काङ–इन ली अन्ततः एट्लेटिकोमा

काठमाडौं। लामो प्रतीक्षापछि दक्षिण कोरियाका मिडफिल्डर काङ–इन ली अन्ततः एट्लेटिको मड्रिडमा आबद्ध भएका छन्। उनको स्थानान्तरणको चर्चा दुई सातादेखि चलिरहेको थियो।

सम्झौता आज हुन्छ, भोलि हुन्छ भन्ने चर्चा भइरहे पनि आधिकारिक घोषणा भने ढिलो भएको थियो। शनिबार एट्लेटिकोले काङ–इनसँग सम्झौता भएको घोषणा गरेको हो। यससँगै एट्लेटिकोको इतिहासमा पहिलो पटक कुनै दक्षिण कोरियाली खेलाडी क्लबमा आबद्ध भएका छन्।

फ्रान्सेली क्लब पेरिस सेन्ट–जर्मेन (पीएसजी) बाट दुई पटक युरोपेली च्याम्पियन्स लिग जितेका काङ–इन अब प्रशिक्षक डिएगो सिमियोनेको टोलीमा रहनेछन्। २५ वर्षीय मिडफिल्डरसँग सन् २०३१ सम्मका लागि सम्झौता गरिएको छ।

उनले सन् २०२३ मा मायोर्काबाट पीएसजीमा आबद्ध भएपछि तीन सिजन त्यहाँ बिताएका थिए। एट्लेटिकोमा उनले एन्टोनियो ग्रिजम्यानले लगाउने सात नम्बरको जर्सी लगाउनेछन्। सन् २०१९ को २० वर्षमुनिको विश्वकपमा उत्कृष्ट खेलाडी घोषित भएका काङ–इन आफ्नो उत्कृष्ट बायाँ खुट्टा, प्राविधिक क्षमता, गोल गर्ने कौशल र बल नियन्त्रणसहित विपक्षी खेलाडीलाई छलाउने कलाका कारण युरोपेली फुटबलमा परिचित छन्।

प्रतिभाशाली खेलाडी मानिए पनि पीएसजीमा नियमित खेल्ने अवसर कम पाएकाले उनले आफ्नो पूर्ण क्षमता देखाउन सकेनन्। एट्लेटिकोमा भने आफूलाई स्थापित गर्ने अवसर पाउने अपेक्षा गरिएको छ। विशेषगरी दायाँ आक्रमणात्मक भागमा टोलीलाई उनको आवश्यकता देखिएको छ।

उनी विपरीत विङबाट भित्री आक्रमणकारीका रूपमा खेल्न सक्षम छन्। त्यस स्थानबाट उनले गोलका अवसर सिर्जना गर्नुका साथै निर्णायक पास दिन सक्छन्। आवश्यक पर्दा तीन सदस्यीय मध्यपङ्क्तिको अगाडि रक्षात्मक मिडफिल्डरको भूमिकामा पनि खेल्न सक्छन्।

काङ–इनले पीएसजीका लागि १२४ खेल खेल्दै १६ गोल गरेका छन् भने १६ गोलका लागि अवसर सिर्जना गरेका छन्। फ्रान्समा बिताएका तीन वर्षमा उनले दुई युरोपेली च्याम्पियन्स लिग, तीन फ्रान्सेली लिग उपाधिसहित कुल १२ वटा उपाधि जितेका छन्।

हालै सम्पन्न विश्वकपमा पनि उनले दक्षिण कोरियाको प्रतिनिधित्व गरेका थिए। चेक गणतन्त्रविरुद्ध ह्वाङ इन–बोमले गरेको पहिलो गोलका लागि अवसर काङ–इनले नै सिर्जना गरेका थिए। दक्षिण कोरिया समूह चरणबाट अघि बढ्न नसके पनि उनले खेलेका तीनै खेलमा प्रभावशाली प्रदर्शन गरेका थिए।

अन्तर्राष्ट्रिय फुटबलमा काङ–इनले सन् २०१९ को सेप्टेम्बरमा दक्षिण कोरियाको सिनियर टोलीबाट पहिलो खेल खेलेका थिए। हालसम्म उनले राष्ट्रिय टोलीका लागि ५० खेलमा १० गोल गरेका छन्।

काङ–इन नयाँ सिजनका लागि एट्लेटिकोको तेस्रो नयाँ अनुबन्ध हुन्। यसअघि क्लबले विश्वविजेता स्पेनी टोलीका बायाँ रक्षक एलेक्स ग्रिमाल्डो र डेनमार्कका रक्षात्मक मिडफिल्डर मोर्टेन हुलमान्डलाई टोलीमा भित्र्याइसकेको छ।