फुटबल 'इज' ब्याक !

काठमाडौं । गएको चैतमा सरकारले लकडाउन घोषणा गरेसँग सबै क्षेत्र ठप्प भए । जसबाट खेलुकद क्षेत्र पनि अछुतो रहेन।

सरकारले लकडाउन घोषणा गर्नु एक साता अघिनै अखिल नेपाल फुटबल संघ (एन्फा)ले आफ्ना सम्पूर्ण कार्यक्रम स्थगित गरेको थियो । चलिरहेको बी डिभिजन लिग र राष्ट्रिय टिमको प्रशिक्षण समेत एन्फाले तत्काललाई रोकेको थियो ।

यस्तै, तयारीमा रहेका सी डिभिजन लिग र पहिलो पटक नयाँ ढाँचामा हुन लागेको महिला लिग समेत रोक्न एन्फा बाध्य भयो ।

त्यसयता सुनसान रहेको फुटबलले अब भने गति लिने संकेत देखिएको छ ।

सरकारले असोज अन्तिम साता अन्तराष्ट्रिय मैत्रीपूर्ण खेलका लागि तयारी सुरु गर्न स्विकृत दिएसँगै करिब ७ महिनापछि नेपाली फुटबल मैदान फर्किएको हो ।

दक्षिण एसियाली मुलुक बंगलादेशले दुई मैत्रीपूर्ण खेलका लागि नेपाललाई प्रस्ताव गरेपनि सरकारको अनुमती नपाएपछि एन्फाले कुनै निर्णय लिन पाएको थिएन । तर सरकारको प्रशिक्षणको अनुमती दिएसंगै एन्फाले बिहीबारबाट प्रशिक्षण आरम्भ गरेको छ ।

कार्तिक २८ र मंसिर २ गते हुने दुई मैत्रीपूर्ण खेलका लागि एन्फाले दशैं लगत्तै खेलाडीलाई काठमाडौंमा बोलाएर प्रशिक्षण सुरु गरेकाे छ ।

पहिलो दिन प्रशिक्षणमा केही खेलाडी भने सामेल भएनन् ।

पहिलो दिन गरिएको स्वाव परिक्षणमा ४ खेलाडीको रिपोर्ट पोजेटिभ आएपछि एन्फाले खेलाडीलाई अन्यत्र होटेलमा सारेको छ ।

एन्फाले एक हप्ताको तयारीपछि खेलाडीलाई बंगलादेशको राजधानी ढाका लैजाने तयारी गरेको छ ।

एन्फाले कोभिड–१९ को स्वास्थ्य सुरक्षा मापदण्ड अनुसारनै तयारी सुरु गरेको छ । सोही अनुरुप एन्फाले मैदानमा खेलाडी र अफिसियल बाहेक अन्यलाई प्रवेशमा रोक लगाएको छ । अब नेपाली टिम एक हप्ताको तयारीपछि बंगलादेशको राजधानी ढाका पुग्नेछ । जहाँ पुनः टिमको स्वाव परिक्षण हुनेछ ।

नेपाली टिमलाई बालगोपाल महर्जनले मुख्य प्रशिक्षकको रुपमा नेतृत्व गर्नेछन् । यसअघि चैत पहिलो साता नेपाली टिमलाई प्रशिक्षण गराएका मुख्य प्रशिक्षक योहान कालिन कोरोना महामारीकाबीच स्वेदश (स्विडेन) फर्किएपछि एन्फाले महर्जनलाई टिमको अस्थायी जिम्मेवारी दिएको हो ।

सहायक प्रशिक्षकमा किरण श्रेष्ठनै रहदाँ गोलरक्षक प्रशिक्षकका रुपमा पूर्व खेलाडी विकाश मल्ललाई एन्फाले जिम्मेवारी दिएको छ । यसअघि राष्ट्रिय टिमलाई जापानी प्रशिक्षक र नविन महर्जनले प्रशिक्षण दिँदै आएका थिए । दुवै उपलब्ध नहुने भएपछि एन्फाले मल्ललाई जिम्मेवारी सुम्पिएको हो ।

यसअघि चैतमा पोखरामा आयोजित आहा रारा गोल्डकप खेलेपछि घरमै थन्किएका खेलाडी भने मैदान फर्कन पाउँदा खुसी देखिन्छन् ।

राष्ट्रिय फुटबल टिमका फरवार्ड भरत खवास धेरै समयपछि मैदान फर्कन पाउँदा खुसी लागेको बताउँछन् ।

‘धेरै समयपछि मैदान फर्कन पाउँदा खुसी छौं । धेरै पछि फुटबल सुरुवात भएको छ । मैदान आएका छौ । फुटबल सुरु हुनेमा खेलाडी आशाबादी थिए ।’ आर्मी क्लबका कप्तान समेत रहेका भरतले भने ।

उनले धेरै समयपछि मैदान फर्कदा फिटनेशमा केही समस्या देखिएको बताए ।

‘धेरै समय भएको थियो, मैदानमा अभ्यास नगरेको । पहिलो दिन केहि समस्या पक्कै भयो । फिटनेशलाई अलिकति समस्या छ । समय थोरै भएपनि जसरी हुन्छ फिट हुने प्रयास गर्छौ । चाँडो भन्दा चाँडो लयमा आउने प्रयास गछौं ।’ उनले भने ।

डिफेन्डर बिक्रम लामा पनि फुटबल सुरु भएको निकै खुसी देखिन्छन् ।

उनले धेरैपछि मैदान फर्कदा नौलो अनुभव भएको र खुसी लागेको बताए ।

‘धेरै पछि मैदान फर्कन पायौं । मैदान फर्कदा खुसी महशुश भएको छ ।’ उनले सुनाए ।

ए डिभिजन क्लब थ्री स्टारका कप्तान समेत रहेका बिक्रमले टिमको फिटनेशमा समस्या भएपनि फुटबल सुरु भएकोमा आफुहरु खुसी रहेको बताए ।

‘फिटनेशमा समस्या पक्कै छ । यसअघि घरमा आफैले अभ्यास गरेकाले अहिले केही सहज भयो । केहि दिनमै मैदान फर्कन पक्कै गाह्रो हुन्छ । बंगलादेशको पनि समस्या फिटनेशनै हो । फुटबल फर्किएकोमा खुसी छौं ।’ उनी भन्छन् ।

यसअघि फिफा विश्वकप छनोट अन्तर्गत भुटानको थिम्पुमा कुवेतविरुद्ध खेलेको राष्ट्रिय फुटबल टिमले त्यसयता पहिलो पटक अन्तराष्ट्रिय फुटबलमा बंगलादेशसँग खेल्न लागेको छ ।

भारतीय आईलिग छनोटमा मोहम्मेदन स्पोर्टिङ क्लबलाई शीर्ष डिभिजनमा बढुवा गरि स्वदेश फर्किएका अभिषेक रिजालले भने मैदानमा केही सजिलो महशुश गरे ।

उनले अन्य खेलाडी भन्दा आफुलाई फिटनेशमा केही सहज भएको बताए ।

‘पहिलो दिन खासै समस्या भएन । भारतमा सुरुवाती चरणका निकै समस्या थियो । अहिले फिटनै छु । ८ महिनापछि राष्ट्रिय टिममा जोडिन पाउँदा खुसी छु ।’ आईलिग छनोटमा २ गोल गरेका अभिषेक भन्छन् ।

राष्ट्रिय फुटबल टिमले ७२ सालको भुकम्पछि पहिलो पटक दशरथ रंगशालामा अभ्यास गरेको हो । भुकम्पले रंगशालामा क्षती पुगेपछि राष्ट्रिय फुटबल टिमले त्रिपुरेश्वरस्थित मैदानमा खेल्न पाएको थिएन ।

रंगशाला पुननिर्माणपछि १३ औं सागको उद्घाटन र समापन यसै मैदानमा भएको थियो । दशरथ रंगशालामै नेपालले १३ औं सागमा फुटबलतर्फ स्वर्ण पदक जितेको थियो ।