काठमाडौं । 'ए' डिभिजन क्लब संकटाको फुटबल मैदान तयार भएको छ । काठमाडौंको रैथाने क्लब संकटाले भक्तपुरको पलासेमा नयाँ मैदान तयार पारेको हो ।
एएफसीले आफ्ना सदस्य राष्ट्रका शीर्ष डिभिजनका क्लबलाई सन् २०२० भित्र ए लाईसेन्स मान्यता प्राप्त बनाउन निर्देशन दिएको छ । त्यसका लागि क्लबको आफ्नै मैदान पहिलो मुख्य शर्त हो ।
सोही अनुसार संकटाले ए लाईसेन्सको प्रक्रियामा जान मैदान तयार गरेको हो ।
संकटाले करिब ३१ रोपनी जग्गा भाडामा लिएको छ । मैदानलाई सम्याएर दुबो उमारिएको छ ।
अखिल नेपाल फुटबल संघ (एन्फा) ले मंसिर २८ गते ए डिभिजन लिग सुरु गर्ने तयारी गरेको छ । लिग अगावै संकटाले आफ्नै मैदान तयार गरेको हो । यसै साता एक कार्यक्रमको आयोजना गरेर संकटाले मैदान उद्घाटनको तयारी गरेको छ ।
‘शनिबार मैदान उद्घाटनको तयारी छ । लिगको नजिक छौं । आफ्नै मैदानमा तयारी गर्दा राम्रो हुन्छ ।’ एन्फाका महासचिव समेत रहेका क्लब अध्यक्ष इन्द्रमान तुलाधरले खेलपाटीसँग भने ।
नेपाली फुटबलमा ६ दशकको लामो इतिहास बोकेको संकटाले ३१ रोपनी जग्गा १५ वर्षको भाडामा लिएर मैदान निर्माण गरेको हो । क्लबले स्थानिय जग्गा धनीलाई मासिक ९१ हजार भाडा दिनेछ ।
![](https://scontent.fktm7-1.fna.fbcdn.net/v/t1.15752-9/s2048x2048/71144983_2496339230639708_8660252144462462976_n.jpg?_nc_cat=108&_nc_oc=AQmW1eiGiCVRDYJD_KX6ITWKdYLDpYlaNBirXbDWG4C5E0_3hYUkWGBSqAb7wvxy6UY&_nc_ht=scontent.fktm7-1.fna&oh=e41975cf254bafea490e862d7558ab43&oe=5E83B8DB)
मैदानसंगै संकटाले ५ वर्षभित्र युथ एकेडेमी पनि तयार पार्ने तयार गरेको छ ।
जग्गा भाडामा लिएको २ वर्षमा क्लबले मैदान तयार पारेको हो ।
क्लबले ५ वर्षभित्र मैदान सहित एकेडेमी तयार पार्ने गुरुयोजना बनाएको थियो । सोही अनुसार संकटाले अबको डेढ बर्षमा एकेडेमी, चेन्जिङ रुप लगायतका पुर्वाधार निर्माण गर्ने बताएको छ ।
गत वर्षको लिग रेलिगेशन बिना सम्पन्न बन्यो । संकटा उपविजेता भयो । नयाँ सिजनको लिग रेलिगेशन सहितको हुनेछ ।
‘अहिले मैदान मात्रै तयार भएको छ । मैदानमा हुनुपर्ने अन्य पुर्वाधार तयार भएको छैन । घरेलु फुटबलमा होम एण्ड अवे अवधारणा भएको छैन । यो बर्ष मैदानमा कुनै खेल हुनेछैन । मैदान बनाउने काम पनि चलिरहेको छ । घर भाडामा लिएका छौं । त्यो खेलाडीका लागि प्रयोग हुन्छ ।’ तुलाधरले भने ।
तीन पटकको लिग च्याम्पियन संकटाले अहिले आफ्नै भवन तयार पार्दैछ । पौने २ आनामा बन्दै गरेको भवनले समेत अन्तिम रुप पाउँदैछ । पाँच तलाको बन्दै गरेको भवनमा खेलाडी होस्टेल पनि रहनेछन् ।
काठमाडौंको रैथाने क्लब भएपनि आफ्नै भवन बनाउन नसकेको संकटाले अब क्लबलाई परिस्कृत बनाउने तयारी गरेको छ । उसले विगत तीन बर्षबाट खेलाडीहरु क्लबमा अनुबन्धन गरेर राखेको छ ।
![](https://scontent.fktm7-1.fna.fbcdn.net/v/t1.15752-9/s2048x2048/75610775_739573246549791_2924830491867611136_n.jpg?_nc_cat=102&_nc_oc=AQl7BDwzAVl4hG9e5d9uk2X5M8kAeSwb0AjLuRmBPVLT0i7egef9LsQqjfOi_X65O-U&_nc_ht=scontent.fktm7-1.fna&oh=6a91c66942ae8de5bb92f286ffd60b02&oe=5E8A2CBF)
संकटाले आफ्नौ ५० औ बर्षगाँठमा क्लबको नाम परिवर्तन गर्यो । संकटा ब्वाईज स्पोर्टस् क्लबबाट संकटा क्लबमा रुपान्तरण भयो । तर जब नाम परिवर्तन भयो, उसले लिग जित्न सकेको छैन ।
उसले सन् १९८०, ८३ र ८५ मा लिग जितेको थियो ।
क्लबले भक्तपुरमा रहेको क्लबको मैदानमा खेलाडीलाई दैनिक प्रशिक्षण गराउने योजना बनाएको छ । जसमा स्कुले बालबालिका समेत खेल्न पाउनेछन् । जसबाट क्लबको आर्थिक हैसियत समेत उकासिने लक्ष्य राखिएको छ । हाल एन्फाले आफ्नो टेक्निकल सेन्टरमा साताको अन्तिम दिन बालबालिकालाई शसुल्क प्रशिक्षण गराउने गरेको छ । संकटाले अब त्यही सुत्रलाई पछ्याउनेछ ।
२००८ सालमा स्थापित संकटाको आर्थिक हैसियत करिब १ करोडमाथि रहेको क्लबको भनाई छ । जो अरु क्लबको तुलनामा राम्रो मानिन्छ ।
अब उसले फुटबल लिगमा मात्र खर्च गर्नेछैन । लिग जित्न कुनैसमय मोटो रकम खर्चिदा आर्थिक भारले थलिएको संकटा भुक्तभोगी आफै छ ।
![](https://scontent.fktm7-1.fna.fbcdn.net/v/t1.15752-9/s2048x2048/75462307_427404348190684_66189272847220736_n.jpg?_nc_cat=105&_nc_oc=AQlYPgR47lMDpo3l-t_BeCB2OEAE6cpm94jE_0x2jzApYq0McffapgHQjhA-xpIInTE&_nc_ht=scontent.fktm7-1.fna&oh=9a21b91fc5d4be803c4b8fa38d59e064&oe=5E89B717)
सोही कारण संकटाले अब ठुला खेलाडीमा आँखा नलगाउने संकेत गरेको छ । नयाँ सिजनको लिगको लागि एपीएफबाट खेल्दै आएका मिडफिल्डर राजेन्द्र रावल र गोलरक्षक विनय श्रेष्ठलाई संकटाले टिममा थपेको छ ।
संकटासँग अहिले राष्ट्रिय टिममा दुई खेलाडी छन् ।
डिफेन्डर सरोज दाहाल र मिडफिल्डर सुभाष गुरुङको साथ पाएको संकटाले नयाँ सिजन ठुला खेलाडी ल्याउने छैन ।
‘हामी अघिल्लो सिजननै दोस्रो भएको छौं । झन खेलाडी थप्यो भने प्रथम होला भन्ने डर छ ।’ ब्याङ्गयात्मक शैलीमा उनले भने, ‘अन्धाधुन्दा खर्च गरेर काम छैन । पहिलेको जस्तै हुन्छ । क्लबको आर्थिक स्थिती करोडमाथिको छ । एन्फा, महानगर र प्रायोजकबाट आएको पैसा फुटबलमै खेर फालेर हुन्न । फेरि पुरानै दिनमा फर्कन पर्ने अवस्था हुन्छ । जति आम्दानी छ । त्यसको आधा मात्र खेलाडीमा खर्च गर्ने हो ।’
संकटाले नयाँ सिजनका लागि प्रशिक्षकमा विजय महर्जन र सल्यान खड्गीलाई जिम्मेवारी दिएको छ । गोलरक्षक प्रशिक्षकमा भने अजय महर्जन रहनेछन् ।
![](https://scontent.fktm7-1.fna.fbcdn.net/v/t1.15752-9/s2048x2048/77238892_1012176029135496_3624234987961712640_n.jpg?_nc_cat=110&_nc_oc=AQm99LCT95hli8F0qrSCL9OTFFo0133wjw6wz2CqLmuckMiDoayqkGzZQAmYfRqceKw&_nc_ht=scontent.fktm7-1.fna&oh=85db592de0813bd5b06f2257c2b2b5e5&oe=5E4BACC5)