काठमाडौं । क्विक्स नेपाल बास्केटबल लिगमा टाइम्स बास्केटबल क्लबले पहिलो हार व्यहोरेको छ ।
सोमबार भएको रोमान्चक खेलमा टाइम्स विभागीय टिम त्रिभुवन आर्मी क्लबसंग १ अंकको अन्तरले पराजित भएको हो । आर्मीको कोर्टमा भएको खेलमा टाइम्स ६७-६६ को झिनो अन्तरले पराजित भएको हो ।
आर्मीको जितमा बिनोद महर्जनले उत्कृष्ट प्रदर्शन गरे । प्लेयर अफ दि म्याच बनेका उनले १४ स्कोर गरे ।
योसंगै टाइम्सको ११ खेलको अपराजित यात्रा अन्त्य भएको छ । यसअघि टाइम्सले लगातार ११ खेल जितेको थियो ।
टाइम्सलाई हराएसंगै आर्मीले भने १० औं जित निकालेको छ । जितसंगै आर्मीले ११ खेलबाट २१ अंक जोडेको छ । टाइम्सको १२ खेलबाट २२ अंक रहेको छ ।
प्ले फर डिप्राइभ्ड चिल्ड्रेन नेपाल (पिडिसिएन) को आयोजनामा जारी लिगको विजेताले २ लाख पुरस्कार पाउने छन् ।
यस्तै दोस्रोले १ लाख र मोस्ट भ्यालुएबल खेलाडी र सर्वाधिक स्कोर गर्ने खेलाडीले पनि नगद पुरस्कार पाउने आयोजकले जनाएको छ।
