काठमाडौं । समृद्धि प्लस टुले एसईई फुटसल कपको उपाधि जितेको छ । फाइनलमा आयोजक नाइटिङगेल कलेजलाई टाईब्रेकरमा हराउँदै समृद्धि च्याम्पियन बनेको हो ।
नाइटिङगेल कलेजको फुटसल मैदानमा खेलको निर्धारित समय १-१ गोलको बराबरी भएपछि खेलको निर्णय पेनाल्टी सुटआउटबाट गरिएको थियो ।
उपाधिसंगै समृद्धिले २० हजार नगदसहित ट्रफि र प्रमाण पत्र हात पारेको छ । दोस्रो भएको नाइटिङगेलले १० हजारमा चित्त बुझायो ।
प्रतियोगिताको उत्कृष्ट खेलाडी समृद्धिका चन्दन कुमार दास चुनिए । यस्तै गोलरक्षकमा नाइटिङगेलका निखिल कार्की उत्कृष्ट चुनिए । प्रतियोगिताको सर्वाधिक गोलकर्ता नाइटिङगेलका पुकार बलामी चुनिए ।
व्यक्तिगत विधामा उत्कृष्ट हुनेले आयोजक नाइटिङगेल कलेजमा ११ कक्षामा अध्ययन गर्न छात्रबृति पाएका छन् ।
विजेता खेलाडीहरुलाई कलेजका संस्थापक तथा सांसद तेजुलाल चौधरीले पुरस्कृत गरेका थिए ।
प्रतियोगितामा आठ टिमको सहभागिता रहेको थियो ।
