एकाटेरिना र जेन्तालाई एशिया ट्राईयाथलनको उपाधि

पोखरा । जापानका जेन्ता युचिदा र काजाकिस्तानकी एकाटेरिना शाबलिनाले एशिया ट्राईयाथलन कप तथा दक्षिण एशिया च्यामिपयनसिपको उपाधि जितेका छन् ।

पोखराको फेवातालमा शनिबार पुरुषतर्फ जेन्ता र महिलातर्फ एकाटेरिनाले उपाधि जितेका हुन् ।

७५० मिट पौडी, २० साईक्लिङ्ग र ५ कि.मि. दौडको दुरी जेन्ताले ५३ मिनट १४ सेकेन्ड तथा एकाटेरिनाले १ घन्टा ०२ मिनेट २० सेकेन्डमा पूरा गर्दै उपाधि उचालेका हुन् ।

पुरुष तर्फ दोश्रो स्थानमा जापानकै क्योतारो ओसिकावा र तेश्रो स्थानमा अष्ट्रियाका लिओन पगर रहे । क्योतारोले उक्त दुरी ५३ मिनेट२२ सेकेन्डमा र लिओनले ५३ मिनेट ३६ सेकेन्डमा पूरा गरे ।

प्रतियोगिताको महिला तर्फ जापानकी हिराकु फुकुओकाले १ घन्टा २ मिनेट ५३ सेकेन्डका साथ दोश्रो र काजाकिस्तानकी नादेज्दा बेक्मागनबेताभाले १ घन्टा ४ मिनेट १४ सेकेन्डका साथ तेश्रो भईन् ।

शीर्ष तीन स्थान प्राप्त गर्ने खेलाडीहरुले मेडल, ट्रफी, प्रमाण पत्रका साथै नगद ६३० डलर, ५२५ डलर र ४२० डलर प्राप्त गरे । यस्तै चौथोले ३१५ डलर र पाँचौले २१० डलर प्राप्त गरे ।

आदर्श र प्रग्न्यालाई दक्षिण एशियाली उपाधि 

सोही क्रममा भएको दक्षिण एशियाली ट्राइयाथलन च्याम्पियनसिपको उपाधी भारतका आदर्श मुरलीधरण नायर सिनिमोल र प्रज्ञा मोहनले प्राप्त गरेका छन् । आदर्शले ५९ मिनेट १० सेकेन्डमा दुरी पूरा गर्दै उपाधी जितेका हुन् । यस्तै पहिलो संस्करणकी बिजेता प्रग्न्याले १ घन्टा ६ मिनेट २२ सेकेन्डमा दुरी पूरा गर्दै उपाधि जितेकी हुन् । उनले आफ्नो समयमा अघिल्लो संस्करणमा भन्दा ३ मिनेटले सुधार गरेकी हुन् ।

भारतिय खेलाडीहरुको दवदवा रहेको स्पर्धामा राहुल धनजी सिन्धेले ५९ मिनेट ४२ सेकेन्डका साथ रजत र विश्वनाथ यादवले ५९ मिनेट ४३ सेकेन्डका साथ कास्य पाए । यस्तै महिला तर्फ मानषी मोईतेले १ घन्टा ८ मिनेट १८ सेकेन्डका साथ रजत र संजना जोशीले १ घन्टा १० मिनेट ८ सेकेन्डका साथ कास्य पाईन् ।

राष्ट्रियमा बशन्त र सोनी च्याम्पियन 
राष्ट्रिय तर्फको प्रतिस्पर्धामा सेनाका बशन्त थारु र एपिएफकी सोनी गुरुङले जित स्वर्ण हात पारे । थारुले १ घन्टा ३ मिनेट २ सेकेन्डमा दुरी पूरा गरे भने सोनीले १ घन्टा ११ मिनट १७ सेकेन्डमा दुरी पूरा गरिन् । दोश्रो स्थानमा रहेका दिपेश चौधरीले १ घन्टा ५ मिनेट ६ सेकेन्ड र तेश्रो स्थानमा रहेका मुकेश थारुले १ घन्टा ७ मिनेट ५५ सेकेन्डमा दुरी पूरा गरे ।

यस्तै महिला तर्फ केशरी थापा मगरले १ घन्टा २१ मिनेट २ सेकेन्डका साथ रजत र सस्तिका भण्डारीले १ घन्टा ३२ मिनेट ११ सेकेन्डका साथ कास्य पाए ।

प्रतियोगितामा जापान, अष्ट्रिया, पोल्याण्ड, काजाकिस्तान, भारत, बंगलादेश र नेपाल गरि ७ राष्ट्रका पुरुष तर्फ ३७ र महिला तर्फ २० गरि ५७ खेलाडीहरुले सहभागिता जनाएका थिए ।

बिजयी खेलाडीहरुलाई युवा तथा खेलकुद मन्त्री महेश्वर जंग गहतराज अथक, राखेपका निमित्त सदस्य सचिव कुलबहादुर थापा, सदस्य राजेश गुरुङ्ग, गण्डकी प्रदेश सदस्य सचिव तेज गुरुङ्ग, प्रदेश साँसद एवं संघका उपाध्यक्ष दीपक कोईराला लगायतले पुरस्कार वितरण गरेका थिए ।