सागको सामान खरिदमा भ्रष्टाचार भएको निष्कर्श

काठमाडौं । १३ औं दक्षिण एसियाली खेलकुद प्रतियोगिता (साग)को ब्याडमिन्टन खेलको सामान खरिदमा अनियमितता भएको पाईएको छ ।

साग प्रतियोगिताको दौरान ब्याडमिन्टन खेलाडीको जुत्ता र म्याट खरिदमा अनियमितता भएको भन्दै छानविन गर्न युवा तथा खेलकुद मन्त्रालयले राष्ट्रिय खेलकुद परिषद् (राखेप)लाई निर्देशन दिएको थियो ।

मन्त्रालयको निर्देशन अनुसार राखेपले भदौ ३ गते बोर्ड सदस्य गोबिन्द्र भट्टराईको नेतृत्वमा ५ सदस्यीय छानविन समिति गठन गरेको थियो ।

समितिले झण्डै डेढ महिना लगाएर तयार पारेको छानविन प्रतिवेदन हिजो (मंगलबार) राखेप सदस्य सचिव रमेशकुमार सिलवाललाई बुझाएको छ ।

समितिले ब्याडमिन्टनको जुत्ता खरिदमा प्रष्ट रुपमा अनियमितता भएको देखिएको बताएको छ ।

जुत्ता किन्न खेलाडीको पैसा निकासा भएको तर खेलाडीले सामान नपाएको देखिएको प्रतिवेदनमा उल्लेख छ ।

‘ब्याडमिन्टनको जुत्ता खरिदमा प्रष्ट रुपमा अनियमितता देखिएको छ । खेलाडीको जुत्तामा पैसा निकासा भएको छ । तर खेलाडीले पाएको छैनन् ।’ छानविन एक सदस्यले खेलपाटीसंग भने ।

समितिले ब्याडमिन्टनको म्याट खरिदमा समेत अनियमितता भएको निष्कर्श निकालेको छ ।

‘ब्याडमिन्टनको म्याच गुणस्तरहिन देखिन्छ । पैसा अनुसारको सामान देखिदैन ।’ ती सदस्यले भने ।

समितिका सदस्य छानविनको क्रममा स्थलगत निरिक्षणका लागि पोखरा समेत पुगेका थिए । निरिक्षणको क्रममा म्याटको दुर्दशा देखेर आफुहरु चिन्तित बनेको समितिका अर्का एक सदस्यले खेलपाटीलाई बताए ।

‘म्याट खरिदमा लगाईएको आरोपमा आंशिक सत्यता देखिन्छ । तर पोखरामा निरिक्षणको क्रममा जादा ब्याडमिन्टनको हलमा पानी चुहिएको देखियो । म्याट काम नलाग्ने अवस्थामा पुगेको छ । जति रकममा किनेपनि संरक्षण नहुदाँ खेलकुद सम्पत्तीको बिजोग देखिन्छ ।’ उनले भने ।

समितिले छानविनको क्रममा २३ जनासंग बयान लिएर ४१ पेजको प्रतिवेदन राखेप सदस्य सचिव समक्ष बुझाएको छ ।

समितिले सामान खरिद वितरणमा नीतिगत सुधारको सुझाव दिदै प्रक्रियागत भ्रष्टाचार देखिएको निष्कर्श निकालेको हो ।

समितिले प्रतियोगिताको दौरान राखेप र संघहरु बीच समन्व्यको प्रष्ट अभाव देखिएको बताएको छ ।

‘संघका पदाधिकारीसंग छानविनका क्रममा सोधपुछ गर्दा आफुलाई कुनै जानकारी नभएको जवाफ दिए । सबै काम राखेपका कर्मचारीले गरेको हुदाँ त्यसको जिम्मेवार पनि उनीहरुनै हुने संघका पदाधिकारीको बयान छ ।’ एक सदस्यले उल्लेख गरे ।

परिषद्का बोर्ड सदस्य सुबास श्रेष्ठले सागमा ब्याडमिन्टनमा खेलाडीको जुत्ता तथा म्याट खरिदमा अनियमितता भएको भन्दै छानविन गर्न माग गरेपछि मन्त्रालयको निर्देशनमा राखेपले छानविन समिति गठन गरेको थियो ।

समितिमा बोर्ड सदस्य भट्टराई सहित अर्जुन बिक, महेन्द्रकुमार राई, नारायण अर्याल, पासाङ शेर्पा सदस्य रहेका थिए ।

परिषद्ले समितिलाई छानविनका लागि १५ दिनको समय दिएको थियो । तर सरकारले उपत्यकामा गरेको निषेधाज्ञाका कारण छानविन निर्धारित समयमा पुरा हुन पाएको थिएन । लगत्तै राखेपले १५ दिनको समय थप गरेको थियो । समितिले मंगलबार मात्र प्रतिवेदन राखेप समक्ष बुझाएको हो ।

प्रतियोगिता सम्पन्न भएको झण्डै १० महिना बितेपनि राखेपले सागको खर्च विवरण सार्वजनीक गरेको छैन । कार्यविधिले प्रतियोगिता सम्पन्न हुने बित्तिकै खर्च विवरण सार्वजनकि गर्नुपर्ने उल्लेख छ ।