चोटले थलिएको चन्द्रपुर

काठमाडौं । एन्फाको आयोजनामा जारी राष्ट्रिय महिला लिगमा पाचौं चरणका खेल समाप्त भैसकेका छन् ।

पहिलो पटक राउण्ड रोविनको आधारमा सञ्चालित लिगको आधा खेल नसकिँदै क्लबलाई खेलाडी चोटले सताउन थालेको छ ।

महिला लिग यसअघि हप्ता दिनमात्रै संचालन हुन्थ्यो । चोटको समस्यामा खासै हुन्थेन । यसपटक लिगको अवधि बढेको छ । साथमा खेलाडीको चोटको समस्या बल्झिदो देखिन्छ ।

लिगका आधा खेल बाकी रहँदै चोटका कारण क्लबमा खेलाडीनै अपुग हुने सम्भावना देखिन्छ । खेलाडी अभावमा एउटा पोसिजनका खेलाडीलाई फरक पोजिसनमा खेलाउन क्लब बाध्य छन् ।

नियमित र भरपर्दा खेलाडीलेनै चोट बोक्दा मोफसलबाट अन्तिम चरण खेल्न काठमाडौंं आएका क्लबको प्रदर्शन घट्दै गैरहेको छ । यसअघि विभागीय टोलीलाई दबाब दिँदै आफ्नो प्रभुत्व राख्न सफल क्लबलाई चोटकै समस्या परेको देखिन्छ ।

यस्तैमा पर्छ, रौतहटको चन्द्रपुर नगरपालिका टोली ।

उमेर समूहमा महत्वपूर्ण प्रदर्शन गर्दै आएका र केहि भरपर्दा खेलाडी बोकेर काठमाडौं आईपुगेको रौतहट पछिल्लो समय खराब प्रदर्शनबाट गुज्रिरहेको छ ।

यसअघि एन्फा मैदान सातदोबाटोमा भएको महिला लिगमा रौतहटले तेस्रो स्थान हात पारेको थियो । विभागीय नेपाल पुलिसलाई पछि पार्दै तेस्रो स्थान हात पारेको रौतहटले यस पटक भने सोहि अनुसारको प्रदर्शन दिन सकेको छैन ।

लिगको आफ्नो पाँचौ खेलमा पराजित रौतहटको तीन अंक मात्रै रहेको छ । ७ टोली सहभागी प्रतियोगितामा रौतहट अन्तिमबाट दोस्रो स्थानमा छ ।

उसले ५ खेल खेल्दा एकमात्रै जित आत्मासाथ गरेको छ । यस्तै ४ खेलमा भने हार ब्यहोरेको छ । उसले ८ गोल गर्दा २५ गोल ब्यहोरेको छ ।

पछिल्लो समय महिला फुटबलको उत्थानमा ठुलो योगदान पुर्याउँदै आएको चन्द्रपुरले यस पटक आशा अनुसारको प्रदर्शन दिन सकेको छैन ।

हाल महिला लिगमा सहायक प्रशिक्षकको भुमिका निर्वाह गरिरहेका चित्रबहादुर दर्लामी टोलीको हारमा चोटलाईनै दोष दिन्छन् ।

‘मुख्य समस्या भनेकै खेलाडीको चोटले सतायो ।‘ आईतबार पुलिससँग ३–१ गोल अन्तरले पराजित भएपछि उनले भने ।

महिला लिगमा खेलाडी उत्पादननै हेर्ने हो भने चन्द्रपुर एक नम्बरमा पर्छ ।

उसले उत्पादन गरेका खेलाडी ब्यवसायीक नहुँदै विभागमा प्रवेश गर्छन् । एक बर्ष नवित्दै उसका ४–५ खेलाडी बर्षेनी विभागीय क्लबमा पुग्छन् । जसका कारण पनि उसले आफ्नो स्तरको प्रदर्शन दिन पाउँदैन । यता, विभागको भने प्रदर्शन बढ्दै जान्छ ।

‘सिनियर खेलाडी बाहिर (विभाग) गए । अहिले टोलीमा जुनियर खेलाडी बढी छन् । उनीहरुलाईनै आत्मविश्वास बढाउँदै खेलाईरहेका छौं ।’ त्रिभुवन आर्मी क्लबसँग १०–० को भारी गोल अन्तरले पराजित भएपछि दर्मालीले भनेका थिए ।

पछिल्लो समय विभाग बाहिर बलियो देखिएको रौतहट यस पटक भने विराटनगरसँगनै लज्जास्पद हार ब्यहोर्न पुग्यो ।

पहिलो पटक राष्ट्रिय स्तरको प्रतियोगितामा विभाग बाहिरको टोलीसँग हार ब्यहोर्ने क्रममा उसले विराटनगरलाई नतिजा ५–० ले सुम्पियो ।

सो हारको पिडा कस्तो थियो, खेलपछिको प्लेयर बक्समा देख्न सकिन्थ्यो ।

नियमित कप्तान मुर्छा परिरहँदा हस्पिटलनै भर्ना हुनुपर्याे । कार्यबहाक कप्तान अन्जु लोप्चान र स्ट्राईकर सविता राना मगरका आँशु रोकिएका थिएनन् ।

सोहि हारसँगै कप्तान रोजिना श्रेष्ठ टोली बाहिर छिन् । उनि अझै कहिले फर्कने हो टुंगो छैन । यस्तै नेपाल यू–१९ महिला टोलीबाट प्रतिनिधित्व गरिसकेकी डिफेन्डर समिक्षा घिमिरे सहित यू–१६ टोलीको गोलरक्षक पुजा थापा पनि घाईते छिन् । उनीहरुको समेत कहिले पुनरागमन हुने हो पत्तो छैन ।

आईतबार पुलिसविरुद्ध पनि दुई खेलाडीले चोट बोके ।

मिडफिल्डर दिल कुमारी राना मगरले मैदाननै छाडिन् । स्ट्राइकर सविता राना मगरले समेत आफुलाई असजिलो भएको भन्दै डिफेन्समा झरेर खेलेकी थिईन् ।

प्रशिक्षक दर्लामीले अन्य विकल्प नदेखेपछि सवितालाई डिफेन्समा झारेको बताए । खेलको अन्तिम समयमा गोलरक्षक युनिशा राईले समेत सामान्य चोट बोकेकी थिईन् ।

महिला लिगमा एन्फाले क्लबलाई विदेशी खेलाडी राख्न पाउने नियम राखेको छ । विभागसँगको खेल स्तर नमिल्ने र प्रतियोगितालाई प्रतिस्पर्धात्मक बनाउने भन्दै एन्फाले एक टोलीमा ४ महिला खेलाडी राख्ने प्राबधान पहिलो पटक ल्याएको थियो । तर सो कार्यलाई चन्द्रपुरले उचित ठानेन ।

विदेशी खेलाडीलाई टोलीमा राख्दा बर्षभर क्लबमा रहेर तयारी गरिरहेका खेलाडीको मनोबल घट्ने, क्लबकै स्तर घट्ने र खेलाडी विकासमा क्लबको कुनै औचित्य नरहने परिस्थिती चन्द्रपुरको दाबी छ ।

सोही कारण उसले विदेशी खेलाडी समावेश नगर्ने निर्णय गर्यो ।

‘विदेशी खेलाडीको बारेमा सोचेका हौं । तर हामी बर्ष भरी रातदिन नभनी खेलाडी उत्पादन गर्छाै। त्यहि खेलाडी बाहिर (बेन्च) राख्दा खेलाडीलाई खिन्न हुन्छ ।

उनीहरुको मनोबल घट्छ । त्यसैले आफ्नो टोली खेलाउ भनेर विदेशी सोचेनौं ।’ रौतहट जिल्लामा महिला फुटबल एकेडेमी संचालनमा ल्याएका शेर बहादुर दर्लामीका पुत्र समेत रहेका चित्र दर्लामीले भने ।

‘हाम्रो सोच च्याम्पियन हैन । हामी विभाग भन्दा तल, नगरभन्दा माथि रहने भन्ने सोच हो । तर सोचेको भन्दा धेरै खेलाडी चोटले घाटा भैरहेको छ ।’ उनले भने ।

चोटकै बाबजुद एक दिन पछिनै चन्द्रपुरले ४ क्यामरुन खेलाडी सम्मिलित वालिङ नगरपालिकाको सामना गर्दैछ ।

पछिल्लो समय महिला फुटबलमा एकपक्षीय खेल प्रदर्शन गरिरहेको एपीएफविरुद्ध विदेशी खेलाडी सम्मिलित वालिङले उत्कृष्ट प्रर्दशन गर्यो । विदेशी खेलाडीको लयले उत्साहित बनेको वालिङलाई रोक्नुको विकल्प घाईते चन्द्रपुरसंग छैन ।

चन्द्रपुरले हालसम्मकाे नतिजा :

एपीएफ ६–० चन्द्रपुर

चौदण्डीगढी १–७ चन्द्रपुर

चन्द्रपुर ०–५ विराटनगर

चन्द्रपुर ०–१० आर्मी

चन्द्रपुर १–३ पुलिस