इटहरी स्ट्याग्सलाई उपाधि 

काठमाडौं । नेपाल बास्केटबल लिग (एनबीएल) थ्री अन थ्री इस्ट अन्तर्गत धरानको उपाधि इटहरी स्ट्याग्सले जितेको छ ।

धरानको इन्डोर बास्केटबल कोर्टमा शनिबार होराइजन 'ए' लाई पराजित गर्दै इटहरी स्ट्याग्सले उपाधि जितेको हो । फाइनलमा इटहरीले होराइजनलाई १३–१० को झिनो अन्तरले पराजित गर्यो ।

यसअघि भएका सेमिफाइनलमा इटहरीले आफ्नै 'बी' टिमलाई १५–८ ले पराजित गरेको थियो भने होराइजन 'ए' ले पनि आफ्नो 'सी' टिमलाई १२–९ ले हराएको थियो ।

धरानको प्रतियोगितामा कुल १६ टिमको सहभागिता रहेको थियो ।

यसै उपाधि जितेको इटहरी र उपविजेता होराइजन अब भाद्र १० मा विर्तामोडमा हुने थ्री अन थ्री इस्टको फाइनल चरणमा छनोट भएका छन् ।