'ए' डिभिजन लिग : के भन्छन् कप्तान र प्रशिक्षक ?

काठमाडौं । सहिद स्मारक 'ए' डिभिजन लिग फुटबल भोलि शुक्रबारबाट सुरु हुँदैछ ।

अखिल नेपाल फुटबल संघ (एन्फा) ले बिहीबार पत्रकार सम्मेलन गर्दै लिगको सम्पूर्ण तयारी सकिएको जनाएको छ ।

त्रिपुरेश्वरस्थित दशरथ रंगशालामा हुने उद्घाटन खेलमा सातदोबाटो युथ क्लब र फ्रेन्ड्स क्लबबीच प्रतिस्पर्धा हुनेछ ।

उद्घाटन खेल फ्लड लाइटमा खेलाईने छ । उक्त खेल अपरान्ह ४:४५ बजे सुरु हुनेछ ।

दोस्रो दिनबाट हरेक दिन दुई खेलहरु हुने छन् ।

कुल ९१ खेल हुने लिगमा 'ए' डिभिजनका १४ क्लबले प्रतिस्पर्धा गर्ने छन् ।

यस पटकको लिगको पुछारका दुई टिम रेलिगेसनमा पर्दै 'बी' डिभिजनमा झर्ने छन् ।

अघिल्लो सिजनको उपाधि मछिन्द्र क्लबले जितेको थियो ।

यस पटकको लिग विजेताले ७५ लाख पाउने छन् ।

यस्तै उपविजेताले ५० लाख प्राप्त गर्दा तेस्रो हुनेले २५ लाख पाउने छन् ।

हरेक खेलको विजेताले ५० हजार पाउने छन् । खेल बराबरीमा सकिए दुबै टोलीले २५/२५ हजार पाउने छन् ।

लिगको पूर्व सन्ध्यामा सहभागी टिमका प्रशिक्षक र कप्तानले आफ्नो टोलीको तयारीबारे जानकारी दिएका छन् ।

प्रि-म्याच कन्फरेन्समा बोल्दै लिग खेल्ने अधिकांस टिमका प्रशिक्षक र कप्तानले मुख्य लक्ष्य उपाधि जित्नु रहेको बताएका छन् ।  

के भन्छन् कप्तान र प्रशिक्षक ?

प्रवेश कटुवाल : मछिन्द्र फुटबल क्लब (प्रशिक्षक)

पक्कै पनि डिफेन्डिङ च्याम्पियन भएर नै बलियो भएको हो । त्यसमाथि हामीले दुई चारजना युवा बलिया खेलाडी थपेका कारणले पनि बलियो देखिएको हो । पक्कै पनि उपाधि जोगाउनै गाह्रो हुन्छ भनेर फरवार्ड लाइनमा अलि बढी खेलाडी राखेका छौ ।

सुजल श्रेष्ठ : मछिन्द्र क्लब (कप्तान)

लिग जित्न गाह्रो छ । यस पटक उपाधि जोगाउनेछौ ।

राजेन्द्र तामाङ : मनाङ मर्स्याङ्दी क्लब (प्रशिक्षक)

तयारी कात्तिक ३ गतेबाट सुरु गरेको र धेरै कुराको कन्सिडर गरेर अघि बढेका छौँ । टिममाथि दवाव पनि छ । तर टिम राम्रो छ । उपाधि जित्नकै लागि तयारी भएको छ ।

विमल राना : मनाङ मर्स्याङ्दी क्लब  (कप्तान)

टिम राम्रो छ । गत सिजनमा भाग्यले साथ दिएन । यस पटक अघिल्ला गल्तिहरु सुधारेर अघि बढ्छौ । उपाधि जित्ने उदेश्य रहेको छ ।

उर्जन श्रेष्ठ : थ्री स्टार क्लब (प्रशिक्षक)

लक्ष्य लिगको उपाधि जित्ने हो । सहभागि सबै टिम बलिया छन् । अन्य टिमको प्रदर्शन हेरेरै थाहा हुन्छ ।

बिक्रम लामा : थ्री स्टार क्लब (कप्तान)

तयारी राम्रो छ । टेक्निकल्ली तथा फिजिकल्ली हाम्रो तयारी राम्रो छ । टिमले प्रदान गरेको सुविधामा सन्तुष्ट छौ ।

विष्णु गुरुङ : संकटा क्लब (प्रशिक्षक)

सबै टिमको तयारी राम्रै भएको छ । हाम्रो तयारी पनि राम्रो छ । हाम्रो लक्ष्य भनेको प्रत्येक दिनको प्रदर्शनको आधारमा निर्धारण हुन्छ ।

रवि सिलवाल : संकटा क्लब (कप्तान)

छोटो समयमा राम्रो तयारी भएको छ । आफ्नै मैदान भएर तयारी गर्न सजिलो भएको छ । यस पटक राम्रो परिणाम आउनेमा आशावादी छु ।

बालगोपाल साहुखल : च्यासल युथ क्लब (प्रशिक्षक)

टोलीमा युवा खेलाडीहरु छन, इनरजेटिक खेलाडीहरु छन् । टिम विल्डअपमा काम गरिरहेको छु । टिमबाट धेरै अपेक्षा छैन । लिगको मध्यसम्म पुग्ने लक्ष्य छ । च्यासलमा सन्तोष साहुखल पनि जोडिनेछन् तर अहिल्यै उनी आउदैनन ।

विराज महर्जन : च्यासल युथ क्लब (कप्तान)

टिममा युवा खेलाडीहरु छन् । लिग चुनौतिपूर्ण नै छ । तर सबैकुरालाई मिलाएर अघि बढिरहेको छौ । शीर्ष चारसम्म पुग्ने लक्ष्य छ ।

सनोज श्रेष्ठ : ब्रिगेड ब्वाईज क्लब (प्रशिक्षक)

पहिला भन्दा राम्रो प्रदर्शन गर्ने योजना छ । राम्रो फुटबल खेल्ने छौ ।

अनिल गुरुङ : ब्रिगेड ब्वाईज क्लब  (कप्तान) पहिला भन्दा राम्रो टिम छ । युवा खेलाडीहरु छन् । नतिजा राम्रो हुन्छ होला ।

अनन्तराज थापा : नेपाल पुलिस क्लब (प्रशिक्षक)

हामी जहिले पनि तयार छौ । हाम्रो नियमित अभ्यास हुन्छ । यसका लागि हामी तीन चार महिनादेखि तयारी गरिरहेका छौ । विभागिय टोलीको लक्ष्य जहिले पनि उपाधि जित्ने नै हुन्छ । यस पटक युवा खेलाडीहरु छन् केही सरप्राइज हुन सक्छ । अरु टिमले विदेशी खेलाडी राख्दा हाम्रो नियमित तयारीले त्यसलाई म्याच गर्न सक्छ होला ।

राम वाजी : नेपाल पुलिस क्लब (कप्तान)

तयारी नियमित रुपमा भइरहेको छ र तयारी राम्रो छ । पहिलो पटक कप्तान बन्दा जिम्मेवारी बढेको छ । लक्ष्य उपाधि जित्ने नै हो तर शीर्ष तीन स्थानमा रहनुनै हो ।

राजु तामाङ :  त्रिभुवन आर्मी क्लब (प्रशिक्षक)

तयारी राम्रो छ । लक्ष्य भनेको उपाधि जित्नु नै हो । नवयुग श्रेष्ठ घाइते भएपनि दवाव बढेको छ । तर अरु राम्रा खेलाडीहरु पनि छन् । जगजित श्रेष्ठ पनि आइरहेको छ र उसको अभ्यास हेरेर निर्णय लिन्छौ ।

भरत खवास :  त्रिभुवन आर्मी क्लब (कप्तान)

तयारी राम्रो छ । नवयुग भएन भने पक्कै पनि समस्या हुन्छ तर यो अरु खेलाडीको लागि मौका पनि हुन सक्छ । लक्ष्य भनेको लिगको च्याम्पियन बन्ने हो । अघिल्ला कमिकमजोरी सुधारेर अगाडी बढ्ने हो ।

मृगेन्द्र प्रसाद मिश्र : फ्रेन्ड्स क्लब (प्रशिक्षक)

हामीले ४० दिन जतिको अभ्यास गरेका छौ । हाम्रो पहिलो उदेश्य भनेको सुरक्षित हुने, रेलिगेसनबाट बच्ने अनि त्यपछि छैठौ सातौसम्म आउने रहेको छ । सात्तदोबाटो बलियो छ, नयाँ क्लब र नयाँ जोसका साथ आएको छ ।

सुरज विक : फ्रेन्ड्स क्लब (कप्तान)

लिगमा सहभागि सबै टिममाथि दवाव छ । हामी सम्हालेर मैदानमा उत्रने छौ । टिम राम्रो छ राम्रो प्रदर्शन गर्ने अपेक्षा गरेका छौ ।

किशोर केसी : जावलाखेल युथ क्लब (प्रशिक्षक)

चौथोंसम्म हुने लक्ष्य रहेको छ । र त्यो भन्दा माथि पुग्ने लक्ष्य पनि राखेका छौ । टिममा विदेशी खेलाडीहरु पनि छन र टिम बलियो छ ।

कुलदिप कार्की : जावलाखेल युथ क्लब (कप्तान)

हामी मानसिकर शारीरिक रुपमा तयार छौ । मनाङसँग डर छैन, हामी त्यसका लागि तयार छौ । हामीमाथि दवाव छैन, मनाङलाई कडा टक्कर दिन्छौ ।

राजकाजी शाक्य : न्यूरोड टिम (एनआरटी)(प्रशिक्षक)

हामीलाई अभ्यास गर्ने मैदानको समस्या छ । हामीले अभ्यास गर्ने मैदान कडा छ । हाम्रोमा ट्रायलबाट धेरै खेलाडी आएका छन् र तयारी समय कम भयो । तर हाम्रो तयारी राम्रो छ । उत्कृष्ट प्रदर्शन गर्ने तथा उपाधिका लागि प्रयास गर्नेछौ । सकेसम्म शीर्ष चारमा पुग्ने छौ ।

अजित प्रजापति : न्यूरोड टिम (कप्तान)

टिम राम्रो बनेको छ । केही समयको अन्तरालपछि तयारी राम्रो भइरहेको छ । टिममा युवा तथा विदेशी खेलाडीहरु छन् ।

कुमार थापा : नेपाल एपिएफ क्लब (प्रशिक्षक)

पुरानो रेकर्डलाई सुधार गर्ने प्रयास हुनेछ । १२ बाट आठौ स्थानमा आउने लक्ष्य रहेको छ । टिमको पुरानो ढाचामा सामान्य परिवर्तन गर्नेछौ ।

टोप बहादुर विष्ट : नेपाल एपिएफ क्लब (कप्तान)

तीन महिना तयारी गरेका छौ । तयारी राम्रो छ । चार देखि आठौं स्थानसम्म आउने प्रयास हुनेछ ।

मेघराज केसी : सातदोबाटो युथ क्लब (प्रशिक्षक)

पहिलो पटक लिग खेल्दैछौ र टिमलाई यसको खासै ज्ञान पनि छैन । हामी लिगलाई अरुजस्तो लिदैनौ । हामीले मेहनत गरेका छौ अनुभवलाई प्रयोग गरेर राम्रो नतिजा ल्याउने प्रयास गर्नेछौ । सुरुवाती खेल सिक्ने मौका हुनेछ ।

मान बहादुर तामाङ : सातदोबाटो युथ क्लब (कप्तान)

चुनौतीको रुपमा लिएको छु । यो आफूलाई प्रमाणित गर्ने अवसर पनि हो । अरु खेलाडीहरुसँग अनुभव साट्ने छु । टिमको विदेशी खेलाडीहरुले युवा खेलाडीलाई मोटिभेट गर्नेछन् ।