स्पेनका दुई खेल अनुसन्धानको घेरामा

१६ वर्षपछि विश्वकपको उपाधि जितेको स्पेन अहिले विवादको घेरामा परेको छ। लगातार दोस्रोपटक उपाधि जित्ने लक्ष्यमा रहेको अर्जेन्टिनालाई एकपक्षीय फाइनलमा १–० ले हराउँदै च्याम्पियन बनेको स्पेनका विश्वकपका दुई खेल शंकास्पद सट्टेबाजीको सूचीमा परेका छन्।

यस विषयमा स्पेनमाथि अनुसन्धान हुन सक्ने सम्भावना देखिएको छ। समाचार संस्था ‘द एथलेटिक’ का अनुसार खेलमा सम्भावित मिलेमतो रोक्न र खेलको निष्पक्षता कायम गर्न काम गर्ने स्वतन्त्र अन्तर्राष्ट्रिय संस्था ग्रुप अफ कोपेनहेगनले विश्वकपका सात खेललाई निगरानीको सूचीमा राखेको छ। खेलको नतिजाको वैधताबारे प्रश्न उठेपछि उक्त संस्थाले विश्व फुटबलको सर्वोच्च निकाय फिफासँग थप स्पष्टीकरण मागेको छ।

सोही सूचीमा स्पेनका दुई खेल पनि समावेश छन्। विश्वकपमा पहिलोपटक सहभागी भएर इतिहास बनाउँदै नकआउट चरण पुगेको केप भर्डेविरुद्धको स्पेनको पहिलो खेलमाथि विशेष ध्यान दिइएको छ। उक्त खेल गोलरहित बराबरीमा सकिएको थियो। यस खेलअघि पोलिमार्केटजस्ता सट्टेबाजी प्लेटफर्ममा स्पेनले केप भर्डेविरुद्ध जित निकाल्न नसक्ने अनुमानमा ठूलो मात्रामा बाजी लागेको देखिएको थियो।

त्यस्तै, साउदी अरaविरुद्धको खेलमा फेरान टोरेसको गोल रद्द गर्ने क्रममा भिडियो असिस्टेन्ट रेफ्री (भीएआर) प्रक्रियामा भएको लामो ढिलाइलाई पनि शंकाको दृष्टिले हेरिएको छ। टोरेसकै गोलले फाइनलमा अर्जेन्टिनालाई पराजित गर्दै स्पेनलाई विश्वकप उपाधि दिलाएको थियो।

ग्रुप अफ कोपेनहेगनले शंकास्पद गतिविधि देखिएका खेललाई ‘येलो अलर्ट’ (पहेंलो चेतावनी) को श्रेणीमा राख्ने गर्छ। असामान्य सट्टेबाजी गतिविधि, सामाजिक सञ्जालमा फैलिएका अपुष्ट सूचना वा अस्वाभाविक सूचनाको आदान–प्रदान देखिएमा यस्तो चेतावनी जारी गरिन्छ। यो चार तहको चेतावनी प्रणालीमध्ये तेस्रो स्तर हो। यस प्रणालीमा हरियो (सामान्य), पहेंलो (मध्यम सतर्कता), सुन्तला (उच्च सतर्कता) र रातो (अत्यधिक सतर्कता) तह रहेका छन्।

ग्रुप अफ कोपेनहेगनका पूर्व सहयोगी तथा विशेषज्ञ क्रिस्टियन काल्बले चेतावनी जारी हुनुको अर्थ खेलमा अनियमितता भएको प्रमाणित हुनु नरहेको बताएका छन्। ‘ग्रुप अफ कोपेनहेगनका चेतावनीहरू पछाडि असामान्य अवस्था (आउटलायर) हुन सक्छन्। उदाहरणका रूपमा सट्टेबाजी बजारमा तरलताको परिवर्तन वा अन्य प्राविधिक कारण हुन सक्छन्। यस्तो अवस्था देखिनुका लागि खेल मिलेमतो वा ठगी नै हुनुपर्छ भन्ने छैन,’ उनले द एथलेटिकलाई बताएका छन्।

यसैबीच, विश्वकप सकिएको केही दिनमै फिफाले आफूले कुनै पनि शंकास्पद सट्टेबाजी वा खेल मिलेमतोसम्बन्धी सूचना प्राप्त नगरेको जनाएको थियो। ग्रुप अफ कोपेनहेगनले पनि कुनै खेलमा प्रत्यक्ष रूपमा शंकास्पद सट्टेबाजी गतिविधि वा मिलेमतोको प्रमाण नभेटिएको स्पष्ट पारेको छ। यद्यपि, शंका उत्पन्न भएका खेलबारे फिफासँग थप विवरण माग गरिएको छ।

स्पेनबाहेक अन्य केही खेल पनि निगरानीमा परेका छन्। तीमध्ये मेक्सिकोविरुद्धको खेलमा दक्षिण अफ्रिकाका खेलाडी थेम्बा जोवान र अमेरिकाका स्ट्राइकर फोलारिन बालोगुनले पाएको रातो कार्ड पनि समावेश छन्। बालोगुनको घटनामा उनी बेल्जियमविरुद्ध खेल्नेछन् भन्ने विशेष सट्टा लगाइएको थियो। तर‚ बोस्निया–हर्जेगोभिनाविरुद्धको खेलमा रातो कार्ड पाएपछि उनी बेल्जियमविरुद्ध निलम्बित भएका थिए। यद्यपि, सट्टा लगाउने समयमा उनको प्रतिबन्ध रद्द भएको थिएन।