काठमाडौं । विश्व पारा पावरलिफ्टिङ अर्गनाइजेसनको दोस्रो अनलाईन विश्वकप सिरिजमा तीन नेपाली खेलाडीले सहभागिता जनाएका छन् ।
कोरोना भाईरसको महामारीपछि अर्गनाइजेसनले आयोजना गरेको सिरिजमा तीन खेलाडीले सहभागिता जनाएको प्रशिक्षक संजय महर्जनले जानकारी दिए ।
सिरिजमा नेपाली खेलाडीहरु निर्मला भण्डारीले ५५ केजी समूहमा, दुर्गामान तामाङ्गले ८० केजी र शरद पौड्यालले ९० केजी तौल समूहमा प्रतिस्पर्धा गरेका छन् ।
निर्मलाले पहिलो लिफ्टमा ४५ केजी, दोश्रोमा ५० र तेश्रोमा ५५ केजी भार बहन गरेकी थिईन् । यस्तै पौड्यालले पहिलोमा ८५ केजी, दोश्रोमा ९० केजी र तेश्रोमा ९५ केजी तथा तामाङले पहिलोमा ९० केजी, दोश्रोमा ९५ केजी र तेश्रोमा १०५ केजी तौल भार बहन गरेका थिए ।
कम्मर मुनिको भागमा अपाङ्गता रहेका ब्यक्तिहरुले प्रतिस्पर्धा गर्ने उक्त बिश्व कप सिरिजमा नेपाल सहित २० राष्ट्रका ४३ खेलाडीहरुले प्रतिस्पर्धा गरेका थिए ।
११ देखि २४ मे सम्म भएको प्रतिस्पर्धाको २५ देखि ३१ मे सम्म टेक्निकल अफिसियल जजमेण्ट समय रहेको र जुन २ तारिखका दिन नतिजा प्रकाशन गरिने छ ।
सिरिजमा प्रतिस्पर्धा गर्ने खेलाडीहरुले अनलाईन वरीयता प्राप्त गर्नुका साथै प्रमाण पत्र प्राप्त गर्नेछन् ।
