काठमाडौं । प्रशिक्षक बालगोपाल महर्जन पछिल्ला केही साता चर्चा र विवादमा छन् । राष्ट्रिय फुटबल टिमका मुख्य प्रशिक्षकले साता दिन अघि फ्रेन्चाईज फुटबल प्रतियोगिता नेपाल सुपर लिग (एनएसएल) मा काम गर्ने निर्णय गरे ।
अक्सन समारोहमा काठमाडौं रेजर्सको टेबलमा देखिएका बालगोपाललाई लिएर धेरैले अचम्म माने । बालगोपालसंगै थिए एन्फाको लिग कमिटिका संयोजक बिज्ञानराज शर्मा र राष्ट्रिय टिमका म्यानेजर मधुशुदन उपाध्याय ।
सबैको ध्यान बालगोपालले तानेका थिए ।
राष्ट्रिय फुटबल टिमको मुख्य प्रशिक्षकको जिम्मेवारीमा रहेका व्यक्ति कसरी अर्को टिमको प्रशिक्षक बन्न सक्छ ?
यसले राष्ट्रिय टिममा असर त गर्दैन ?
कतै स्वार्थ त बाझिदैन ?
बिहिबार नेपाल त्रिदेशीय फुटबल प्रतियोगिताको पहिलो खेलमा उत्रियो, किर्गिस्तानको ओलम्पिक टोलीविरुद्ध ।
नेपालको प्रशिक्षकमा थिए, उनै बालगोपाल ।
बालगोपालले सुरुवाती लाईन अपको घोषणा गरे । दुई खेलाडीलाई प्लेईङ सेटमा राखेर डेब्यु गराए ।
संजोक राई र त्रिदेव गुरुङ दुई भाग्यमानी खेलाडी थिए । जसले प्लेईङ सेटमा रहेर राष्ट्रिय फुटबल टिमबाट डेब्यु गरेका थिए ।
नेपालले १० खेलाडीको सिमित बनेको किर्गिस्तानको यू–२३ को टोलीसंग गोल रहित बराबरी खेल्यो । किर्गिस्तानलाई हराउँदै फाईनल पुग्ने अवसर नेपाललाई थियो ।
झण्डै ६ वर्षपछि दशरथ रंगशालामा उत्रिएको नेपालले जित निकाल्ने धेरैको अनुमान थियो । तर दर्जन बढी आक्रमण बुनेको नेपालले गोल गर्न भने सकेन ।
भनिन्छ, जितमा हजार गल्तीमा माफ हुन्छ । हारमा हजार कारण र प्रश्न जन्मिन्छन् ।
छुटेको एक प्रश्न छ, कतै खेलमा बालगोपालको स्वार्थ त बाँझिएन ?
बालगोपालले डेब्यु गराएका दुई खेलाडी सञ्जोक र त्रिदेव काठमाडौं रेजर्सका खेलाडी थिए । जसलाई अक्सनमार्फत बालगोपालले किनेका थिए । पहिलो खेल त सकिएको छ, तर स्वार्थ बाँझिएको प्रश्नले बालगोपाललाई पछ्याउन छोड्ने छैन ।
प्रशिक्षक राजुकाजी शाक्य मैदानमा समेत स्वार्थ बाँझिएको जस्तो देखिएको बताउँछन् ।
‘यसअघि पनि मिडियामै आएको थियो । खेल अघिनै आएको थियो । नभन्दै मैदानमा पनि त्यस्तो कुरा देखियो । यो चिज राम्रो हैन ।’ उनले खेलपाटीसंग भने ।
प्रशिक्षक शाक्यले किर्गिस्तानविरुद्धको नेपाली टिमको बनोट स्वार्थ बाँझिने खालको देखिएको उल्लेख गरे ।
‘फ्रेन्चाईजको अक्सन भईसकेपछि धेरै मिडियामा आएको थियो । यस्तो हुन सक्छ भन्ने थियो, नभन्दै त्यो देखियो । यसले राम्रो भएन ।’ उनले भने, ‘डेब्यु गर्ने खेलाडी भन्दा धेरै अनुभवी खेलाडीहरु बेन्चमा थिए । खेलको नतिजा नेपालका लागि महत्वपुर्ण थियो । दोस्रो खेल तलमाथि भएको खण्डमा नेपाललाई खत्तम हुन्छ ।’
जब फ्रेन्चाईज टिमका लागि एन्फाले ‘मार्की खेलाडीको सुचि पठायो । धेरै टिमले विशाल राईलाई पहिलो नम्बरमा राखेका थिए । रोहित चन्द र किरण चेम्जोङ्गलाई छाडेर समकालिन घरेलु फुटबलको उत्कृष्ट खेलाडी विशाललाई मानिन्छन् । बक्स टु बक्स खेल्न सक्ने र गोलका लागि राम्रा पास निकाल्न सक्ने उनको विशेषता हो । जो कमै नेपाली खेलाडीमा छ । उदाहरणका लागि उनै विशालले खेलको अन्तिम चार मिनेट मात्र खेल्न पाए ।
बालगोपाल मुख्य प्रशिक्षक हुन्, उनले उपलब्ध २३ खेलाडीलाई आवश्यकता अनुसार कुनैपनि समय, कुनैपनि पोजिसनमा खेलाउन पाउँछन् । उनको त्यो अधिकार पनि हो । तर जब स्वार्थ बाँझिन्छ, त्यसको उत्तर उनले दिनुपर्छ ।
पत्रकार सम्मेलनमा प्रशिक्षक बालगोपालले युवा खेलाडीलाई अवसर दिनुपर्ने बताए ।
‘नयाँ खेलाडीलाई अवसर दिनुपर्छ । उनीहरुको क्षमता देखेर टिममा राखेको हो । टिममा जति पनि निरिक्षण गरे, उनीहरुको प्रशिक्षणबाट खुसी छु । जसलाई विश्वास गरेर मिडफिल्डमा खेल्न लगाएको थिए । उनीहरुको प्रर्दशनबाट सन्तुष्ट छु ।’ उनले भने ।
उनले नतिजामात्र हेर्न नहुने आग्रह गरे । नतिजाबाट खेलाडीको प्रर्दशन महत्वपुर्ण भएको उनको दलील थियो ।
‘तपाईले नतिजमात्रै हेर्नु हुन्छ कि खेलपनि हेर्नु हुन्छ ? स्कोरमात्र गर्न नसकेका हुन् । खेल उत्कृष्ट थियो ।’ उनको दाबी थियो ।
-1734879364.jpg)
-1734875597.jpg)
