नेपाल लगातार पराजित

काठमाडौं। नेपाल ‘ए’ ले अस्ट्रेलियामा जारी ‘टप इन्ड टी–२० क्रिकेट सिरिज’मा लगातार दोस्रो पराजय बेहोरेको छ। शनिबार सम्पन्न आफ्नो दोस्रो खेलमा नेपाल हाई–परफर्मेन्स–११ सँग नौ विकेटले पराजित भएको हो।

नेपाल ‘ए’ दिएको १०० रनको झिनो लक्ष्य बंगलादेशले १०.२ ओभरमा एक विकेटको क्षतिमा भेट्टायो। बंगलादेशका जिशान आलमले अर्धशतकीय इनिङ्स खेले। उनले २९ बलमा चार छक्का र तीन चौकासहित अविजित ५२ रन बनाए।

नेपालका साहब आलमले मात्र एक विकेट लिन सके। त्यसअघि टस हारेर पहिले ब्याटिङ गरेको नेपालले सुरुआतमै लगातार विकेट गुमाएपछि ठूलो स्कोर बनाउन सकेन। एक समय नेपाल १० रनमै चार विकेट गुमाएर दबाबमा परेको थियो।

नेपालका कुशल भुर्तेलले सर्वाधिक ४६ रन बनाए। उनले ४० बलमा तीन चौका र एक छक्का प्रहार गरे। शाहब आलमले २३ बलमा ११ रन, रिजान ढकालले १४ बलमा १० रन तथा विपिन खत्रीले अविजित ११ रन बनाए। आकाश चन्दले १३ बलमा पाँच रन जोडे।

नेपालका अन्य ब्याटर भने दोहोरो अंकमा पुग्न सकेनन्। त्रितराज दास ६, कप्तान अनिल साह शून्य, पवन सर्राफ शून्य, कुशल मल्ल एक, लोकेश बम दुई र नारायण जोशी एक रनमा आउट भए।

बंगलादेशका एमडी रुबेल नेपालका लागि सबैभन्दा घातक बलर बने। उनले चार ओभरमा १८ रन खर्चेर चार विकेट लिए। रोहनत दौलाह बोर्सन, रिपोन मन्डोल र सामिउन बासिरले समान एक–एक विकेट लिए।

नेपाल आफ्नो पहिलो खेलमा नर्दन टेरिटोरी स्ट्राइकसँग आठ विकेटले पराजित भएको थियो। त्यस खेलमा पनि नेपालले १२२ रन मात्र बनाउन सकेको थियो। नेपाल ‘ए’ ले तेस्रो खेलमा सोमबार होबार्ट हुरिकेन्स एकेडमीविरुद्ध खेल्ने तालिका छ।