आहा रारामा पुलिस र मनाङको ‘ब्लकबस्टर’ खेल

काठमाडौं । पुलिसविरुद्ध मनाङ मर्स्याङ्दी । नेपाली घरेलु फुटबलले दिन सक्ने सबैभन्दा आकर्षक र सनसनीपूर्ण खेलमा पर्छ, यो । पछिल्ला साढे दुई दशक जतिको समय यिनै दुई टिमबीच घरेलु नेपाली फुटबलमा जोडदार प्रतिस्पर्धा चलिरहेको छ । अचेल पुलिस त्यस्तो टिम रहेन्, जस्तो पहिले थियो । पुलिस आजभोलि कस्तो टिम भएको छ, सहिद स्मारक लिग ए डिभिजन ०७८ को अंक तालिका हेरे पुग्छ । पुलिस अहिले तत्काल ११ औं स्थानमा छ, खालि सात अंकमा ।

पुलिसमाथि रेलिगेसन डर ? भन्न अप्ठ्यारो लाग्छ, तर स्थिति त यस्तै हो । मनाङको स्थिति भने ठीकठीकै चलिरहेको छ । यो यस्तो टिम हो, जसले कुनै पनि उपाधिका लागि बलियो दावेदारी प्रस्तुत गरेर भने त्यो ठीकठीकैको प्रदर्शन न हो । लिगमा मनाङ भने १९ अंकमा दोस्रो स्थानमा छ । लिग उपाधिको होडमा मछिन्द्रलाई कुनै टिमले बलियो चुनौती पेस गर्न सक्छ भने त्यो खालि मनाङ मात्र रहेको छ । यो भयो, लिगको समीकरणको आधारमा तत्कालको स्थिति ।

जति जति बेला यी दुई टिम पोखरामा भिड्ने गर्छन्, अनि अवसर हुनु पर्छ, आहा रारा गोल्डकप, त्यसको कुरै बेग्लै । यो ‘ब्लकबस्टर’ खेल हुने गर्छ । अझ ठ्याक्कै भन्दा वर्ष ०७८ मा नेपाली घरेलु फुटबलको सबैभन्दा पछ्याउन लायक र हेर्नै पर्ने कुनै खेल छ भने भने यही हो । आहा राराको इतिहासनै पल्टाउने हो भने पनि यी दुई क्लब सबैभन्दा सफल छन् । दुवैले छ छ पल्ट उपाधि जितेको छ । अनि त्यस बाहेक फाइनलमै खेलेको पनि पुलिसले चार पल्ट, मनाङले पाँच पल्ट ।

फेरि पुलिस र मनाङ आहा राराका त्यस्ता दुई टिम हुन्, जसले सुरुदेखि लगभग सबै संस्करणमा खेलेको छ, एकाध अपवाद बाहेक । यसपल्ट पुलिसले आहा राराको आफ्नो पहिलो खेलमा हिमालयन शेर्पालाई हराएको थियो । यो जित केही हदसम्म कठिन रह्यो, किनभने यो खेल टाइब्रेकरमा गएको थियो र जित सडनडेथमै मात्र प्राप्त भएको थियो । तर त्यस खेलमा पुलिसको प्रदर्शन धेरै अर्थमा राम्रो थियो, लिगमा गरिरहेको प्रदर्शन भन्दा राम्रो ।

अर्कोतर्फ मनाङ भने यसपल्ट पहिलो पल्ट खेलिरहेको छ, सिधै क्वाटरफाइनलमा । तर पोखरा रंगशालामा पछिल्लो समय प्राप्त जितको ह्याट्रिकले मनाङ पक्कै पनि उत्साहित हुनु पर्छ, किनभने लिगमा यो मैदानलाई आफ्नो घर बनाएर खेल्दा मनाङले सबै तीन खेलमा जित निकालेको छ । यी तीनै खेलमा मनाङले जित मात्र निकालेको छैन्, राम्रो प्रदर्शन पनि गरेको छ, विशेषत: च्यासलविरुद्ध प्राप्त पाँच गोलको आरामदायी जितमा ।

फेरि आहा राराकै फर्कने हो भने पुलिस र मनाङ यो प्रतियोगितामा सर्वाधिक खेल खेल्ने टिम हुन् । हिमालयनविरुद्धको यसपल्टको पहिलो चरणको जितसँगै पुलिसले प्रतियोगिताको इतिहासमै आज ४५ औ खेल खेल्दै । यही पुलिसको सामना गर्दा यो मनाङको ४८ औं खेल हुनेछ । अनि यी दुईबीच एक आपसमा आहा रारामा अहिलेसम्म आठ खेल भएका छन् । त्यसमा मनाङ पाँच खेलमा विजयी रहेको छ भने पुलिस तीनमा । आज के हुनेछ त ? अनुमान गर्न गाह्रै छ ।