रुटले भेटे सचिनको कीर्तिमान

काठमाडौं। इङ्ल्यान्डका कप्तान जो रुटले टेस्ट क्रिकेटमा सर्वाधिक अर्धशतक बनाउने भारतीय क्रिकेटका महान् ब्याटर सचिन तेन्दुलकरको कीर्तिमान बराबरी गरेका छन्।

पाकिस्तानविरुद्ध लिड्समा जारी पहिलो टेस्टको दोस्रो दिन ३५ वर्षीय रुटले ६६ रनको इनिङ्स खेले। यससँगै उनले टेस्ट क्रिकेटमा आफ्नो ६८औं अर्धशतक पूरा गरे। उनी अब सर्वाधिक टेस्ट अर्धशतक बनाउने खेलाडीको सूचीमा सचिनसँगै संयुक्त रूपमा शीर्ष स्थानमा छन्।

रुट र सचिनपछि वेस्ट इन्डिजका शिवनारायण चन्द्रपोल रहेका छन्। चन्द्रपोलले टेस्टमा ६६ अर्धशतक बनाएका छन्। भारतका राहुल द्रविड र अस्ट्रेलियाका एलन बोर्डर ६३–६३ अर्धशतकसहित संयुक्त रूपमा चौथो स्थानमा छन्।

टेस्ट क्रिकेटमा कप्तानका रूपमा सर्वाधिक ५० प्लस स्कोर बनाउने खेलाडीको सूचीमा पनि रुट पाँचौं स्थानमा पुगेका छन्। दक्षिण अफ्रिकाका पूर्वकप्तान ग्रीम स्मिथ ६१ पटक ५० भन्दा बढी रन बनाउँदै यस सूचीको शीर्ष स्थानमा छन्।

अस्ट्रेलियाका रिकी पोन्टिङ ५४ स्कोरसहित दोस्रो, एलन बोर्डर ५१ स्कोरसहित तेस्रो र पाकिस्तानका मिस्बाह–उल–हक ४३ स्कोरसहित चौथो स्थानमा छन्।

रुटको ६६ रनसँगै उनले व्यक्तिगत कीर्तिमान बराबरी गर्नुका साथै कप्तानका रूपमा पनि आफ्नो नाम विशेष उपलब्धिको सूचीमा दर्ज गराएका छन्।

टेस्ट क्रिकेटमा सर्वाधिक शतक बनाउने कीर्तिमान सचिनको नाममा छ। उनले टेस्ट करियरमा ५१ शतक बनाएका छन्। दक्षिण अफ्रिकाका पूर्वकप्तान ज्याक कालिस ४५ शतकसहित दोस्रो स्थानमा छन् भने अस्ट्रेलियाका पूर्वकप्तान पोन्टिङ ४१ शतकका साथ तेस्रो स्थानमा छन्।