पिर्लो बन्ने भए इटालीका प्रशिक्षक

काठमाडौं। इटालीको राष्ट्रिय फुटबल टोलीको मुख्य प्रशिक्षकमा पूर्वस्टार मिडफिल्डर आन्द्रेआ पिर्लो नियुक्त हुने भएका छन्।

इटालियन दैनिक ला रिपब्लिकाका अनुसार इटालियन फुटबल महासंघ (एफआईजीसी) ले पिर्लोसँग चार वर्षको सम्झौतामा सहमति जनाएको छ।

फुटबल इतिहासकै उत्कृष्ट मिडफिल्डरमध्ये एक मानिने ४७ वर्षीय पिर्लोले सन् २००६ मा इटालीलाई विश्वकप उपाधि दिलाउन महत्त्वपूर्ण भूमिका खेलेका थिए। उनले क्लब फुटबलमा इन्टर मिलान, एसी मिलान र युभेन्ट्समा सफल करिअर बिताएका थिए।

हाल पिर्लो संयुक्त अरब इमिरेट्सको यूएई फर्स्ट डिभिजन लिगमा प्रतिस्पर्धा गर्ने दुबई युनाइटेडका मुख्य प्रशिक्षक छन्। यसअघि उनले सन् २०२०–२१ सिजनमा युभेन्ट्सको प्रशिक्षण सम्हाल्दै क्लबलाई कोप्पा इटालिया र इटालियन सुपर कपको उपाधि जिताएका थिए।

यद्यपि‚ एफआईजीसीले यस विषयमा औपचारिक प्रतिक्रिया दिएको छैन। समाचार संस्था रोयटर्सले महासंघसँग प्रतिक्रिया मागेको जनाएको छ। यसैबीच, म्यानचेस्टर सिटी र बार्सिलोनाका पूर्वप्रशिक्षक पेप ग्वार्डिओलाले इटालीको राष्ट्रिय टोली सम्हाल्ने प्रस्ताव अस्वीकार गरेका छन्।

रोयटर्ससँग कुरा गरेका एक स्रोतका अनुसार ५५ वर्षीय स्पेनी प्रशिक्षकसँग एफआईजीसीले छलफल गरेको थियो। महासंघका अध्यक्ष जियोभानी मालागोले ग्वार्डिओलाजस्ता प्रशिक्षकका लागि आर्थिक पक्षमा पनि लचकता अपनाउन सकिने संकेत दिएका थिए।

इटालीले अप्रिलमा जेन्नारो गात्तुसोले पद छाडेपछि नयाँ प्रशिक्षकको खोजी गरिरहेको छ। गात्तुसोको कार्यकालमा चार पटकको विश्वकप विजेता इटाली लगातार तेस्रो पटक विश्वकपको अन्तिम चरणमा छनोट हुन असफल भएको थियो।

एफआईजीसीले ब्राजिलका राष्ट्रिय टोलीका प्रशिक्षक कार्लो एन्सेलोट्टीसँग पनि प्रारम्भिक छलफल गरेको बताइएको छ। ग्वार्डिओलाले गत सिजनको अन्त्यसँगै म्यानचेस्टर सिटी छाडेका थिए।

उनले एक दशकको कार्यकालमा क्लबलाई ६ प्रिमियर लिग, ३ एफए कप, ५ लिग कप र एक यूईएफए च्याम्पियन्स लिग उपाधि जिताएका थिए। सिटीअघि उनले बार्सिलोनालाई दुई च्याम्पियन्स लिग र तीन ला लिगा उपाधि दिलाएका थिए भने बायर्न म्युनिखसँग तीन बुन्डेसलिगा उपाधि पनि जितेका थिए।

लगातार विश्वकपमा छनोट हुन नसकेपछि इटालियन फुटबल गम्भीर संकटबाट गुज्रिरहेको छ। यस्तो अवस्थामा नयाँ राष्ट्रिय टोली प्रशिक्षकको नियुक्तिलाई इटालीको युवा खेलाडी विकास प्रणाली र प्रतिभा उत्पादन संरचनाको पुनर्निर्माणतर्फको पहिलो महत्त्वपूर्ण कदमका रूपमा हेरिएको छ।