काठमाडौं । विभागीय टिम त्रिभुवन आर्मी क्लब शीर्ष स्थानमा रहदै क्विक्स नेपाल बास्केटबल लिगको प्ले अफमा प्रवेश गरेको छ ।
मंगलबार भएको लिग चरणको अन्तिम खेलमा कीर्तिपुर बास्केटबल क्लबलाई पराजित गर्दै आर्मी शीर्ष स्थानमा रहेर प्ले अफ पुगेको हो । अन्तिम खेलमा आर्मीले कीर्तिपुरलाई ८९-७७ स्कोरले पराजित गर्यो ।
साविकको विजेता आर्मीको जितमा रोबिन खत्रीले उत्कृष्ट प्रदर्शन गरे । प्लेयर अफ दि म्याच बनेका उनले २७ स्कोर गरे ।
जितसंगै आर्मीले १४ खेलबाट २७ अंक जोड्यो । लिगम आर्मीले मात्र एक खेल गुमाएको थियो । कीर्तिपुरको १३ खेलबाट १६ अंक रहेको छ । कीर्तिपुरको प्ले अफ सम्भावना सकिएको छ ।
लिगमा टाइम्स इन्टरनेसनल बास्केटबल क्लबले २६ अंक जोडेर दोस्रो स्थानमा रहेर प्ले अफ पुगेको छ । अन्य दुई टोलीको टुंगो लाग्न बाँकी रहेको छ ।
प्ले फर डिप्राइभ्ड चिल्ड्रेन नेपाल (पिडिसिएन) को आयोजनामा जारी लिगको विजेताले २ लाख पुरस्कार पाउने छन् ।
यस्तै दोस्रोले १ लाख र मोस्ट भ्यालुएबल खेलाडी र सर्वाधिक स्कोर गर्ने खेलाडीले पनि नगद पुरस्कार पाउने आयोजकले जनाएको छ।
