एसिया कपमा पुग्न जित्नैपर्ने खेलमा नेपाललाई चुनौतीपूर्ण लक्ष्य

काठमाडौं। एसिया कपमा पुग्न जित्नैपर्ने खेलमा नेपालले १३१ रनको लक्ष्य पाएको छ। एसीसी प्रिमियर कपअन्तर्गत क्वार्टरफाइनलमा थाइल्यान्डले निर्धारित २० ओभरमा ४ विकेट गुमाउँदै १३० रन बनाएको हो।

थाइल्यान्डकी विकेटकिपर ब्याटर नान्नापट खोन्चारोएनकाइले अविजित ६२ रनको उत्कृष्ट इनिङ्स खेलिन्। उनले ५१ बलमा ६ चौका प्रहार गरिन्। अपिसारा सुवान्चोनराथी ४ रनमा अविजित रहिन्।

फान्निटा मायाले २१ बलमा २६ रन जोड्दा चानिडा सुथिरुआङले २७ बलमा १६ रन बनाइन्। कप्तान नारुएमोल चाइवाइले ८ रनको योगदान दिइन् भने नत्थाकान चन्थाम १ रनमै आउट भइन्।

नेपालका रुविना क्षेत्री, कविता कुँवर र रिया शर्माले समान १/१ विकेट लिए। रुबिनाले ४ ओभरमा मात्र ११ रन खर्चिंदै किफायती बलिङ गरिन्।