काठमाडौं । नेपाली कीर्तिमानी पौडीवाज गौरिका सिंहले १३ औं दक्षिण एसियाली खेलकुद (साग) मा महिला खेलाडीको प्रदर्शनले नेपालमा अब महिलालाई खेलकुदमा लाग्न प्रेरणा मिलेको बताएकी छिन् ।
१३ औं साग अन्तर्गत आइतबार ४ सय मिटर फ्रिस्टाइलमा स्वर्ण जित्दै कीर्तिमान बनाएपछि गौरिकाले आफ्नोसहित अन्य महिला खेलाडीको प्रदर्शन अन्य महिला खेलाडीलाई प्रेणित गर्ने बताईन् ।
'सागमा महिलाले धेरै पदक हात पार्दा निकै खुसी छु,' गौरिकाले भनिन्, 'नेपालमा अब महिलालाई पनि खेलकुदमा लाग्न प्रेरणा मिलेको छ ।'
आइतबार स्वर्ण जितेसँगै गौरिकाले एकै सागमा तीन स्वर्ण जित्ने पहिलो नेपाली खेलाडीको कीर्तिमान बनाईन । यस्तै गौरिका साग खेलकुदमा सबैभन्दा सफल महिला खेलाडी बनिन् ।
१७ वर्षीय गौरिकाले पौडीको ४ सय मिटर फ्रिस्टाइलसहित २ सय मिटर ब्याकस्ट्रोक र २०० मिटर फ्रिस्टाईलमा स्वर्ण जितेकी थिइन् ।
साग पौडीको एकल स्पर्धामा नेपाललाई स्वर्ण दिलाउने पहिलो महिला खेलाडी बनेकी गौरिकाले आफुले जितेको पदकबाट अन्य धेरै महिलालाई खेलकुदमा आउन प्रोत्साहन मिल्ने बताईन् ।
'मैले कीर्तिमान बनाए भन्दा निकै खुसी लागेको छ । अरु महिलालाई पनि मबाट प्रोत्साहन मिल्नेछ,' गौरिकाले थपिन् ।
नेपालमा जारी १३ औं सागको आठौं दिनसम्म गौरिकासहित २० महिला खेलाडीले व्यक्तिगततर्फ स्वर्ण जितेका छन् ।
गौरिकाले आफुले जितेको तेस्रो स्वर्ण पदक आफ्नो हजुरबुबालाई समर्पित गरेको बताईन् ।
'मेरो पहिलो स्वर्ण नेपाललाई थियो, दोस्रो मेरो च्यारिटिलाई भयो । तेस्रो स्वर्ण मेरो हजुरबुवालाई । जसको जन्मदिन नजिकिंदै छ,' गौरिकाले भनिन् ।
गौरिकाले नेपालमा बनेको पौडी पोखरीले आफुलाई खुशी लागेको समत बताईन् ।
'भौतिक संरचना बनेको कुराले निकै खुशी छु,' गौरिकाले भनिन्, 'हुन्छ की हुँदैन् भन्दा भन्दै छोटो समयमा यति राम्रो बन्छ भनेर विश्वास लागेको थिएन् ।'
गौरिकाले आफुले स्वर्ण जित्दा अनुभव बयान गरेर नसकिने समेत बताईन् ।
