ओलम्पिक खेल्न एलेक्स जापान प्रस्थान

काठमाडौं । टोकियो ओलम्पिकमा सहभागिता जनाउन पौडीवाच एलेक्जेन्डर शाह (एलेक्स) सोमबार जापान प्रस्थान गरेका छन् ।

ओलम्पिकका लागि एलेक्स र मुख्य प्रशिक्षक शंकर कार्की सोमबार त्यसतर्फ प्रस्थान गरेका हुन् ।

गौरिका सिंह भने बेलायतबाटै जापान आउने नेपाल ओलम्पिक कमिटिले जनाएको छ । टोकियो ओलम्पिकमा पौडीबाट एलेक्स र गौरिकाले नेपालको प्रतिनिधित्व गर्ने छन् ।

जापान पुगेपछि पौडी टोलीले टोकुशिमामा विशेष तयारी गर्ने छन् । ओलम्पिक कमिटिले यस अघि नै टोकुशिमा प्रान्तसँग सम्झौता गरिसकेको छ  ।

नेपाली पौडी टोली जुलाई २० मा ओलम्पिक भिलेजमा सम्मलित हुने छन् ।

टोकियो ओलम्पिकमा एथलेटिक्सकी सरस्वती चौधरी, सुटिङकी कल्पना परियार र जुडोकी सोनिया भट्टले पनि नेपालको प्रतिनिधित्व गर्ने छन् ।

टोकियो ओलम्पिक जुलाई २३ देखि अगस्ट ८ सम्म हुनेछ ।