ब्राजिललाई हराउने कल्पनासमेत नगरेका हालान्ड

स्टार फरवार्ड एर्लिङ हालान्डले सधैं नर्वेका लागि विश्वकप खेल्ने सपना देखेका थिए। तर‚ त्यो सपना पूरा हुन करिब २५ वर्ष लाग्यो।

समूह चरणमा फ्रान्ससँग मात्र पराजित हुँदै अन्तिम ३२ मा पुगेको नर्वेले आइभरी कोस्टलाई २–१ ले हराउँदै प्रि–क्वार्टरफाइनलमा स्थान बनायो।

तर, पाँच पटकको विश्वविजेता ब्राजिलसँगको भेटअघि हालान्डलाई पनि नर्वेको विश्वकप यात्रा त्यहीँ टुंगिने लागेको थियो।

खेलअघि उनले भनेका थिए,‘अहिले सम्पूर्ण नर्वे राष्ट्रिय टोलीको सफलताले देश उत्साहित छ। समर्थकहरूको साथले हामीलाई थप ऊर्जा दिएको छ। तर, अगाडि बढ्ने हाम्रो सम्भावना निकै कम छ।’

यद्यपि, सोमबार भएको खेलमा उनै हालान्डले दुई गोल गर्दै नर्वेलाई ब्राजिलमाथि २–१ को सनसनीपूर्ण जित दिलाए। खेलपछि उनले क्वार्टरफाइनलमा पुग्न सफल भएकोमा आफू नै आश्चर्यचकित भएको बताए।

मिडियासँग कुरा गर्दै हालान्डले फुटबलमा केही उपलब्धि असम्भवजस्तै लाग्ने भए पनि यस जितले आफ्नो सोच परिवर्तन गरिदिएको बताए।

उनले भने,‘म अझै पनि यो विश्वास गर्न सकिरहेको छैन। जीवनमा कहिल्यै यस्तो हुनेछ भन्ने सोचेको थिइनँ। म सधैं नर्वेका लागि विश्वकप खेल्ने सपना देख्थें, तर ब्राजिललाई हराउन सकिन्छ भन्ने कल्पना पनि गरेको थिइनँ। साँच्चै भन्नुपर्दा, केही कुरा असम्भव लाग्थ्यो। तर अहिले महसुस भइरहेको छ कि म गलत रहेछु।’

सोमबारको जितसँगै नर्वेले ब्राजिललाई २–१ ले पराजित गर्दै इतिहासमै पहिलो पटक विश्वकपको क्वार्टरफाइनलमा स्थान बनाएको हो। यसअघि विश्वकपमा नर्वेको सर्वश्रेष्ठ उपलब्धि सन् १९९८ को फ्रान्स विश्वकपमा अन्तिम १६ सम्म पुग्नु थियो।

हालान्डले टोलीको प्रदर्शनको पनि प्रशंसा गरे। उनले भने,‘हामीले आफ्नो खेल शैलीअनुसार बलको उत्कृष्ट उपयोग गर्न सफल भयौं। सबै खेलाडीले आत्मविश्वासका साथ उत्कृष्ट प्रदर्शन गरे। समग्रमा, एउटा राष्ट्रका रूपमा पनि हामी धेरै अघि बढेका छौं।’

अब नर्वेले जुलाई ११ मा हुने विश्वकपको क्वार्टरफाइनलमा इंग्ल्यान्डसँग प्रतिस्पर्धा गर्नेछ। उक्त खेल अमेरिकाको मियामीमा नेपाली समयअनुसार राति २:४५ बजे सुरु हुनेछ।