मरिससविरुद्ध खेल्न नेपाल तयार

काठमाडौं । राष्ट्रिय फुटबल टिमका प्रशिक्षक किरण श्रेष्ठले अफ्रिकी मुलुक मरिससविरुद्ध मैत्रीपूर्ण खेलका लागि आफुहरु तयार रहेको बताएका छन् ।

शनिबार हुने पहिलो मैत्रीपूर्ण खेलअघिको पत्रकार सम्मेलनमा श्रेष्ठले पहिलो खेलका लागि नेपालले सम्पूर्ण तयारी पुरा गरेको बताएका हुन् ।

पहिलो मैत्रीपूर्ण खेलअघि शुक्रबार भएको पत्रकार सम्मेलनमा प्रशिक्षक श्रेष्ठ र कप्तान किरण लिम्बु उपस्थित थिए ।
प्रशिक्षक श्रेष्ठले अघिल्ला खेलमा देखिएको गल्तीलाई सुधार गरेर मरिससविरुद्धको खेलमा उत्रने बताए । 

‘अघिल्ला खेलका गल्तीलाई सुधार गरेर राम्रो प्रर्दशन गर्ने अपेक्षा गरेका छौं ।’ उनले पत्रकार सम्मेलनमा भने ।

एसियन कप छनोटको तयारी स्वरुप राष्ट्रिय टिमलाई व्यस्त राख्न मैत्रीपूर्ण खेलको आयोजना गरिएको हो । 

मुख्य प्रशिक्षक अब्दुल्लाह अलमुताइरीले मरिससविरुद्ध नेपालको दुई टिम तयार गरेका छन् । बन्द प्रशिक्षणमा रहेका अधिकांश खेलाडीलाई समावेश गर्दै अलमुताइरीले टिम निर्माण गरेका छन् । 

राष्ट्रिय टिमका १२ खेलाडीलाई दुवै टिममा राख्दै अलमुताइरीले टिम निर्माण गरेका छन् । उनले मरिससविरुद्ध नतिजा भन्दा प्रर्दशनमा आफु केन्द्रित हुने बताईसकेका छन् । 

फिफा डेट अनुसार खेल्न लागिएको मैत्रीपूर्ण खेलमा नेपालले आफुभन्दा तल्लो वरियताको राष्ट्रसँग खेल्न लागेको छ । 

फिफा वरियतामा मरिसस १ सय ७२ औं स्थानमा छ । नेपाल फिफा वरियताको १ सय ६९ औं स्थानमा छ । 

नेपालले मरिसससँग शनिबार पहिलो र मंगलबार दोस्रो मैत्रीपूर्ण फुटबल खेल्नेछ । मरिससविरुद्ध सकारात्मक नतिजा निकाल्दै फिफा वरियतामा सुधार गर्ने नेपालको लक्ष्य छ । 

राष्ट्रिय फुटबल टिमका कप्तान किरण चेम्जोङले मैत्रीपूर्ण खेल भएपनि सकारात्मक नतिजाको अपेक्षा रहेको बताए ।

मरिससविरुद्ध खेल्न नेपाली टिम तयार रहेको उल्लेख गर्दै मैत्रीपूर्ण खेलबाट टिमलाई केही सिक्न मिल्ने उल्लेख गरे ।

‘हामी इतिहासमा पहिलो पटक अफ्रिकी मुलुकसँग खेल्दैछौं । यो हाम्रा लागि छुट्टै अनुभव हुनेछ ।’ उनले भने ।

मरिसस फुटबल टिमका मुख्य प्रशिक्षक टोनी फ्रान्कोइसले नेपालविरुद्ध राम्रो प्रर्दशन गर्ने अपेक्षा गरेको बताए ।  

‘पहिलो पटक नेपाल आएका हौं । नेपालविरुद्ध राम्रो खेल्ने अपेक्षा छ ।’ उनले भने ।