'नेपाली फुटबलको स्तर खस्किएको छैन'

काठमाडौं । करिब ८ महिनापछि राष्ट्रिय फुटबल टिमका खेलाडीहरु मैदान प्रवेश गर्दै गर्दा आफ्नो फिटनेस र प्रदर्शनलाई लिएर खेलाडी दुविधामा थिए ।

यस्तो अवस्थामा खेलाडीको चाहना अन्तराष्ट्रिय मैत्रीपूर्ण खेलमा भन्दा घरेलु लिग संचालन होस् भन्ने थियो ।

तर, नेपाली फुटबलको सर्वोच्च निकाय अखिल नेपाल फुटबल संघ (एन्फा)लाई घरेलु लिग सुरु गर्न पक्कै सहज थिएन ।

एन्फालाई घरेलु लिग गर्न भन्दा मैत्रीपूर्ण खेल खेलाउन सहज थियो । जसको कारण एन्फाले राष्ट्रिय खेलकुद परिषद् (राखेप) र खेलकुद मन्त्रालयलाई मैत्रीपूर्ण खेलका लागि प्रशिक्षण गर्नका लागि अनुमति माग्यो । त्यस समय मैत्रीपूर्णका लागि एन्फालाई केहि राष्ट्रको प्रस्ताव समेत आएको थियो ।

सरकारको अनुमतिसँगै एन्फाले दशैँ सकिएको केहि दिनपछिबाट टिमको प्रशिक्षण सुरु गरेको थियो । यस्तै बंगलादेश र नेपालबीचको दुई मैत्रीपूर्ण खेल समेत पक्का भएको थियो ।

त्रिपुरेश्वरस्थित दशरथ रंगशालामा टिमले प्रशिक्षण सुरु गर्यो । तर, प्रशिक्षण सुरु गर्नु अघि गरिएको कोरोना परिक्षणमा ५ खेलाडीको रिपोर्ट पोजेटिभ आयो । ४ खेलाडी प्लेइङ सेटमै पर्दै आएका खेलाडी थिए ।

बंगलादेश प्रस्थान गर्नु अघि गरिएको परिक्षणमा पुन: दुई खेलाडीमा कोरोना देखियो । जसको कारण टिमका नियमित ६ खेलाडी बंगलादेश भ्रमणमा जान पाएनन् ।

चोटका कारण टिमका महत्वपूर्ण सदस्य तथा मिडफिल्डर रोहित चन्द नेपालमै अड्किए । जसको कारण टिममा ८ नयाँ खेलाडीले पहिलो पटक मौका पाए ।

बंगलादेश पुगेपछि डिफेन्डर रंजित धिमाललाई समेत कोरोना देखियो । उनले पहिलो मैत्रीपूर्ण समेत गुमाए ।

तर, बंगलादेश भ्रमणमा ६ खेलाडीले त डेब्युको अवसर नै पाए ।

घरेलु टिमविरुद्धको पहिलो खेल २-० ले गुमाएको नेपालले दोस्रो खेलमा भने गोलरहित बराबरी खेलेको थियो ।

फिफा वरीयतामा आफु भन्दा पछिलो बंगलादेशविरुद्ध सन्तोषजनक नतिजा नआएपछि नेपाली टिमको आलोचना समेत भयो । खराब प्रदर्शनमा खेलाडी र प्रशिक्षकलाई दोष देखाईएको थियो ।

तर, लामो समय पछि मैदान फर्किएका नेपाली टोलीको प्रदर्शनबाट सन्तुष्ट हुने केहि आधारहरु भने रहेको छ । छोटो तयारीमा नेपालले गरेको प्रदर्शनलाई कतिपयले राम्रो संकेतको रुपमा हेरेका छन् ।

नेपाली राष्ट्रिय फुटबल टिमको सहायक प्रशिक्षकको रुपमा काम गरिसकेका प्रशिक्षक मेघराज केसी नेपाली टोलीको प्रदर्शनलाई अहिले नै आलोचना गर्न नहुने तर्क गर्छन ।

‘पहिलो खेलमा त्यति राम्रो प्रदर्शन हुन सकेन । लथालिङ्ग जस्तै थियो । दोस्रो खेलमा धेरै मिलेर आयो । दुबै खेललाई हेर्दा त्यति नराम्रो पनि हैन,' प्रशिक्षक केसी भन्छन्, 'कोरोनाको त्रास छ । लामो समय पछि फुटबल आईरहेको छ । फुटबल फर्किएको केहि समयमानै नेपालले खेल्न सक्छ भन्ने भाईहरुले (खेलाडी) ले प्रमाणित गरे ।’

नतिजाको विषयलाई लिएर चिन्ता लिनु नपर्ने र छोटो समयमानै नेपाली खेलाडीले देखाएको प्रदर्शनका कारण कोरोनाले नेपाली फुटबलको स्तर नखस्केको समेत केसीको भनाई छ ।

‘रिजल्टको बारेमा खासै तनाव लिनु पर्दैन । यत्रो समयपछि खेल्दैछौं । सेटका कति खेलाडी विभिन्न कारणले खेल्न पाएनन् । एक प्रकारले नयाँ सेटनै थियो । यस्तो परिस्थितिमा पनि खेल्यौं । यहिनै ठुलो कुरा हो,’ एएफसी 'ए' लाईसेन्स प्राप्त प्रशिक्षक केसीले भने,‘पहिलो खेल हेर्दा नेपाली फुटबल अलिकति तल गएको हो कि जस्तो लागेको थियो । तर, २–३ दिन पछि नेपालको प्रदर्शनमा धेरै फरक थियो । त्यसैले नेपालको फुटबल पहिलाको अवस्थामा फर्किन सक्छ भन्ने आशा देखाएको छ ।’

यस्तै प्रशिक्षक केसीले नयाँ खेलाडीले बंगलादेशविरुद्ध गरेको प्रदर्शनबाट आगामी दिनमा नेपाली फुटबलको स्तर अर्काे स्तरमा पुग्ने सम्भावना देखिएको बताए ।

‘राष्ट्रिय टिममा एउटा प्रदर्शन भईरहेको हुन्छ । त्यो लेभललाई माथि लैजाने नयाँ खेलाडीले हो । नयाँ खेलाडीले जुन प्रकारले खेले र प्रदर्शन गरे । त्यसले झनै राष्ट्रिय टिमको प्रदर्शन अर्काे स्तरमा जाने देखिएको छ । नयाँ खेलाडीले यसरीनै अवसर पाए भने हाम्रो राष्ट्रिय टिम अझै बलियो हुँदै जान्छ,’ उनले भने ।

प्रशिक्षक केसीले नेपाली खेलकुदलाई कोरोनाले असर गरेपनि चाडै आफ्नो लय समात्नेमा आफु विश्वस्त रहेको समेत बताए ।