काठमाडौं । १८ महिना अघिको कुरा हो । ब्रिजेशको खेल्ने क्रममा खुट्टाको लिगामेन्ट गयो । उनी थला पर्न पुगे । जब उनले चोट बोके, खेलमा फर्कने आश मारिसकेका थिए । उनलाई खेल्ने सम्भावना सकिए जस्तो लाग्न थालेको थियो । खुट्टा चल्न छाडेपछि खेलाडी पलायन हुनुपर्ने तितो यथार्थ उनले देखेका थिए । घर परिवारले समेत फुटबलमा नलाग्न भन्न थाले । सानैदेखि फुटबलसंग अभ्यस्त भएका उनी फुटबल छाड्न भने सक्दैन थिए ।
उनै ब्रिजेश झण्डै हप्ता दिन अघि राजधानीमा सकिएको ललित स्मृति च्याम्पियनसिपमा सर्वोकृष्ट फरवार्डको रुपमा देखा परे । ब्रिगेड ब्वाईजलाई उपाधि दिलाउन नायकत्व प्रर्दशन गरेका उनी प्रतियोगिता अवधिभर आफ्नो प्रभाव छाड्न सफल भए । सप्तरी घर भएका ब्रिजेश एन्फा एकेडेमीका उत्पादन हुन् । चोट मुक्त हुदै मैदान फर्किएका उनले खेल जिवनमा एक उत्कृष्ट पुनरागमन गर्न सफल देखिए ।
मैदान फर्कनु अघि उनले पर्याप्त तयारी गरेका भने थिएनन् । तर ललित स्मृतिको पहिलो खेलमा सरस्वतीविरुद्व मैदान उत्रर्दा उनले लोभलाग्दो प्रर्दशन गरे । पहिलो खेलमा ह्याट्रिक गर्न सफल रहे । अनि प्रतियोगिताभर ८ गोल गर्दै सर्बाधिक गोलकर्ता भए ।
‘पहिलो खेलमै ह्याट्रिक भयो । त्यसपछि भने मलाई खेल्न केहि सजिलो भयो । मैले सोचेको पनि थिईन, पुनरागमन यति सजिलो हुन्छ भनेर ।’ ब्रिजेशले खेलपाटीसंग भने ।
‘मैदानमा फर्किएको दिनको अनुभव शब्दमा बयान गर्न सक्दिन ।’ उनी भन्छन् ।
नेपालमै आयोजना भएको एएफसी यू–१६ छनोट खेल्दा ब्रिजेशले खुट्टामा चोट बोकेका थिए । नेपाल प्रतियोगिताबाट बाहिरिसकेको थियो । तर पनि प्रशिक्षक सुनिल श्रेष्ठले युवा स्टार ब्रिजेशलाई मैदान बाहिर राख्न खाेजेनन् ।
प्रशिक्षकको निर्णयलाई सहि सावित गर्दै उनले खेलको पहिलो हाफमै प्यालेस्टाईनविरुद्ध अग्रता नदिलाएका पनि हैनन् ।
खेलाडीलाई चोट बोक्ने मन कहाँ हुन्छ र ?
खेलको दौरान ब्रिजेश हेडिङ गर्ने समय बिपक्षी खेलाडीसँग ठोक्किदै मैदानमा बजारिन पुगे । उनलाई तत्काल मैदानबाट निकालियो । खेलमा नेपाल प्यालेस्टाईनसँग २–१ गोल अन्तरले पराजित भयो ।
सुरुमा चोट सामान्य देखियो । तर बिस्तारै सताउन थाल्यो । शल्यक्रिया गर्न पर्ने भयो । त्यो समय उनी एन्फा एकेडेमीबाट निस्किसकेका थिए ।
शल्यक्रियाका लागि उनी ग्राण्डी हस्पिटल पुगे । एन्फा होस्टेल छाडेका उनी टेकुस्थित दाजु अमितसंग बस्न थालेका थिए । त्यही समय हो, दाजुले उनलाई पर्याप्त सहयोग गरेकाे ।
घाईते हुनुको पिडा भन्दा साथीका व्यवहारले उनको मन कटक्क खायो । आफ्नै साथीको व्यवहार फेरिदै गयो । आफ्नै ब्याजका साथीहरु बोल्न छाडे । बोल्दा झर्कन थाले । साथीहरुले बिस्तारै साथ छाडे । तर उनले हरेश भने खाएनन् । समयले सबै चिजको परिक्षा लिने रैछ, उनले बुझ्दै गए ।
‘जव म बिरामी भए । साथीहरु पनि टाढा भए । आफुलाई गाह्रो पर्दा यस्तै हुनेरहेछ ।’ पुराना दिन सम्झिदै ब्रिजेश भन्छन् । तर अहिले भने समय फेरिएको छ । साथीहरु नजिक हुन थालेका छन् । उनको पुनरागमनमा चर्चा फुटबल वृत्तमा व्यापक छ ।
ब्रिजेशलाई घाँईते हुँदा फुटबल जिवनबाट टाढिन्छु भन्ने पिर लागेको थियो । घर परिवारमा चर्चा नचलेको पनि हैन । तर मनले ब्रिजेशलाई फुटबलबाट ढाटिन कहाँ दिन्थ्यो र ?
‘घाईते भएर बस्दा रोहित दाई (रोहित चन्द) र बिक्रम दाई (बिक्रम लामा) ले धेरै सहयोग गरे । उनिहरुले मनोबल बढाउने काम गरे । त्यसैले गर्दा खेल छाड्न मन लागेन ।’ ब्रिजेश भन्छन् ।
‘खेल छाड्नु हुँदैन । मेहनत गर्नुपर्छ । मेहनत गरे जे पनि हुन्छ भनेर दाजुहरुले हौसला दिए । मेहनत पनि गरे ।’ उनी भन्छन्, ‘घाईते भएको बेला साथीहरुले पनि बोल्न छाडे । हेप्न थाले । त्यसले पनि केहि गर्नुपर्छ भन्ने ईखले फुटबलमा संघर्ष गर्न सफल रहे ।’
चोटले लामो समय थलिएका ब्रिजेश फुटबलमा फर्कन सकेका छन् । तर उनलाई अब घाईते हुने मन छैन । उमेरले सकुन्जेल फुटबल खेलिरहन मन छ ।
ब्रिजेश काठमाडाै छिरेको धेरै भएको छैन । ४ बर्षअघि सप्तरी कुशाहाका ब्रिजेशले काठमाडौं टेकेका थिए । स्थानीय प्रशिक्षक सुजित चौधरीकै कारण उनले एन्फा एकेडेमीसम्मको यात्रा तय गरे । उनी आजको दिनमा जहाँ छन्, यसको सम्पुर्ण श्रेय सुजितलाई जान्छ ।
प्रशिक्षक सुजितले ब्रिजेशलाई एन्फा एकेडेमीसम्म आउने बाटो देखाई दिएका थिए । बाँकी यात्रा ब्रिजेश आफैले तय गरे । सुजितकै निर्देशन अनुसार ब्रिजेश सप्तरी, इटहरी जिल्ला छनोट हुँदै एन्फा एकेडेमीसम्मको यात्रा तय गरे । एन्फामा फुटबलको कला तिखार्ने मौका पाए । फुटबल सिप र कला अझै तिखार्नुपर्ने ब्रिजेशलाई लागेको छ । तर काठमाडौंको एउटा गल्लीमा बसेर ज्यान पाल्न गाह्रो छ । ब्रिजेशले पछिल्ला १८ महिनामा जिवनलाई नजिकबाट पढेका छन् ।
फुटबललाई जिवन सम्झिएर, देशको झण्डालाई सपनामा सजाएर अघि बढेका ब्रिजेशले पहिलो गाँसमै ढुङ्गा भेटे । घाईत हुदाँ उपचार खर्च नपाएर तड्पिनुको नमिठो व्यथा उनले भोगेका छन् ।
एक मनले विदेशमा पलायन हुने नसोचेका पनि हैनन । तर उनलाई पहिलो प्रेमले रोक्यो । उनले फुटबलसंग पहिलो प्रेमको बाचा गरिसकेका थिए । उपचार खर्च नहुदाँ उनले विदेश जाने धेरै योजना नबनाएका हैनन । तर उनले फुटबल छाड्न सकेनन् । फुटबलले उनलाई टाढा हुनै दिएन ।
उपचार गर्न उनले शाहुसंग ऋण लिए । खेलेरै ऋण तिर्न सक्ने अवस्था अझै बनेको छैन । देशका लागि खेल्दा घाईते भए । खुट्टाको शल्यक्रिया गरे । झण्डै ४ लाख खर्च भयो ।
उपचार खर्चको नाममा उनले एन्फाबाट २५ हजार र राखेपबाट १ लाख नपाएका होईनन् । तर कमजोर आर्थिक हैसियत भएका ब्रिजेशलाई बाँकी पैसा जुटाउनै हम्मे हम्मे पर्यो । पैसा नपुगेपछि उनले एन्फाका ढोका–ढोका नपुगेका हैनन् । तर ‘चेन्ज एन्फा’को नाराभित्र उनले उपचारका लागि पाउने सहायता पर्दैन थियो क्यारे ।
उपचारका लागि लिएको ऋण अब फुटबल खेलेरै तिर्ने उनको योजना छ । आउँदो सिजन उनी ए डिभिजन लिगमा ब्रिगेड ब्वाईजबाट खेल्दैछन् । सानो क्लबबाट लिग खेल्दै ठुला क्लबको नजरमा पर्ने उनकाे चाहना छ । उनी पैसाको जोहो गरेर उपचार गर्दा लागेको ऋण तिर्न चाहन्छन् ।
ब्रिजेश विश्व फुटबलमा आफ्नो ‘आईडल’ बार्सिलोनाका स्टार लियोनल मेस्सीलाई मान्छन् । उनकै खेल पछ्याउने गर्छन् । गोल गर्दा पनि सेलिब्रेशनमा मेस्सीकै शैली अपनाउछन् ।
यता घरेलु फुटबलमा भने उनको ‘आईडल’ विमल घर्ति मगर हुन् । विमल जस्तै सानै उमेरमा नाम कमाउन उनलाई मन छ । अझ राष्ट्रिय टिममा विमलसँग अग्रपंक्तिमा खेल्ने उनको धोको छ ।
ब्रिजेशले युथ स्तरमै ताजकिस्तानमा र श्रीलङ्कामा भएको यू–१४ फेस्टिबलमा खेलिसकेका छन् । नेपालमै आयोजना भएको साफ यू–१५ च्याम्पियनसिपमा देशको प्रतिनिधित्व गरिसकेका छन् । फाईनल सहित प्रतियोगिता अवधिभर उनले ४ गोल गरेका थिए । तर देशलाई उपाधि दिलाउन भने असफल रहे ।
ब्रिजेश फुटबलको ‘टर्निङ प्वाइन्ट’ सन् २०१७ लाई मान्छन् । हलचोकमा भएको एएफसी छनोटमा तीन खेलमा उनले तीनै गोल गरेका थिए । तर नेपाल दोस्रो चरणमा छनोट हुन सकेन ।
दक्षिण एसियाको बलियो टिम भारतविरुद्व नेपालले २–२ गोलको बराबरी खेलेको थियो । दुवै गोल ब्रिजेशले गरेका थिए । सुरुवातमा गोल गर्दै नेपाललाई अग्रता दिलाएका ब्रिजेशले अन्तिममा बराबरी गोल समेत फर्काएका थिए । त्यही समय हो ब्रिजेशले आफुलाई सम्भावित स्टार खेलाडीको रुपमा घरेलु फुटबलमा उभ्याएको ।
फेरी एक पटक नेपालले साफ यु–१८ च्याम्पियनसिपको आयोजना गर्दैछ, घरेलु मैदानमा । दुई बर्ष अघि हलचोकको एपीएफ मैदानबाट चोट बोक्दै ब्रिजेश बाहिरिएका थिए । तर उनी फेरी अझ बलियो भएर मैदान फर्किएका छन् । उमेर समुहको साफ जित्दै ब्रिजेश आफ्नो पुनरागमनलाई सार्थक बनाउन चाहन्छन् ।
याे पनि, ब्रिजेशकाे भिडियाे कथा :
-1734842793.webp)
