ओटामेन्डीले लिए सन्न्यास

काठमाडौं। अर्जेन्टिनाका अनुभवी डिफेन्डर निकोलस ओटामेन्डीले बिहीबार अन्तर्राष्ट्रिय फुटबलबाट सन्न्यासको घोषणा गरेका छन्।

यससँगै १७ वर्ष लामो अन्तर्राष्ट्रिय करिअरको अन्त्य भएको छ। उनले अर्जेन्टिनालाई सन् २०२२ को फिफा विश्वकप र दुई पटक कोपा अमेरिका जिताउन महत्वपूर्ण भूमिका खेलेका थिए।

३८ वर्षीय सेन्टर–ब्याक ओटामेन्डीले अर्जेन्टिनाका लागि कुल १३९ अन्तर्राष्ट्रिय खेल खेले। उनी यस वर्ष आयोजित विश्वकपमा पनि टोलीका सदस्य थिए, जहाँ उपाधि रक्षा गर्ने लक्ष्यसहित मैदानमा उत्रिएको अर्जेन्टिना फाइनलमा स्पेनसँग १–० ले पराजित भएको थियो।

सन्न्यास घोषणा गर्दै ओटामेन्डीले इन्स्टाग्राममा भावुक सन्देश लेखेका छन्। ‘आज मैले आफ्नो करिअरकै सबैभन्दा कठिन शब्दहरू लेख्नुपरेको छ। संयोगवश मेरो अन्तिम अन्तर्राष्ट्रिय खेल विश्वकपको फाइनल बन्यो। नतिजा हाम्रो पक्षमा आएन, तर टोलीले अन्तिम क्षणसम्म पूरा समर्पणका साथ संघर्ष गरेकोमा मलाई गर्व छ‚’ उनले भनेका छन्।

उनले थपे,‘विश्व च्याम्पियन बन्ने सपना पूरा गर्ने अवसर दिएकोमा अर्जेन्टिनालाई हृदयदेखि धन्यवाद।’ हालै ओटामेन्डी युरोपमा १६ वर्ष सफल यात्रा पूरा गरेपछि अर्जेन्टिनाको प्रतिष्ठित क्लब रिभर प्लेटमा आबद्ध भएका छन्। युरोपमा रहँदा उनले पोर्टो, भ्यालेन्सिया, म्यानचेस्टर सिटी र बेन्फिकाबाट व्यावसायिक फुटबल खेलेका थिए।

ओटामेन्डीले आफ्नो अन्तर्राष्ट्रिय करियरमा अर्जेन्टिनाको प्रतिनिधित्व गर्दै चार संस्करणको फिफा विश्वकप खेलेका छन्। उनको सन्न्याससँगै अर्जेन्टिनी फुटबलले आफ्नो सफल पुस्ताका एक महत्त्वपूर्ण र अनुभवी रक्षकलाई बिदाइ गरेको छ।