आहा राराको फाइनल : मनाङ आफ्नो ५० औं खेल खेल्दै

पोखरा । हुने नहुने शंकाबीच, गर्ने नगर्ने दुविधाबीच अन्तत: आहा रारा गोल्डकप ०७८ शनिबार आफ्नो अन्तिम खेलमा आइपुगेको छ । त्यो भनेको फाइनल नै भयो । आजको फाइनलमा भिड्दै छन्, प्रतियोगिताको इतिहासकै सबैभन्दा सफल टिम मनाङ मर्स्याङ्दी र एपीएफ । मनाङकै सर्वाकालीन सफल कप्तान कुमार थापाको प्रशिक्षणमा रहेको एपीएफ आफै पनि अहिले त्यस्तो स्थितिमा छ, जहाँ उसले भन्न सक्ने छ, हामी पनि केही गर्न सक्षम छौं ।

सहिद स्मारक लिग ‘ए’ डिभिजनका पछिल्ला केही संस्करणमा अधिकांस समय रेलिगेसनबाट बच्न नै समय खर्चेको एपीएफ सायद कुमार आएयता केही हदसम्म अगाडि बढ्ने मनसायमा छ । जुन एपीएफ र नेपाली फुटबलका लागि धेरै राम्रो हो । अन्यथा लिगमा एपीएफबारे सुन्नु पर्ने भनेकै यसले यस्तो खराब गर्‍यो, यस्तो नराम्रो गर्‍यो भन्ने नै त थियो । विश्वास गरौं, एपीएफले अब यस्तो गर्ने छैन् र सफा फुटबल खेल्ने प्रयास गर्नेछ, चाहे त्यो मैदानमा होस अथवा मैदान बाहिर ।

एपीएफले आहा रारामा फाइनल खेल्न लागेको यो दोस्रो पल्ट हो । वर्ष ०६४ मा एपीएफ फाइनल त पुगेको थियो, तर उपाधिको भिडन्तमा पुलिसको हातबाट पराजित रह्यो । त्यो अर्थमा एपीएफ दोस्रो पल्ट आहा राराको फाइनल खेल्दैछ । एपीएफले यो प्रतियोगिता खेल्न थालेको वर्ष ०६१ देखि मात्र हो । त्यो वर्षदेखि उसले सात संस्करण लगातार खेलेको थियो, त्यसपछि सहभागिता नियमित रहेन् । अब यसपल्ट फाइनल पुगेपछि एपीएफले चाहने छ, सहभागितामा निरन्तरता ।

यो त भयो, एपीएफको कुरा । यसपल्टको फाइनलमा सबैको ध्यान भने मनाङमै रहनेछ र यसको प्रमुख कारण त आहा रारामा रहेको क्लबको विरासत नै हो । सायद धेरैले चाहने छ, उपाधि मनाङनै जितोस, किनभने यसले आहा राराकै इतिहासमा एउटा कोशेढुंगा उपलब्धी स्थापित हुनेछ र यसमा मनाङलाई पनि असाध्यै गर्व हुनेछ । मनाङ आहा राराको इतिहासमै सबैभन्दा समृद्ध इतिहास भएको क्लब हो, त्यसो भन्दा यो जत्तिको सफल क्लब यो प्रतियोगितामा अर्को छैन् ।

आजको फाइनल जिते, मनाङ आहा रारामा सातौं पल्ट विजेता हुनेछ र बन्ने छ, सर्वाधिक उपाधि जित्ने टिम । अहिलेसम्म मनाङ र पुलिसले समान छ छ पल्ट उपाधि जितेको छ । यसपल्ट मनाङले खेल्न लागेको यो १२ औं फाइनल हो । त्यो अर्थमा पनि यो टिम प्रतियोगितामा सर्वाधिक फाइनल खेल्ने टिम भयो नै । मनाङले छ पल्ट उपाधि मात्र जितेको छैन्, यसअघि पाँच पल्ट फाइनलमा हार पनि बेहोरेको छ । मनाङले ती सबै फाइनल जितेको भए ?

फुटबलको मज्जा भनेको यही हो, सबैले सबथोक चाहेर कहाँ पूरा हुन्छ र ? आजको फाइनलको नतिजा जे जस्तो सुकै होस, यही खेलकै क्रममा एउटा अर्को ऐतिहासिक कोशेढुंगा उपलब्धी भने स्थापित हुनेछ र त्यो हो, मनाङका लागि यो खेल प्रतियोगितामा उसले खेलेको ५० औं खेल हुनेछ । अर्थात आज मनाङ आफ्नो अर्धशतकीय खेल खेल्दैछ । यसको अर्थ मनाङ आहा रारा गोल्डकपको इतिहासमा सर्वाधिक खेल खेल्ने टिम पनि हो र यो उपलब्धी उसले किन चुम्यो भने यो प्रतियोगिताको सबैभन्दा सफल टिम पनि त हो । 
एउटा प्रश्न भने बाँकी नै छ, कतै मनाङको यस ऐतिहासिक क्षणलाई उसकै पुरानो कप्तान कुमारको एपीएफले किरकिरा पार्ने त होइन ?