध्ये १० टोलीको टुंगो लागिसकेको छ।

अब दुवै समूहका छैटौंदेखि १३औँ स्थानमा रहेका १६ टोलीले अगस्ट ११ र १२ मा सर्भाइभल स्टेज खेल्नेछन्। त्यहाँबाट शीर्ष ६ टोलीले ग्रान्ड फिनालेको बाँकी स्थान पूरा गर्नेछन्। समूह चरणका अन्तिम तीन स्थानमा रहेका ६ टोली भने प्रतियोगिताबाट बाहिरिएका छन्।

अगस्ट १४ देखि १६ सम्म हुने ग्रान्ड फिनालेमा होरा विश्वका उत्कृष्ट १६ टोलीसँग उपाधिका लागि भिड्नेछ। उपाधि जित्ने टोलीले मात्रै ५ लाख अमेरिकी डलर पाउनेछ भने उपविजेताले २ लाख ५० हजार र तेस्रो हुने टोलीले १ लाख ५० हजार डलर प्राप्त गर्नेछन्।