काठमाडौं । घरेलु फुटबलको सर्वोच्च निकाय हो, अखिल नेपाल फुटबल संघ एन्फा ।
एन्फाको मुख्य आयस्रोत फिफा र एएफसीबाट आउने अनुदान र कार्यक्रमनै हो । ती अनुदान शीर्षक अनुसार आउँछन् । निर्धारित शीर्षक बाहिर गएर कार्यक्रम गर्न मिल्दैन । प्रायोजक खोजेर एन्फाले आफ्ना थप कार्यक्रम सञ्चालन गर्छ । एन्फाको ठुलो आयस्रोत टिकटबाट प्राप्त हुने रकम हो ।
तर ६ वर्ष भयो । एन्फाले राष्ट्रिय फुटबल टिमको प्रतियोगिता दशरथ रंगशालामा गर्न पाएको छैन । ७२ सालको भुकम्पपछि दशरथ रंगशाला समेत क्षतिग्रस्त बन्यो ।
रंगशाला पुननिर्माणले समय लियो । गत वर्ष १३ औं साग अघिमात्र रंगशाला तयार भयो । सरकारले सागको फुटबलतर्फको खेल रंगशालामा आयोजना गर्यो । नेपालले स्वर्ण जित्यो । टिकट मार्फत सरकारले लाखौं रुपैयाँ आम्दानी गर्यो । साग फुटबल ओलम्पिक टिमले खेल्ने प्रतियोगिता हो ।
तर एन्फाले राष्ट्रिय टिमको एउटै खेल रंगशालामा खेलाउन पाएको छैन । टिकटमार्फत आउने रकम ठप्पै छ । पछिल्ला ६ वर्षमा एन्फाले केही मैत्रीपूर्ण फुटबल र विश्वकप छनोटका खेल खेल्यो । तर ती सबै विदेशी भुमीमा थिए । रंगशला अभावमा नेपालले विश्वकप छनोट अन्तर्गत कुवेतविरुद्धको घरेलु खेल भुटानमा गएर खेल्यो ।
साग लगत्तै रंगशाला त तयार भयो । पुन: कोरोनाको महामारी सुरु भयो । कोरोनाले विश्वकपको छनोट खेल करिब एक वर्ष प्रभावित बन्यो । चैत १७ गते अष्ट्रेलियासंग घरेलु मैदानमा खेल्दै नेपाल अन्तराष्ट्रिय फुटबलमा फर्कने योजनामा थियो । तर कोरोनाकै कारण सो खेल स्थगित बनेको छ ।
कोरोना संक्रमणको प्रभाव, हवाई उडानको प्रतिबन्ध र क्वारेन्टिनको समयका कारण अष्ट्रेलियाको टिम निर्धारित समयमा आउन नसक्ने बतायो । एएफसीले चैत १७ को छनोट खेललाई स्थगित गरेको अवस्था छ । नयाँ मिति र स्थान तय हुन सकेको छैन ।
करिब ६ वर्षदेखि फुटबल समर्थकले दशरथ रंगशालामा राष्ट्रिय फुटबल टिमको खेल हेर्न पाएका छैनन् । एन्फाले समेत अतिरिक्त आम्दानी गर्न सकेको छैन । बजेट अभावमा एन्फाले यू–१८ साफ च्याम्पियनसिपको उपाधि जितेको खेलाडीलाई पुरस्कृत समेत गर्न सकेको छैन ।
विश्वकप छनोटका खेल दशरथ रंगशालामा खेलाएर झण्डै साढे २ करोड रुपैयाँ आम्दानी गर्ने एन्फाको योजनामा गम्भिर धक्का लागेको छ । अझ दशरथ रंगशालामा राष्ट्रिय टिमले अन्तराष्ट्रिय प्रतियोगिता नखेल्दा फुटबलको माहोल फर्कन नसकेको एन्फाको बुझाई छ ।
अष्ट्रेलियासंगको छनोट खेल स्थागित हुने बित्तिकै एन्फामाथि दबाब थपियो । फुटबलको माहोल फर्काउन दशरथ रंगशालामा अन्तराष्ट्रिय प्रतियोगिता आयोजना गर्नुपर्ने एन्फाले बुझेको छ । सोही अनुसार एन्फाले अन्तराष्ट्रिय प्रतियोगिताका लागि केही देशलाई पत्राचार गर्यो । र फिफाको समय अनुसार नेपाल सहित त्रिदेशीय अन्तराष्ट्रिय प्रतियोगिताको आयोजना गर्ने टुङ्गोमा पुगेको छ ।
एन्फाका अनुसार चैत ९ देखि १७ सम्म दशरथ रंगशालामा नेपालको राष्ट्रिय टिम सहित बंगलादेश र कीर्गिस्तानले त्रिदेशीय अन्तराष्ट्रिय फुटबल प्रतियोगिता खेल्नेछन् ।
प्रतियोगितामार्फत एन्फा दुई सन्देश दिन चाहन्छ ।
पहिलो, अन्तराष्ट्रिय प्रतियोगिता आयोजना गरेर देशमा फुटबलको माहोल फर्काउन चाहन्छ । दोस्रो, अन्तराष्ट्रिय प्रतियोगिता आयोजना गर्न नेपाल सक्षम छ भनेर सन्देश दिन चाहन्छ ।
एन्फा अध्यक्ष कर्माछिरिङ्ग शेर्पा त्रिदेशीय प्रतियोगितामार्फत फुटबलको माहोल फर्कने विश्वास ब्यक्त गर्छन् ।
‘नेपालमा अन्तराष्ट्रिय प्रतियोगिता नभएको धेरै भएको छ । यसको पनि धेरै मानिसले नेपालको खेल हेर्न पाएका छैनन् । र अर्को कुरा यस्तो परिस्थितीमा पनि नेपाल अन्तराष्ट्रिय प्रतियोगिता आयोजना गर्न सक्षम छ भनेर सन्देश जान्छ ।’ शेर्पाले खेलपाटीसंग भने ।
उनले त्रिदेशीय प्रतियोगिताको आयोजना सम्पन्न गरेपछि अन्य प्रतियोगिता गर्न समेत सहज हुने उल्लेख गरे ।
‘नेपाल सक्षम छ । नेपालले गर्न सक्छ भन्ने विषयनै मुख्य हो । र फुटबलका प्रशंसकहरु समेत खेल हेर्नका लागि ब्यग्र प्रतिक्षामा बसेका छन् ।’ उनले भने, ‘फुटबलको त्यो माहोल बनाउनुपर्ने देखिन्छ । अरुपनि नेपालमा अन्तराष्ट्रिय प्रतियोगिता नेपालमा गर्न सहज हुन्छ ।’
-1734879364.jpg)
-1734875597.jpg)
