काठमाडौं । घरेलु फुटबलमा पुलिस सफल क्लब हो । सिनियर टोलीबाट घरेलु फुटबलमा राम्रो प्रभाव छाडेको पुलिसले उमेर समुहका प्रतियोगितामा खासै राम्रो नतिजा निकाल्न सकेको छैन ।
करिब एक महिना अघि उमेर समुहको प्रतियोगिता ललित स्मृति अन्डर १८ च्याम्पियनसिप आयोजना हुने टुङ्गो लाग्यो । पुलिसले प्रतियोगितामा खासै महत्वकांक्षा राखेको थिएन । यसअघिका तीनै संस्करणमा फाईनलसम्म नपुगेको पुलिसले दाबी गर्ने चिजपनि केही थिएन । तर आश्चार्यजनक नतिजा सहित पुलिस प्रतियोगिताको फाईनल पुग्यो । एक हिसाबले प्रतियोगितामा पुलिसले नसोचेको सफलता हात पार्यो ।
अखिल नेपाल फुटबल संघ एन्फाले हरेक बर्ष आफ्ना तत्कालिन कार्यवहाक अध्यक्ष ललितकृष्ण श्रेष्ठको स्मिृतीमा च्याम्पियनसिप आयोजना गर्छ । चौथो संस्करणको प्रतियोगिता ललितपुरको सातदोबाटोस्थित एन्फा कम्प्लेक्समा जारी छ । प्रतियोगिताको फाइनल समिकरण पुरा भैसकेको छ । उपाधिका लागि डिफेन्डिङ च्याम्पियन ब्रिगेड व्बाइज र विभागीय नेपाल पुलिस क्लब भिड्ने तय भएको छ ।
![](https://scontent.fktm7-1.fna.fbcdn.net/v/t1.15752-9/66814806_985468531784258_8222087367700250624_n.jpg?_nc_cat=103&_nc_oc=AQn-8VPlZaThN_lgOvE5Pa4aJjSmacYGXDlznJfubcFjkasgAqSxpAv_q_kn5ZFsrc4&_nc_ht=scontent.fktm7-1.fna&oh=bd04dceaa62455a947db7944b936109d&oe=5DB90242)
पुलिसले प्रतियोेगितामा पहिलो पटक फाइनल यात्रा तय गरेको हो । पहिलो संस्करणमा सेमिफाइनल पुगेको पुलिस त्यसपछिको दुई संस्करणमा भने क्वाटरफाइनलबाटै बाहिरिएको थियो ।
तर चौथो संस्करणमा भने पुलिसले फाईनल यात्रा तय गर्यो । पुलिसको रोमाञ्चक फाईनल यात्राका एक नायक प्रशिक्षक भोला सिलवाल पनि रहे ।
पहिलो पटक प्रशिक्षकको भुमिकामा मैदानमा देखिएका भोलाले डेब्यु प्रतियोगितामै पुलिसलाई फाईनलसम्मको यात्रा तय गराए ।
प्रशिक्षकको भुमिकामा पहिलो पटक फाइनल पुगेका भोला निकै खुसी देखिए ।
‘यो नतिजा सोचेका थिएनौ । पहिलो प्रयासमै फाइनल पुर्याउन सफल भएको छु । खुसी छु । मेरो एक्लो प्रयासमा सबै भएको हैन । यसमा सम्पुर्ण खेलाडी र समग्र टिमले गर्दा यहाँसम्म पुगेका हौ ।’ सेमिफाइनलमा जावलाखेललाई पराजित गरेसँगै उनले भने ।
‘हामी सुरुमा क्वाटरफाइनल पुग्ने लक्ष्य राखेका थियौ । तर टिम राम्रो हुँदै जाँदा फाइनल सम्म पुगियो ।’ उनले थपे ।
![](/uploads/images/1563451925npc.jpg)
भोला कुनै समय घरेलु फुटबलका भरपर्दा मिडफिल्डर थिए । सन् २००८ मा राष्ट्रिय टिममा स्थान बनाएका उनले कहिल्यै पछाडी फर्किएर हेर्न परेन । सन् २०१६ सम्म उनी राष्ट्रिय टिमको नियमित खेलाडी रहे ।
विदेशी प्रशिक्षक अनि स्वदेशी प्रशिक्षकको नेतृत्वमा राष्ट्रिय टिमबाट खेलेका उनीले आफुलाई सबै खेलमा प्रमाणित गर्न सफल रहे । एक समय मिडफिल्डमा उनको स्थान लिने कोही थिएनन् ।
सन् २०१६ तिर उनले घुँडामा चोट बोक्न पुगे । त्यसपछि भने राष्ट्रिय टिमबाट बाहिर रहन पुगे । घुँडाको चोटले आराम गरिरहेका भोला गत बर्ष ए डिभिजन लिगमार्फत मैदान फर्किएका थिए ।
तर समय धेरै बदलिसकेको थियो । टिममा धेरै फेरबदल भईसकेको थियो । नेपाली फुटबल नयाँ पुस्तामा हस्तान्तरण भईसकेको थियो । भोला भने आफुलाई प्रमाणित गर्ने प्रतिक्षामा थिए ।
तर दुर्भाग्य, लिगको दौरान थ्रीस्टारविरुद्ध गोल गरेर खुसीयाली मनाउने क्रममा उनी लड्न पुगे । फेरी पुरानै चोट बल्झिन पुग्यो । त्यसपछि मैदानबाट हराएका उनी एक्कासी ‘टच लाइन’मा देखिन थाले । तर फरक भुमिकामा ।
लिग र मोफसलका प्रतियोगितामा उनी पुलिस टिमका प्रशिक्षक अनन्तराज थापाको सहायकको भुमिकामा देखिएका थिए । यस क्रममा उनले मुख्य प्रशिक्षक थापासँग धेरै सिक्ने अवसर पाए ।
यसै मौकामा उनले पुलिसको युथ टिम हेर्ने जिम्मा पाए । जसको उनले भरपुर सदुपयोग गरे ।
‘मलाई जसरी नेपाल पुलिसले जिम्मेवारी दिईएको थियो । त्यसलाई न्याय गर्ने सक्दो कोशिश गरेको छु ।’ उनले भने ।
‘अनन्त दाईलाई विशेष सम्झन चाहन्छु । उहाँबाट धेरै सिक्ने अवसर पाए । जसको सदुपयोग गरे । पहिलो प्रतियोगितामै फाइनल पुगे ।’ भोलाले थपे ।
भोलाको एउटै लक्ष्य छ, युथ प्रतियोगिताको नयाँ च्याम्पियन बनेर इतिहास रच्ने ।
पहिलो भुमिका अनि पहिलो उपाधि ।
त्यसका लागि उनको टिम तयार छ ।
प्रतियोगितामा ५ खेल खेलेको पुलिस एक खेलमा मात्रै पराजित भएको छ । त्यो पनि फाइनल प्रतिद्वन्दी ब्रिगेड ब्वाइजसंग ।
![Image may contain: 3 people, people smiling, people playing sport and outdoor](https://scontent.fktm8-1.fna.fbcdn.net/v/t1.0-9/66185149_401757900438879_2281625251999645696_o.jpg?_nc_cat=105&_nc_eui2=AeGe6sv2N4TtO6wH-5Bme0br1Bg_TVoaWecLN-Lhnyxi6dIfNYnbxOkrT8-rh9cdmnydwSw_3qHu0P3_h0SDz6EFOJFraK924FdKVWiV13aj5Q&_nc_oc=AQl5Wl83_ZJRhF-O0ZL8y7-jSbq_tqtl4raOwb9ni8xI3rfwo_lI7Wal_9oA9PP2nQk&_nc_ht=scontent.fktm8-1.fna&oh=40cda4e7dd8edb71477622096443a451&oe=5DEE203E)
‘टिमको अबको मुख्य लक्ष्य उपाधि हो । समूह चरणको खेलमा हामी पराजित भएको थियौ । सो खेलमा मुख्य दुई खेलाडी थिएनन् । अव फाइनलमा राम्रो खेल्दै उपाधिमा ध्यान दिन्छौ ।’ उनले भने ।
सिलवाल नेतृत्व पुलिसले समूह सीको पहिलो खेलमा जावलाखेल युथलाई २–१ गोल अन्तरले पराजित गर्दै सुखद् सुरुवात गरेको थियो । दोस्रो खेलमा सरस्वती युथ क्लबलाई ५–१ ले पराजित गरेको पुलिस समुह चरणको अन्तिम खेलमा ब्रिगेड ब्वाइजसँग ३–० गोल अन्तरले पराजित भएको थियो ।
समूह सीबाट उपविजेताको रुपमा क्वाटरफाइनल पुगेको पुलिसले मछिन्द्र क्लबको चुनौती १–० ले पन्छाएको थियो । बिहीबार भएको खेलमा जावलाखेल युथ क्लबलाई ३–१ गोल अन्तरले पराजित गर्दै पुलिस पहिलो पटक फाइनल पुगेको थियो ।
अघिल्ला संस्करण जस्तै एन्फाले यस पटक एन्फा एकेडेमीका खेलाडी क्लबलाई उपलब्ध गराएन । तर त्यसको असर पुलिसमा खासै परेन । भोलाले देशभर रहेका खेलाडीलाई सामाजिक सञ्जालमार्फत छनोटका लागि आह्वान गरेका थिए ।
ए डिभिजन लिगमा मनाङ मस्र्याङदी क्लबबाट खेलेका विशाल बस्नेत बाहेक पुलिसमा सबै खेलाडी खुल्ला प्रतिस्पर्धाबाट आएका हुन् । कप्तान विशाल पछिल्लो समय नेपाल पुलिस क्लबको करारका लागि प्रयासरत छन् ।
‘विशाल धेरै राम्रो खेलाडी हो । पुलिस टिममा पनि रहेको थियो । युथ टिममा ल्याउन सजिलो भयो । त्यसैले हाम्रो डिफेन्स बलियो रहेको छ ।’ विशालको बारेमा भोला भन्छन् ।
नयाँ खेलाडी सहित मैदान उत्रिएका भोला ईतिहास रच्न मात्र एक खेल पछाडी छन् । त्यसको छिनोफानो आईतबारनै हुनेछ ।
तर भोला प्रशिक्षक भन्दा केही समय खेलाडीकै भुमिकामा देखिन चाहन्छन् ।
![](https://scontent.fktm7-1.fna.fbcdn.net/v/t1.15752-9/67538374_2349959728656828_7299314228270202880_n.jpg?_nc_cat=103&_nc_oc=AQlfaHzsMOUcx5GCQJ5BBoebF24z5stz9wjAcDP9btSu-I43_345jlHJkCOA19k3VTc&_nc_ht=scontent.fktm7-1.fna&oh=f8ab517a1d1b46fc27fb134cca1aecda&oe=5DE6F0DB)
‘मेरो सोचाई अहिलेनै प्रशिक्षकको भुमिकामा देखिने छैन । घाईते भएको अवस्थामा संगठनले जिम्मेवारी दिएको हो । अझै पनि १–२ बर्ष घरेलु फुटबलमै रमाउँछु । त्यसपछि प्रशिक्षकको भुमिकालाई अगाडी बढाउछु ।’ भोला भन्छन् ।
भोलाले राष्ट्रिय टिमबाट सन्यास लिएका छैनन् । उनको मन छ, देशको सुर्य र चन्द्र अंकित झन्डा लगाएर सुखद विदाई लिने ।
‘सन्यास लिईसकेको छैन । टिममा खेल्नै पर्छ भन्ने छैन । नयाँले अवसर पाउनुपर्छ । तर एक दिन देशको लागि अन्तिम खेल खेल्दै सुखद् बिदाई लिने मन छ ।’ उनी भावुक बन्छन् ।